សេអ៊ូល៖ ប្រធានាធិបតីកូរ៉េខាងត្បូងលោក Moon Jae-in បានទទួលការចាក់វ៉ាក់សាំងការពារជំងឺកូវីដ១៩ របស់ AstraZeneca កាលពីថ្ងៃអង្គារ (២៣ មីនា) មុនពេលធ្វើដំណើរទៅក្រៅប្រទេស ។ ខណៈប្រទេសនេះចាប់ផ្តើមប្រមូលផ្តុំប្រជាជនវ័យចំណាស់និងបុគ្គលិកសុខាភិបាលបន្ថែមទៀតក្នុងគោលបំណងបង្កើនល្បឿនចាក់វ៉ាក់សាំង។

លោកមូនអាយុ ៦៨ ឆ្នាំត្រូវបានទទួលនូវការចាក់វ៉ាក់សាំងពីគ្លីនិកសហគមន៍មួយនៅជិតការិយាល័យរបស់គាត់នៅទីក្រុងសេអ៊ូលដើម្បីរៀបចំសម្រាប់ដំណើរទស្សនកិច្ចដែលបានគ្រោងទុកនៅចក្រភពអង់គ្លេសសម្រាប់កិច្ចប្រជុំកំពូលនៃក្រុមប្រទេសទាំង៧ (G7) នៅក្នុងខែមិថុនា។

ការិយាល័យរបស់លោកបាននិយាយនៅក្នុងសេចក្តីថ្លែងការណ៍មួយថាភរិយារបស់លោកមូននិងជំនួយការ ៩ នាក់ដែលនឹងអមដំណើរលោកក្នុងដំណើររួមទាំងទីប្រឹក្សាសន្តិសុខជាតិលោកស៊ូហុនក៏ត្រូវបានគេចាក់វ៉ាក់សាំងផងដែរ។

នាយករដ្ឋមន្រ្តីអង់គ្លេសលោក Boris Johnson បានអញ្ជើញប្រទេសកូរ៉េខាងត្បូង ឥណ្ឌា និងអូស្ត្រាលី ចូលរួមក្នុងកិច្ចប្រជុំកំពូលនេះក្នុងនាមជាភ្ញៀវ។

រដ្ឋាភិបាលកូរ៉េខាងត្បូងនៅថ្ងៃអង្គារនេះបានចាប់ផ្តើមប្រមូលផ្តុំមនុស្សជិត ៣០០.០០០ នាក់នៅមន្ទីរពេទ្យថែទាំនិងមណ្ឌលថែទាំចាស់ជរាដែលមានអាយុ ៦៥ ឆ្នាំឬចាស់ជាងនេះនិងបុគ្គលិកពេទ្យនៅទីនោះ នៅពេលកំពុងតែបង្កើនការចាក់វ៉ាក់សាំងជូនប្រជាជនរបស់ខ្លួន។

សម្រួលអត្ថបទដោយ៖ SP

ប្រភព៖ CNA