ភ្នំពេញៈ កាលពីថ្ងៃទី១៤ ខែវិច្ឆិកា ឆ្នាំ២០១៨ម្សិលមិញនេះ កម្លាំងនគរបាលប៉ុស្តិ៍បឹងព្រលឹត ខណ្ឌ៧មករា បានធ្វើការឃាត់ខ្លួនបុរសជនជាតិអាល្លឺម៉ង់ម្នាក់ មានឈ្មោះ HAGEN KIENZ ភេទប្រុស អាយុ៥៤ឆ្នាំ ជនជាតិអាល្លឺម៉ង់។ បន្ទាប់ពីឃើញដេកនៅតាមផ្លូវសាធារណៈ ត្រង់ចំណុចមុខស្ថានទូតអាល្លឺម៉ង់ និងគ្មានលិខិតឆ្លងដែនជាប់ខ្លួននោះទេ ហើយបានប្រគល់ជូនការិយាល័យស៊ើបអង្កេត និងអនុវត្តនីតិវិធី ផែនការងារអន្តោប្រវេសន៍ នៃស្នងការដ្ឋាននគរបាលរាជធានីភ្នំពេញ ដើម្បីធ្វើការសាកសួរបន្ត។
ជនបរទេសរូបនេះ ចូលមកប្រទេសកម្ពុជា កាលពីថ្ងៃទី១៨ ខែមេសា ឆ្នាំ២០១៨ តាមច្រកព្រលានយន្តហោះអន្តរជាតិភ្នំពេញ និងគោលបំណងទេសចរណ៍។ បើតាមការសាកសួរ បានអោយដឹងថា រយៈកាលដែលមកស្នាក់នៅប្រទេសកម្ពុជា គ្មានលុយ និងទីកន្លែងស្នាក់នៅមិនពិតប្រាកដ ដើរដេកតាមទីសាធារណៈ និងគ្មានលិខិតឆ្លងដែន ជាប់ខ្លួននោះទេ។ ជនបរទេសដែលដើរដេកតាមផ្លូវសាធារណៈនេះ ត្រូវបានឃាត់ខ្លួនបញ្ជូនទៅអគ្គនាយកដ្ឋានអន្តោប្រវេសន៍ ដើម្បីអនុវត្តតាមនីតិវិធីច្បាប់៕