កាលពីព្រឹកថ្ងៃទី 13 សីហា 2023 អ្នកប្រេីប្រាស់បណ្ដាញសង្គមកម្ពុជា ផ្ទុះការចាប់អារម្មណ៍ជាថ្មីលើវីដេអូឃ្លីបរបស់នាយ ធុង នាយ ស្មាច់ និងនាយឆាង ដោយមានផេកបរទេសយកទៅ React ជាបន្តបន្ទាប់ ក្រោយពួកគាត់បានសម្តែងជាមួយគ្នា ជាច្រើនឃ្លីបនាពេលកន្លងមកនេះ។

កាលពីពេលថ្មីៗនេះ ផេកហ្វេកប៊ុក Chitra rin - រិន ចិត្រា បានបង្ហោះវីដេអូឃ្លីប នាយ ធុង នាយ ស្មាច់ និងនាយឆាង ពីសកម្មភាពចូលរថយន្ត Prius ដែលជាការថតសម្តែង ក៏មានផេកបរទេសមួយឈ្មោះ Kuya Isaac Sabaw បានធ្វើការ Reaction ដោយមានអ្នកទស្សនា ៥០លាននាក់ត្រឹមរយៈពេលមួយថ្ងៃប៉ុណ្ណោះ រហូតមកដល់ព្រឹកថ្ងៃទី 14 សីហា 2023 នេះ អ្នកទស្សនាកេីនឡេីងដល់ទៅជាង 65លានដង ធ្វេីឲ្យក្រុមសម្តែងទាំង ៣ដួងនេះ កាន់តែមានគេស្គាល់ច្រើន តាមរយៈរូបរាងកាយដ៏ត្រលុកត្រលន់របស់ពួកលោក។

ក្នុងនោះផងដែរ តាមរយៈក្រុមកំប្លែងទាំង ៣ដួងនេះ បងប្អូនមហាជនអាចនឹងស្គាល់ពួកលោកច្រើន តាមរយៈរូបរាងកាយធំប្លែកដាច់គេ ពោលគឺរូបរាងនេះហើយ ជាភាពទាក់ទាញរបស់លោក ក៏ដូចជាការចាប់អារម្មណ៍ពីសំណាក់មហាជនទាំងក្នុងស្រុក និងក្រៅស្រុក។

ជាការពិតណាស់ ក្រុមសម្តែង នាយ ធុង នាយ ស្មាច់ និងនាយឆាង ហាក់កាន់តែទទួលបានការគាំទ្រខ្លាំងជាមួយរូបរាងកាយរបស់ខ្លួន ដោយអោយពួកគេទាំងបីនាក់បានជួបគ្នា ដឹងតែផ្ទុះសំណើចតែម្តង ដោយសូម្បីតែបរទេសក៏មានការចាប់អារម្មណ៍ខ្លាំងដែរ គឺចាប់តាំងពីពួកគាត់បានចាប់ក្រុមសម្តែងជាមួយគ្នា តាមរយៈវីដេអូសម្តែងជាច្រើនកន្លងមក។

តារាកំប្លែងនាយធុងបានអោយ Khmer TV ដឹងថានាពេលបច្ចុប្បន្ននេះ លោកមានមានអាយុ ២៧ឆ្នាំហេីយ និងមានគីឡូ ២២០ គីឡូ ចំណែកនាយស្មាច់មានអាយុអាយុ ៤៦ឆ្នាំ និងមានទម្ងន់ ៣៤០គីឡូ និងចុងក្រោយ នាយ ឆាង មានអាយុទើបតែ ២៣ឆ្នាំ មានទម្ងន់រហូតដល់ទៅ ២១០គីឡូ។

ប្រាកដណាស់ បើគិតត្រួសពីគីឡូរបស់ តារាកំប្លែងទាំងបីដួងនេះ បើបូកបញ្ចូលគ្នាទាំងបីនាក់ មានទម្ងន់ ដល់ ៧៧០គីឡូ គឺជិត១តោនបាត់ទៅហើយ។

បើងាកមកអាជីពសិល្បៈរបស់តារាកំប្លែងនាយ ធុងវិញ លោកបាននិយាយថាខ្លួនដូចជាមានការមមាញឹកខ្លាំង ដោយក្នុងមួយខែៗ មានការសម្តែងជាហូរហែរពុំដាច់សូរនោះឡើយ។

រីឯតារាកំប្លែងចំនួនពីរដួងទៀត ដែលទើបនឹងរះមកថ្មីៗនេះ មានដូចជា នាយស្មាច់ និងនាយឆាង ក៏មានការសម្តែងជាហូរហែរ ក្រោយការសម្តែងរបស់ពួកលោក មានមហាជនគាំទ្រ និងចូលចិត្តច្រើន។

គួរបញ្ជាក់ដែលថា តារាកំប្លែងដែលមានមាឌធំដាច់គេនេះ មានការ React ពីបរទេសច្រើនទាក់ទងនឹងរូបរាងកាយនេះ ដូចជាកាលពីកន្លងទៅមានដូចជាខាងប្រទេសថៃ អារ៉ាប់ និងប្រទេសផ្សេងៗទៀត ដែលតែងតែយកទៅត្រូលផងដែរ៕