ខេត្តកំពង់ស្ពឺ៖ បុរសម្នាក់ត្រូវបានប្រពន្ឋកាប់មួយកាំបិតចំកញ្ចឹងកខាងឆ្វេង បណ្តាលឱ្យស្លាប់នៅនឹងកន្លែង កាលពីល្ងាចថ្ងៃទី២៥ ខែសីហា ឆ្នាំ២០១៩ ស្ថិតនៅភូមិទី១ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ ។
ជនសង្ស័យឈ្មោះ លុយ អេង អាយុ៤៩ឆ្នាំ រស់នៅភូមិទី១ ឃុំត្រែងត្រយឹង និងជនរងគ្រោះឈ្មោះ សៅ ប៊ុនធឿន អាយុ៤៧ឆ្នាំ ត្រូវជាប្តី រស់នៅភូមិជាមួយគ្នា។
ប្រភពព័ត៌មានបានឲ្យដឹងថា មុនពេលកើតហេតុ ប្តីប្រពន្ធខាងលើបានឈ្លោះប្រកែកគ្នាខ្លាំងៗ បន្ទាប់មកស្រាប់តែស្ត្រីជាប្រពន្ធបានទាញកាំបិតផ្គាក់កាប់ទៅលើប្តីចំថ្ពាល់ខាងឆ្វេង បណ្តាលឲ្យស្លាប់ភ្លាមៗតែម្ដង។
ស្ត្រីជនសង្ស័យខាងលើត្រូវបាននគរបាលឃាត់ខ្លួន នាំទៅកាន់អធិការដ្ឋាននគរបាលស្រុកដើម្បីសាកសួរ ហើយជនសង្ស័យបានសារភាពថា ខ្លួនពិតជាបានយកកាំបិតផ្គាក់កាប់ទៅលើជនរងគ្រោះប្រាកដមែន ដោយសារភ្លើងប្រច័ណ្ឌ។
បច្ចុប្បន្នជនសង្ស័យខាងលើ រួមទាំងវត្ថុតាង ត្រូវនគរបាលកសាងសំណុំរឿងបញ្ជូនទៅស្នងការដ្ឋាននគរបាលខេត្តកំពង់ស្ពឺ ដើម្បីចាត់ការតាមនិតិវិធី៕
