ភ្នំពេញ៖ កាលពីវេលា​ម៉ោង២១ និង​៣០នាទី នៅថ្ងៃ​ទី៣១ ខែតុលា ឆ្នាំ២០១៨ ស្ថិតនៅក្នុងភូមិទ្រុងមាន់ សង្កាត់អូរបែកក្អម ខណ្ឌសែនសុខ ជនសង្ស័យម្នាក់ ត្រូវសមត្ថកិច្ចឃាត់ខ្លួន ករណីលួចម៉ូតូមន្ត្រីយោធា នៅខណ្ឌសែនសុខ។ 

ជន​សង្ស័យម្នាក់មានឈ្មោះ ព្រំ ពិសិដ្ឋ ភេទប្រុស អាយុ២០ឆ្នាំ ជនជាតិខ្មែរ មុខរបរបមិន​ពិតប្រាកដ ស្នាក់នៅបន្ទប់ជួល ផ្លូវលំ ភូមិទំនប់ សង្កាត់ភ្នំពេញថ្មី ខណ្ឌសែនសុខ ។ 

រីឯជនរងគ្រោះមានឈ្មោះឈ្មោះ កែវ សំណាង ភេទប្រុស អាយុ៤១ឆ្នាំ ជនជាតិខ្មែរមុខរបរបយោធា ស្នាក់នៅផ្ទះលេខ៣០៣ ផ្លូវលំ ភូមិទ្រុងមាន់ សង្កាត់អូរបែកក្អម ខណ្ឌសែនសុខ ។ វត្ថុតាងដកហូតបានមាន ៖ ម៉ូតូ១គ្រឿង ម៉ាកធូដេរ ពណ៌ប្រផេះ គ្មានស្លាកលេខ ។

សមត្ថកិច្ចបានប្រាប់ឲ្យដឹងថា នៅមុនពេល​កើតហេតុ ជនរងគ្រោះ បានជិះម៉ូតូ​របស់ខ្លួន​ចេញពី​ធ្វើការ លុះមក​ដល់ផ្ទះ បានទុក​ម៉ូតូរបស់​ខ្លួននៅមុខ​ផ្ទះតែពុំបាន​ដកសោរម៉ូតូ រួចបានដើរ​ចូលទៅ​ក្នុងផ្ទះ ស្រាប់​តែឮសំឡេង​វ៉ៃខចន្ទុលម៉ូតូ ហើយ​បានចេញ​មកមើល​ឃើញ ជនសង្ស័យ​កំពុង​ឡើងជិះម៉ូតូ​របស់ខ្លួន ក៏បានចាប់​ខ្លួនជន​សង្ស័យ​ប្រគល់ឲ្យ សមត្ថកិច្ច​ប៉ុស្តិ៍រដ្ឋបាល​អូរបែកក្អម​ធ្វើការសួរនាំ ។ 

ជនសង្ស័យខាងលើសមត្ថកិច្ច ឃាត់​ខ្លួននៅ​អធិការដ្ឋាន​ នគរបាល​ខណ្ឌសែនសុខ ដើម្បីអនុវ​ត្តតាមនិតិវិធី ៕

ដោយ៖ ភត្ត្រា