ដូចដែលប្រិយមិត្តបានជ្រាបហើយថា នៅកាលពីពេលថ្មីៗនេះ លោក ញ៉ែម សំអឿន អភិបាលខេត្តរតនគិរីបានដាក់បញ្ជាឲ្យមន្រ្តីថ្នាក់ក្រោមរៀបចំសណ្តាប់ធ្នាប់សាធារណៈតាមភូមិ ឃុំ ស្រុក ខេត្ត ទៅលើការចិញ្ចឹមសត្វសុនខ«ឆ្កែ» ត្រូវកត់ត្រាសម្គាល់ នឹងរៀបតារាងបញ្ជីឈ្មោះឲ្យបានត្រឹមត្រូវ «តើផ្ទះទីប៉ុន្មាន ចិញ្ចឹមឆ្កែប៉ុន្មានក្បាល ឆ្កែមានឈ្មោះអី ហើយអាយុប៉ុន្មាន ដែលមានប្រវត្តិធ្លាប់ខាំគេទេ មានប្រវត្តិធ្លាប់ឡានប៉ះប៉ុន្មានដង ម៉ូតូបុកប៉ុន្មានដង ធ្លាប់បាក់ជើងយ៉ាងម៉េច ត្រូវរៀបរាប់ឲ្យអស់អ្នកដែលមានផ្ទះជាប់ផ្លូវហើយកំពុងតែចិញ្ចឹមសត្វសុនខ» ។
យ៉ាងណាមិញលោកអភិបាលនៃគណៈអភិបាលខេត្តរតនគិរី ធ្វើបែបនេះគ្រាន់តែចង់ឲ្យមានសណ្តាប់ធ្នាប់សាធារណៈ សុវត្ថិភាព ជូនប្រជាពលរដ្ឋក្នុងការធ្វើដំណើរតាមដងផ្លូវ ដើម្បីកុំឲ្យមានគ្រោះថ្នាក់ចរាចរណ៍ នឹងបង្កស្នាមរបួសដល់អ្នកដ៏ទៃនោះទេ។
ទន្ទឹមគ្នានេះដែរក្រោយឃើញចំណាត់ការរបស់លោកអភិបាលខេត្តរតនគិរីហើយ ស្រាប់តែលោក ផែង វណ្ណះ ពោលពាក្យដូច្នេះថា ៖ « ឆ្កែតូចចិត្តអង្គុយសម្រក់ទឹកភ្នែក ខណៈមនុស្សលោកបង្ករកំហុសលេីដងផ្លូវ ជាពិសេសមនុស្សមួយចំនួន បេីកបរមិនគោរពច្បាប់ បង្ករគ្រោះថ្នាក់ចរាចរណ៍ ស្លាប់រាល់ថ្ងៃមិនបន្ទោសមនុស្ស មិនអប់រំមនុស្សអោយគោរពច្បាប់ បែជាមកបន្ទោសតែឆ្កែ ?តេីឆ្កែចាំតែខុសរហូតឬ ? Sad » ។
លោកបានបង្ហោះសារបន្តទៀតថា ៖ «រឿងសំខាន់ដែលត្រូវធ្វេីគឺខិតខំបង្ក្រាបបទល្មើសគ្រឿងញៀន ល្បែងស៊ីសង បងតូចបងធំ ក្នុងមូលដ្ឋាន មិនមែនមកឈ្លោះជាមួយឆ្កែទេ » ។
បន្ទាប់ពីបានឃើញលោក ផែង វណ្ណះ បង្ហោះដូច្នេះលោក ញ៉ែម សំអឿន អភិបាលខេត្តរតនគិរី បានចូលទៅធ្វើការ comment នៅក្នុងផុសនោះដូច្នេះថា ៖ « លោកជាមនុស្សសំណាងម្នាក់ដែលមិនទាន់ឆ្កែខាំ ឬបុកឆ្កែរបួស នេះមិននិយាយដល់គ្រោះថ្នាក់ពិការ ឬស្លាប់ផង និងមានរឿងច្រើនទៀតដូចក្នុងខំមិនបងប្អូន។
ខ្ញុំនិយាយលើកយកប្រធានបទៈ “ត្រូវមានទំនួលខុសត្រូវចំពោះសត្វចិញ្ចឹមរបស់ខ្លួន” មិនមែនរឿងគ្រឿងញៀន ឬបងតូចបងធំទេ ។ សូមជូនពរលោក ឬសាច់ឈាមលោកកុំឲ្យជួបរឿងអកុសលនេះ ! » ។
ក្រោយឃើញលោកអភិបាលខេត្តចូល comment នៅក្នុងផុសរបស់ខ្លួនបែបនេះ លោក ផែង វណ្ណះ ឆ្លើយតបវិញភ្លែតបែបនេះថា ៖« បាទបង អ្នកខ្លះហូបតែសាច់ឆ្កែទេ តែសំដែងក្នុង ហ្វេសប៊ុក ធ្វើដូចស្អប់ឆ្កែណាស់ ។ ខ្ញុំ អរគុណឆ្កែហេីយ ដែលឆ្កែធ្វើអោយបងឈឺចាប់ ចាប់ផ្តើមភ្ញាក់រលឹក មានចំណាត់ការ និងគោលការណ៍គ្រប់គ្រងឆ្កែ បន្ទាប់ពីបង បេីកបេីកបរ ធ្វេសប្រហែសបុកឆ្កែបង្ករអោយខូចរថយន្តរបស់បង ។ បេីបងគ្មានជួបហេតុការនេះ វិធានការគ្រប់គ្រងឆ្កែប្រហែលជាបងនឹកមិនឃេីញទេ »៕
