ទីក្រុងញូវយ៉កៈ ប្រជាពលរដ្ឋខ្មែរជាច្រើននាក់ផ្សេងទៀតដែលកំពុងតែរស់នៅ បម្រើការងារ និងសិក្សានៅទីក្រុងញូវយ៉ក សហរដ្ឋអាមេរិក បានប្រកាសថា ពួកគេកំពុងត្រៀមខ្លួន និងទន្ទឹងរង់ចាំថ្ងៃ កំណត់មកដល់ ដើម្បីទៅចាំទទួលស្វាគមន៍វត្តមានសម្ដេចតេជោ ហ៊ុន សែន ប្រមុខនៃរាជរដ្ឋាភិបាលកម្ពុជា ដែលនឹងអញ្ជើញទៅចូលរួមកិច្ចប្រជុំអង្គការសហប្រជាជាតិ នៅញូវយ៉ក នាសប្តាហ៍ក្រោយ។

ប្រជាពលរដ្ឋខ្មែរ ដែលរស់នៅទីនោះមិនតិចជាង១០ឆ្នាំ ហើយខ្លះរហូតដល់៣០ឆ្នាំ បានអះអាងដូចៗគ្នាថា ការទៅទទួលស្វាគមន៍វត្តមានសម្ដេចតេជោ ហ៊ុន សែន គឺជាការស្ម័គ្រចិត្តពោរពេញ ដោយក្ដីស្រលាញ់គាំទ្រ ដោយគ្មានការបង្ខិតបង្ខំ ឬទិញទឹកចិត្ត ដូចការចោទប្រកាន់របស់បុគ្គលមួយក្ដាប់តូច ដែលមាននិន្នាការប្រឆាំងនោះទេ។ ក្រៅពីការប្រកាសទៅចូលរួមទទួលហើយនោះ ពួកគាត់ក៏បានគូសបញ្ជាក់ថា មិនមានការដកអាសនៈរបស់កម្ពុជា នៅក្នុងអង្គការសហប្រជាជាតិ ដូចការបំផុសបំផុល ព្រោះថាប្រសិនបើគេដកមែន ហេតុអ្វីបានជាសម្ដេចអញ្ជើញទៅចូលរួមដោយផ្ទាល់បែបនេះ? ហើយនេះក៏សបញ្ជាក់ឲ្យឃើញថា អង្គការសហប្រជាជាតិ ទទួលស្គាល់សម្ដេចបន្ដដឹកនាំប្រទេស ដែលកើតចេញពីការបោះឆ្នោតគាំទ្រ របស់ប្រជាពលរដ្ឋខ្មែរយ៉ាងច្រើនលើសលុប។ លោក មិន ថង ដែលធ្វើការនៅទីក្រុងញូវយ៉កប្រមាណ១០ឆ្នាំ បានថ្លែងយ៉ាងដូច្នេះថា «ចំពោះខ្ញុំផ្ទាល់មានសេចក្ដីរំភើប និងសប្បាយចិត្តយ៉ាងក្រៃលែង ដែលសម្ដេចតេជោ នឹងអញ្ជើញមកចូលរួមប្រជុំនៅអង្គការសហប្រជាជាតិ ហើយខ្ញុំត្រូវតែទៅជួបសម្ដេចនៅពេលខាងមុខឆាប់ៗនេះ ហើយខ្ញុំជឿជាក់ថា នឹងមានប្រជាពលរដ្ឋជាច្រើននឹងទៅជួបសម្ដេចផងដែរ»។ ពលរដ្ឋខ្មែររូបនេះ ក៏បានអះអាងថា ការទៅជួបសម្ដេចតេជោ ហ៊ុន សែន គឺគ្មានការទិញទឹកចិត្តអ្វីទាំងអស់។ លោកថ្លែងបញ្ជាក់ថា «គេចេះតែថាទេ គ្មានអ្នកណាមកទិញទឹកចិត្តអីទេ ដូចខ្ញុំនេះទៅទិញទឹកចិត្តមកពីណា បើខ្ញុំមកធ្វើការនៅនេះ១០ឆ្នាំហើយនោះ។ អ្នកដែលគេនិយាយ គេចេះតែនិយាយទៅ ចំពោះខ្ញុំផ្ទាល់ខ្ញុំទៅតែមកជួបសម្ដេច»។ ស្រដៀងគ្នានេះ លោក ថេង ដែលជាពលរដ្ឋខ្មែររស់នៅទីក្រុងញូវយ៉កប្រមាណ៣០ឆ្នាំ ក៏បានបង្ហាញក្ដីរំភើបរីករាយផងដែរ ចំពោះវត្តមានសម្ដេចតេជោ ហ៊ុន សែន ដែលនឹងទៅចូលរួមប្រជុំនៅអង្គការសហប្រជាជាតិ ខណៈដែលរូបគាត់ និងពលរដ្ឋខ្មែរផ្សេងទៀត បានត្រៀមខ្លួនជាស្រេចហើយដើម្បីចាំទទួលស្វាគមន៍ សម្ដេចប្រមុខនៃរាជរដ្ឋាភិបាល។ លោក ថេង បានគូសបញ្ជាក់យ៉ាងដូច្នេះថា «ខ្ញុំមានសេចក្ដីត្រេកអរសោមនស្សណាស់ ដែលសម្ដេចមក ព្រោះខ្ញុំមិនដែលឃើញសម្ដេចផ្ទាល់ផង។ ចំពោះរូបខ្ញុំផ្ទាល់ចេញពីបេះដូង ខ្ញុំចង់ឲ្យសម្ដេចមក ហើយសម្ដេចជាប់ឆ្នោតដោយស្របច្បាប់ [...] បើគេភ្ជូរអាសនៈនៅញូវយ៉កហេតុអីបានសម្ដេចមកផ្ទាល់ ខ្ញុំមិនជឿសោះត្រង់ចំណុចនេះ»។ សូមជម្រាបថា ក្រៅពីប្រជាពលរដ្ឋនៅទីក្រុងញូវយ៉កនេះ ក៏មានការប្រជាពលរដ្ឋខ្មែររស់នៅរដ្ឋវ៉ាស៊ីនតុន នៅទីក្រុងឡូវ៉ែល រដ្ឋអ័ររីហ្គេន និងរដ្ឋផ្សេងៗជាច្រើនទៀត ពួកគេបានអះអាងថា ពួកគាត់បានត្រៀមខ្លួនរួចជាស្រេច ក្នុងការចាំទទួលស្វាគមន៍សម្តេចតេជោ ហ៊ុន សែន ចំពោះការទៅកាន់ទឹកដីសហរដ្ឋអាមេរិកជាថ្មីនេះ។ សូមបញ្ជាក់ថា សម្តេចតេជោ ហ៊ុន សែន ក្នុងនាមប្រមុខរាជរដ្ឋាភិបាល អាណត្តិថ្មី នឹងដឹកនាំគណៈប្រតិភូជាន់ខ្ពស់កម្ពុជា ទៅចូលរួមសម័យប្រជុំអង្គការសហប្រជាជាតិលើកទី៧៣ នៅទីក្រុងញូវយ៉ក សហរដ្ឋអាមេរិក ខាងមុខនេះ។ កម្ពុជា និងប្រទេសចំនួន១៥ផ្សេងទៀត មកពីក្រុមប្រទេសតំបន់ផ្សេងៗ ត្រូវបានជ្រើសតាំងឲ្យធ្វើជាអនុប្រធាន រួមជាមួយប្រទេសសមាជិកអចិន្រ្តៃយ៍ទាំង៥ នៃក្រុមប្រឹក្សាសន្តិសុខអង្គការសហប្រជាជាតិ នៃសម័យប្រជុំលើកទី៧៣ របស់មហាសន្និបាតអង្គការសហប្រជាជាតិ ស ម្រាប់អាណត្តិពីខែកញ្ញា ឆ្នាំ២០១៨ ដល់ខែកញ្ញា ឆ្នាំ២០១៩ ខាងមុខនេះ៕ ប្រភពៈ Phorn Sophal