ចេះតែឆ្ងល់ឮសំឡេងចេញពីក្រោមដី ដល់ពេលជីកគាស់ ៦ម៉ោង ទើបឃើញការពិត - សង្គម សិល្បៈ កម្សាន្ដ - Khmer News - The latest Cambodia News. Khmer Times is the region's fastest growing newspaper with daily insights into Cambodia and ASEAN

ចេះតែឆ្ងល់ឮសំឡេងចេញពីក្រោមដី ដល់ពេលជីកគាស់ ៦ម៉ោង ទើបឃើញការពិត

មានរឿងរ៉ាវដែលយើងមិននឹកស្មានជាច្រើន តែងតែកើតឡើងគ្រប់ពេល និងគ្រប់ទីកន្លែងជុំវិញខ្លួនយើង ខ្លះជារឿងល្អ ខ្លះជារឿងគួរឲ្យអាណិតអាសូរ ឯខ្លះជារឿងរន្ធត់តក់ស្លុតមិននឹកស្មានជាដើម។

ចំណែកហេតុការណ៍ខាងក្រោមនេះវិញ ជារឿងគួរឲ្យងឿងឆ្ងល់បំផុតមួយដែលគេបានឮសំឡេងង៉ូវៗចេញពីក្រោមកម្រាលកៅស៊ូដ៏ជ្រៅនៃកន្លែងចតរថយន្តមួយស្ថិតសង្កាត់ Dorney ទីក្រុង Buckinghamshire ប្រទេសអង់គ្លេស។ រហូតមានការជួលបុគ្គលិកជំនាញចំនួន ៦នាក់ឲ្យគាស់មើល ប្រដាប់ដោយកូនអេស្កាវ៉ាទ័រ ម៉ាស៊ីនកាត់ដែក និងប៉ែលជាដើម។

បន្ទាប់ពីកាត់គាស់រយៈពេលជាង ៦ ម៉ោងទើបគេដឹងថា សំឡេងនោះជាសំឡេងរបស់សុនខកម្សត់មួយក្បាលដែលបានជាប់នៅក្នុងបំពង់ក្រោមដីប្រមាណ ៤ថ្ងៃឯណោះ។ អ្នកទូរសព្ទហៅក្រុមសង្គ្រោះនោះ គឺជាម្ចាស់ឆ្កែដែលជាប់តែម្ដង។ ដំបូងពួកគេគិតថា ស្ត្រីជាម្ចាស់ឆ្កែនេះឆ្កួតហើយ ព្រោះអ្នកស្រីគិតថា មានសុនខនៅក្រោមដីដែលមិនមានប្រឡោះណាមួយអាចចូលរួចបាន។

បន្ទាប់ពីកាត់កម្រាស់កៅស៊ូរួចរាល់ អ្នកសង្គ្រោះបានប្រើអេស្កាវ៉ាទ័រ ជីកកាយដល់បំពង់ទុយោ រួចប្រើម៉ាស៊ីនកាត់បំពង់ទុយោតែម្ដង។ ក្រោយកាត់រួចពួកគេក៏ឃើញកូនសុនខស្គមកំព្រឹងមួយក្បាលស្ថិតក្នុងបំពង់ទុយោធំទាំងសភាពភ័យតក់ស្លុត រួចពួកគេបានលូនចូលទៅចាប់តែម្ដង។

កូនឆ្កែញីនេះត្រូវម្ចាស់វាដាក់ឈ្មោះថា លូលូ បានបាត់ពីផ្ទះជាច្រើនថ្ងៃហើយ។ អ្នកសង្គ្រោះបានសន្និដ្ឋានថា កូនឆ្កែនេះអាចបន្តជីវិតរស់នៅបានដោយសារវាផឹកដំណក់ទឹកនៅជាប់តាមបាតទុយោ។ ទោះយ៉ាងណាទាំងម្ចាស់ ទាំងក្រុមសង្គ្រោះនៅមិនទាន់ដឹងថា កូនឆ្កែនេះចូលទៅក្នុងទុយោតាមរបៀបណានោះទេ៕