បន្ទាយមានជ័យៈ កាលពីវេលាម៉ោង៨យប់ ថ្ងៃទី២៥ ខែធ្នូ ឆ្នាំ២០១៨ នៅភូមិពន្លៃថ្មី ឃុំទ្រាស ស្រុកស្វាយចេក ខេត្តបន្ទាយមានជ័យ។ មានហេតុការណ៏ភ្ញាក់ផ្អើលមួយ ដោយផ្ទះឈើមួយខ្នង ដែលមានទំហំ៨ម៉ែត្រគុណ១៤ម៉ែត្រ កម្ពស់៨ម៉ែត្រ ប្រក់សង្ហ័សី ខាងលើឈើខាងក្រោមរៀបឥដ្ឋ ត្រូវបានអគ្គិភ័យឆាបឆេះខ្ទេចគ្មានសល់។
លោកវរសេនីយ៍ឯកជា ស្លូញ អធិការនគរបាល ស្រុកស្វាយចេកបានឲ្យដឹងថា ម្ចាស់ផ្ទះឈ្មោះ សុខ សុផល ជាប្ដី អាយុ៦៤ឆ្នាំ ប្រពន្ធឈ្មោះ ដាត់ រៀម អាយុ៥៩ឆ្នាំ បន្ទុកគ្រួសារចំនួន០៦នាក់ ស្រី០៣នាក់ រស់នៅភូមិពន្នៃថ្មី ឃុំទ្រាស ស្រុកស្វាយចេក ខេត្ដបន្ទាយមានជ័យ។ តាមការរៀបរាប់បំភ្លឺពីម្ចាស់ផ្ទះបានឲ្យដឹងថា នៅយប់ថ្ងៃកើតហេតុគាត់នៅផ្ទះម្នាក់ឯង កូនៗចំនួន៤នាក់ទៅធ្វើការនៅប្រទេសថៃអស់ ចំណែកប្តីរបស់គាត់ទៅព្យាបាលជម្ងឺពោះវៀនដុះខ្នែងនៅឯភ្នំពេញ។ ហើយនៅថ្ងៃទី២៦ ខែធ្នូ ឆ្នាំ២០១៨នេះ គ្រូពេទ្យនឹងត្រូវធ្វើការវះកាត់ ហើយប្តីគាត់បានឡើងទៅលើផ្ទះអុជធូបនៅលើហឹងបន់ស្រន់ជីដូនជីតា ឲ្យជួយពេលវះកាត់កុំឲ្យមានគ្រោះថ្នាក់អ្វី។
ក្រោយពីអុជរួច បានចុះមកដេកនៅក្រោមផ្ទះកំពុងតែដេកលង់លក់មួយភ្លេតក៏ ស្រាប់តែលឺអ្នកជិតខាងស្រែកប្រាប់ថា មានភ្លើងឆេះផ្ទះគាត់ក្រោកមើលក៏ឃើញភ្លើងឆេះសន្ធោសន្ធៅ។ ក្នុងនោះប្រជាពលរដ្ឋនៅក្នុងភូមិ និងរថយន្តពន្លត់អគ្គិភ័យរបស់អធិការដ្ឋាននគរបាលស្រុក ចុះជួយធ្វើអន្តរាគមន៍ជួយពន្លត់ តែមិនអាចជួយបាន ព្រោះភ្លើងបានឆេះសន្ធោរសន្ធៅ ម្យ៉ាងវិញផ្លូវឆ្ងាយទម្រាំរថយន្តពន្លត់អគ្គិភ័យទៅដល់បានបាញ់ទឹកអស់ចំនួន៤ឡាន។ តែទោះបីជាការជួយអន្តរាគមន៍នេះ មិនទាន់ពេលវេលា ក៏យើងបានទប់ស្កាត់ភ្លើងកុំឲ្យឆាបឆេះរាលដាលទៅផ្ទះអ្នកជិតខាង។
ជាមួយគ្នានោះដែរ បានរកឃើញសម្ភារៈគ្រឿងអលង្ការមួយចំនួន ទាំងយប់មាន ជញ្ជៀនមាស៣វង់ ក្រវិលមាស១គូ ខ្សែដៃមាស១ខ្សែ ខ្សែកមាស១ខ្សែ ឡត៣ដើម គ្រាប់ក្រខូប១គ្រាប់ ប្រគល់ជូនម្ចាស់ផ្ទះវិញ។ ជាមួយគ្នានោះដែរ លោកអធិការនគរបាលស្រុកលោកវរសេនីយ៍ឯកជា ស្លូញ បានផ្តាំផ្ញើដល់បងប្អូនប្រជាពលរដ្ឋទាំងអស់ សូមមេត្តាប្រុងប្រយ័ត្ន ចំពោះបញ្ហាអគ្គិភ័យ ព្រោះនេះជារដូវក្តៅហួតហែង ងាយនឹងកើតមានអគ្គិភ័យណាស់ ៕
