មន្ត្រីពាណិជ្ជកម្មខេត្តបន្ទាយមានជ័យ បានព្រមានចាត់វិធានការផ្លូវច្បាប់ លើម្ចាស់ហាងលក់ដូរណា មិនព្រមយកលុយខ្មែរ និងផាក់ពិន័យពី....

បន្ទាយមានជ័យៈ កាលពីថ្ងៃទី១៨ ខែកញ្ញា ឆ្នាំ២០១៨ មន្ត្រីកាំកុងត្រូល និងមន្ត្រីពាណិជ្ជកម្មខេត្តបន្ទាយមានជ័យ បានព្រមានចាត់វិធានការផ្លូវច្បាប់លើម្ចាស់ហាងលក់ដូរណា មិនយកប្រាក់រៀលឬយកតែកាត់ទឺក។ ខណៈដែលមន្ត្រីជំនាញចុះអប់រំផ្សព្វផ្សាយណែនាំ ការអនុវត្តសេចក្តីប្រកាសរបស់អន្តរក្រសួង ស្តីពីការបិទលើមុខទំនិញ និងសេវាគ្រប់ប្រភេទជាប្រាក់រៀលលើកទី២ ចំពោះពាណិជ្ជករ អាជីវករ និងសេវាករតាមហាងបញ្ជរភោជនីដ្ឋានអាហារដ្ឋាន ផ្សារទំនើប ម៉ាតសេវាកម្មនានា ទាំងក្នុងអគារនិងក្រៅអគារ នៅបរិវេណកាស៊ីណូនានា នៅក្រុងប៉ោយប៉ែត។

សូមបញ្ជាក់ថាៈ នៅតាមខេត្តជាប់ព្រំដែនថៃ មួយរយៈពេលនេះ នៅតាមហាង ភោជនីដ្ឋាន ឬអ្វីៗក្នុងប្លុកកាសុីណូ គេទូទាត់ជាប្រាក់បាតថៃ ឬអាចយកជាប្រាក់ដុល្លារ ហើយកាត់ទឹកជាមួយអត្រាប្តូរប្រាក់បាត។ ឯប្រាក់រៀល មិនត្រឹមតែមិនកាត់ទឹកទេ គឺគេមិនយកប្រាក់រៀលទៀត។

លោក សាន វិជ្ជាសារ៉ាវុធ ប្រធានសាខាកាំកុងត្រូលខេត្តបន្ទាយមានជ័យ បានលើកឡើងថា មន្ត្រីជំនាញអនុវត្តឲ្យមានការសរសេររាយមុខទំនិញតាំងលក់ក្នុងផ្សារម៉ាត រឺទីតាំងលក់ទំនិញ។ មន្ត្រីជំនាញយោងតាមការប្រកាសរបស់ក្រសួងពាណិជ្ជកម្ មស្តីពីការបិទស្លាកលើមុខទំនិញ និងសេវាកម្មគ្រប់ប្រភេទ ដើម្បីលើកស្ទួយប្រាក់រៀលខ្មែរ ដោយធានាដល់ការអភិវឌ្ឍន៍សេដ្ឋកិច្ចទីផ្សារសេរី និងការប្រកួតប្រជែងដោយសមធម៌។

លោកបញ្ជាក់ឲ្យដឹងទៀតថា ក្នុងប្រកាសនៃប្រការ៨ គ្រប់ពាណិជ្ជករ អាជីវករទាំងឡាយ ដែលមិនអនុវត្តតាមប្រកាសនេះទេ ត្រូវបានចាត់ទុកកិច្ចប្រតិបត្តិការលក់ទំនិញ ជាអំពើខុសច្បាប់ហើយ និងត្រូវផ្តន្ទាទោសតាមច្បាប់ជាធរមាន ឬផាកពិន័យជាទឹកប្រាក់ចំនួន២លានរៀល ដល់៦លានរៀល ៕