នេះហើយឥទិ្ធពលថ្នាំញៀន!!! ព្រោះតែថ្នាំជ្រេបពេញខ្លួន ធ្វើឲ្យយុវជនម្នាក់ បែកគំនិតចេញកាច់.ក ម៉ូតូអ្នកកាសែតម្នាក់ បានសំរេចយកទៅបញ្ជាំដើម្បីទិញថ្នាំជក់ ក្នុងតម្លៃ....

ភ្នំពេញៈ កាលពីវេលាម៉ោង៧យប់ ថ្ងៃទី៣១ ខែតុលា ឆ្នាំ២០១៨ ចំណុចមុខផ្ទះលេខ២៧២ ផ្លូវលេខ៣៥៧ ភូមិដើមស្លែង សង្កាត់ច្បារអំពៅ២ ខណ្ឌច្បារអំពៅ។ តាមប្រភពព័ត៌មានពីសមត្ថកិច្ចបានប្រាប់ឲ្យដឹងថា នៅវេលាម៉ោង៨ព្រឹក ថ្ងៃកើតហេតុជនរងគ្រោះមានឈ្មោះ ហេង សុខទី ភេទប្រុស អាយុ២៣ឆ្នាំ ជាតិខ្មែរ មុខរបរសារព័ត៌មាន ស្នាក់នៅផ្ទះលេខ២៧២ ផ្លូវលេខ៣៥៧ ភូមិដើមស្លែង សង្កាត់ច្បារអំពៅ២ ខណ្ឌច្បារអំពៅ។ បានទុកម៉ូតូមួយគ្រឿងម៉ាក ហុងដា សេ១២៥ ពណ៌ខ្មៅ ពាក់ស្លាកលេខ ភ្នំពេញ ១BA-០៦១២ នៅចំណុចមុខផ្ទះកើតហេតុ រួចក៏បានចូលទៅសម្រាកមួយសន្ទុះ ក៏ត្រឡប់ចេញមកក្រៅវិញ ។

ស្រាប់តែមានជនសង្ស័យម្នាក់ មានឈ្មោះ ហួន ចាន់ណា អាយុ១៨ឆ្នាំ ជាតិខ្មែរ មុខរបរមិនពិតប្រាកដ ស្នាក់នៅផ្ទះគ្មានលេខ សំណង់អនាធិបតេយ្យ ភូមិដើមស្លែង សង្កាត់ច្បារអំពៅ២ ខណ្ឌច្បារអំពៅ។ បានធ្វើសកម្មភាពលួចយកម៉ូតូ (កាច់ក) ជនរងគ្រោះជិះគេចពីកន្លែងកើតហេតុបាត់ ស្របពេលនោះជនរងគ្រោះ បានទៅដាក់ពាក្យបណ្តឹង នៅប៉ុស្តិ៍នគរបាលរដ្ឋបាលច្បារអំពៅ២ តែម្តង។ ចំណែកបុរសរងគ្រោះក្តៅក្រាហាយចិត្ត ក៏បើកកាមេរ៉ាសុវត្ថិភាពនៅមុខផ្ទះរបស់ខ្លួនមើល ទើបឃើញជនសង្ស័យ ដែលរស់នៅក្នុងភូមិជាមួយគ្នា បានធ្វើសកម្មភាពលួចយកម៉ូតូ (កាច់ក) របស់ខ្លួនទៅក៏បានយកវីដេអូ ទៅប្រគល់អោយសមត្ថកិច្ចដើម្បីងាយស្រួល ក្នុងការស្រាវជ្រាវចាប់ជនសង្ស័យរូបនោះ។

លុះមកដល់ម៉ោង៧យប់ថ្ងៃដដែល មិត្តភ័ក្ដិរបស់ជនរងគ្រោះ បានប្រទះឃើញជនសង្ស័យ នៅមុខផ្ទះរបស់ជនសង្ស័យនៅចុងភូមិកើតហេតុ ទើបប្រញ៉ាប់រត់មកប្រាប់ជនរងគ្រោះ ភ្លាមនោះជនរងគ្រោះបានរាយការណ៍ ប្រាប់សមត្ថកិច្ចប៉ុស្តិ៍នគរបាលច្បារអំពៅ២ ចេញជួយអន្តរាគមន៍ និងឃាត់ខ្លួនជនសង្ស័យនៅមុខផ្ទះរបស់ជនសង្ស័យតែម្ដង ចំណុចមុខផ្ទះគ្មានលេខ ផ្លូវបេតុងចុងភូមិ ស្ថិតក្នុងសង្កាត់ច្បារអំពៅ២ រួចយកមកសួរនាំនៅប៉ុស្តិ៍តែម្តង។

ចំណែកម៉ូតូជនរងគ្រោះ បានយកទៅបញ្ចាំនៅហាងទទួលបញ្ចាំមួយកន្លែង ស្ថិតក្នុងសង្កាត់ច្បារអំពៅទី២ បានលុយចំនួន២០០ដុល្លារ រួចក៏យកលុយមួយចំនួនទៅទិញថ្នាំជក់។ ជនសង្ស័យរួមនិងវត្ថុតាង ត្រូវបានសមត្ថកិច្ចប៉ុស្តិ៍ធ្វើការឃាត់ខ្លួនសួរនាំ កសាងសំណុំរឿងបញ្ជូនទៅអធិការដ្ឋាននគរបាលខណ្ឌច្បារអំពៅ ដើម្បីចាត់ការបន្តតាមនីតិវិធី ៕