ខេត្តកណ្តាលៈ នារីរូបស្រស់ម្នាក់ មាននឈ្មោះរស្មី អាយុជាង២០ឆ្នាំ ប្រកប របរម៉ាស្សា កោសជប់ ស្នាក់នៅបន្ទប់ជួលក្នុងភូមិព្រែកសំរោង៣ សង្កាត់តាខ្មៅ ក្រុងតាខ្មៅ។ ទើបនឹងសម្រាលកូនប្រុស (ពិការជើង) បាន១ខែ មានឈ្មោះរាជ ទើបនឹងមានអាយុ៣ខែប៉ុណ្ណោះ ពិការជើងទាំងសងខាងពីកំណើត។ ត្អូញថាចង់ចេញទៅធ្វើការ ក៏ជួលអ្នកជិតខាងម្នាក់ ឱ្យជួយមើលកូនរបស់ខ្លួន ដោយសន្យាថានឹងផ្តល់ប្រាក់ខែចំនួន២០០ដុល្លារ ទីបំផុតក៏រត់គេចខ្លួនបាត់អស់រយៈពេល២ខែមកហើយ ដោយមិន ដែលផ្ញើលុយកាក់មកចិញ្ចឹមកូន ឬផ្តល់ជាប្រាក់ខែឱ្យគេឡើយ លុះអ្នកមើលថែក្មេងអត់មានលទ្ធភាពចិញ្ចឹម ក៏ប្រកាសតាមរកម្តាយឱ្យមកទទួលយកកូនប្រុសត្រឡប់ទៅវិញ។
តាមសម្តីស្ត្រីជាអ្នកមើលថែក្មេងប្រុសអភ័ព្វខាងលើ បានរៀបរាប់ប្រាប់ថា គាត់ស្នាក់នៅឯពេជ្រនិល ខេត្តកំពង់ស្ពឺឯណោះ និងមានប្តីជាជនពិការភ្នែកទាំងសងខាងទៀតផង។ នៅមុនពេលកើតហេតុ កាលពីអំឡុពេលប្រមាណ២ខែមុននេះ ក្មួយស្រីរបស់គាត់ម្នាក់ រស់នៅភ្នំពេញ ក្បែរផ្ទះម្តាយក្មេងប្រុសខាងលើ បានប្រាប់គាត់ថា មានគេត្រូវការអ្នកមើលថែក្មេង ដោយឱ្យប្រាក់ខែខ្ពស់ ទើបគាត់ចាប់អារម្មណ៍ ក៏ឡើងមកជួប និងត្រូវបានស្ត្រីឈ្មោះរស្មី ជាម្តាយរបស់ក្មេងប្រុសអភ័ព្វ បាននិយាយថា
នាងចង់ឱ្យគាត់មើលថែកូនប្រុសនេះ (ពិការជើងសងខាង) ដោយផ្តល់ ប្រាក់ខែឱ្យចំនួន២០០ដុល្លារ និងថែមទាំងអនុញ្ញាតឱ្យគាត់យកក្មេងនេះទៅមើលថែនៅពេជ្រនិល (ផ្ទះរបស់គាត់) បានទៀតផង។ ចំណែកគាត់ ដោយនឹកឃើញថា ប្រាក់ខែ២០០ ដុល្លាររកឯណាបាន ទើបព្រមព្រៀងជាមួយម្តាយក្មេងប្រុសនេះ ទទួលយកកូនប្រុសគេទៅមើលថែ នឹករំពឹងថា បានប្រាក់ខែមើលថែប្តីពិការរបស់គាត់។
ស្ត្រីជាអ្នកមើលថែក្មេងប្រុសខាងលើបន្តថា ក្រោយពីព្រមព្រៀងគ្នាហើយ គាត់ក៏នាំក្មេងប្រុសនេះ ទៅពេជ្រនិល ប៉ុន្តែម្តាយរបស់ក្មេងនេះមិនទាន់ផ្តល់លុយកាក់ឱ្យគាត់សូម្បីតែ១រៀល ដោយនាងបានត្អូញថា នាងទើបសម្រាលកូនហើយ មិនទាន់បានចូលធ្វើការនៅឡើយ ហេតុនេះមិនទាន់មានលុយឱ្យទេ ចាំពេលចូលធ្វើការ (កោសជប់ ម៉ាស្សា) នាងនឹងខ្ចីលុយថៅកែផ្ញើឱ្យគាត់។
បន្ទាប់មក តាំងពីចាប់ផ្តើមមើលថែក្មេងប្រុសម្នាក់នេះ រហូតមកដល់សព្វថ្ងៃ មានរយៈពេលជាង២ខែទៅហើយ ប៉ុន្តែមិនដែលឃើញស្ត្រីជាម្តាយផ្ញើប្រាក់ខែឱ្យគាត់សោះ ទើបគាត់សម្រេចចិត្ត បីកូនតូចនេះ ត្រឡប់មករកម្តាយគេវិញ តែមកដល់ ស្រាប់តែបាត់មិនដឹងថាស្ត្រីជាម្តាយនេះ គេទៅណាបាត់ទេ ទោះជាទៅសួរនាំនៅកន្លែងហាងម៉ាស្សាដែលនាងធ្លាប់បម្រើការ ក៏គ្មានអ្នកណាបានដឹងពីដំណឹងនាងដែរ។
ដោយសារតែអស់លទ្ធភាពក្នុងការមើលថែតទៅទៀត ទើបស្ត្រីខាងលើ បានសម្រេចផ្តល់ដំណឹងដល់វិទ្យុ អេប៊ីស៊ី មកជួយអន្តរាគមន៍ ទទួលយកក្មេងប្រុសម្នាក់នេះ ទៅជួយចិញ្ចឹមបន្ត និងប្រកាសតាមរកម្តាយរបស់គេឱ្យមកយកត្រឡប់ទៅវិញទៅ ចំណែកគាត់ឈប់ចង់បានប្រាក់ ខែ២០០ដុល្លារ ដែលជាប្រាក់ខែខ្យល់នោះទៀតហើយ៕
