សម្តេចនាយករដ្ឋមន្ត្រី ហ៊ុន ម៉ាណែត នៅថ្ងៃទី4 ខែមេសា នេះបានអំពាវនាវឱ្យរដ្ឋាភិបាលសហរដ្ឋអាមេរិក ពិចារណាពន្យាពេលអនុវត្តអត្រាពន្ធគយចំនួន 49% ដែលអាមេរិកបានដាក់លើទំនិញរបស់កម្ពុជា។ ជាថ្នូរ កម្ពុជានឹងបញ្ចុះអត្រាពន្ធគយលើទំនិញអាមេរិកមកនៅត្រឹម 5%។

ក្នុងលិខិតផ្ញើរទៅ លោក Donald Trump នារាត្រីនេះ សម្តេចនាយករដ្ឋមន្ត្រី មានប្រសាសន៍ថា “ក្នុងស្មារតីនៃការពង្រឹងទំនាក់ទំនងពាណិជ្ជកម្មទ្វេភាគីរបស់យើង កម្ពុជាប្តេជ្ញាលើកកម្ពស់ការនាំចូលផលិតផលដែលមានមូលដ្ឋាននៅសហរដ្ឋអាមេរិក ជាមួយនឹងការកាត់បន្ថយជាបន្ទាន់នូវអត្រាពន្ធគយសម្រាប់ផលិតផលចំនួន 19 ប្រភេទ ពីអត្រាពន្ធអតិបរមា 35% មកនៅត្រឹម 5%”។

សម្តេច ហ៊ុន ម៉ាណែត បានស្នើរសុំការចរចាក្នុងពេលវេលាសមស្របដែលអាចធ្វើទៅបានឆាប់បំផុត។

លោក Donald Trump បានដាក់សម្ពាធពន្ធគយលើទំនិញរបស់កម្ពុជាចំនួន 49% ដែលខ្ពស់ជាងគេក្នុងចំណោមប្រទេសសមាជិកអាស៊ាន។ នៅព្រឹកថ្ងៃសុក្រនេះ លោក Trump បានប្រាប់អ្នកសារព័ត៌មានថា លោកបើកទទួលកិច្ចចរចាជាមួយគ្រប់ប្រទេស ប្រសិនបើប្រទេសទាំងនោះមានអ្វីដែលល្អឲ្យអាមេរិក៕