ភ្នំពេញ៖ យុវជនម្នាក់រួមនិងគ្នីគ្នាប្រមាណជា១០នាក់ទៀត​ កាន់ដោយអាវុធគ្រប់ដៃ មានទាំងដាវ និង បំពង់ទីប សម្រុកចូលប៉ងកាប់សម្លាប់មនុស្សពីរនាក់ ឪពុក និង​កូន ​ដែល​យល់ច្រឡំ​ថា​ជា​ម្ចាស់​ឆ្កែ ដែលបានខាំប្អូនរបស់ខ្លួន បណ្តាលឲ្យរងរបួសយ៉ាងធ្ងន់ធ្ងរ កាលពីយប់ថ្ងៃទី១៩ ខែឧសភា ឆ្នាំ២០១៨ នៅ​ចំណុច​ក្នុងផ្ទះ​ជនរងគ្រោះ ស្ថិតនៅ​ភូមិ​ជម្ពូ​វ័ន២ សង្កាត់​ចោមចៅ​ទី៣ ខណ្ឌ​ពោធិ៍​សែន​ជ័យ រាជធានី​ភ្នំពេញ។

បើតាមសម្តីរៀបរាប់របស់ជនសង្ស័យបានប្រាប់ថា កាលពី២ថ្ងៃមុន ប្អូនរបស់ខ្លួន និងប្អូនមិត្តភក្តិផ្សេងទៀតបានរត់លេង នៅមុខ​ផ្ទះ​របស់​ជនរងគ្រោះ​ ហើយក៏ត្រូវឆ្កែខាំ បណ្តាលឲ្យរងរបួសយ៉ាងធ្ងន់ធ្ងរ។ បន្ទាប់ពីឆ្កែខាំរួចហើយ ក្រុមជនសង្ស័យបានស្រែកប្រាប់ជនរងគ្រោះឲ្យមើលឆ្កែផង ស្រាប់តែពេលនោះជនរងគ្រោះបានស្រែកថា មិនមែនឆ្កែខ្លួននោះទេ បន្ទាប់មក​ភាគី​ទាំង២ ក៏បាន​ឈ្លោះប្រកែក​គ្នា​មួយស្របក់ បន្ទាប់មក​នោះ​ម្តាយ​ក្មេង​របស់​ភាគី ខាង​រងគ្រោះ​បាន​ឆ្លើយថា កុំឱ្យ​ពិបាក​ចាំ​ខ្ញុំ​ចេញថ្លៃ​ព្យាបាល​ឱ្យ។ ខណៈ​ពេលនោះ​ក្រុម​ជនបង្ក បាន​ឆ្លើយថា (មិនបាច់​យកលុយ​មិនបាច់​អី​ទេ លេង​ចង់បាន​លុយ​ហើយ) លុះ​មកដល់​ម៉ោង​ថ្ងៃកើតហេតុ ខណៈដែល​ជនរងគ្រោះ​កំពុង​មើល​ទូរទស្សន៍​ស្រាប់តែ​ក្រុម​ជនបង្ក​បាន​ហៅ​បក្ខពួក​គ្នា​ជិត១០នាក់ ចូលទៅ​កាប់​ជនរងគ្រោះ​ទាំង២នាក់ ឪពុក និង​កូន​បណ្តាល​ឱ​រង​ធ្ងន់​តែម្តង។ ភ្លាមៗនោះ​ក្រុម​ជនបង្ក​ត្រូវ​នគរ​បាន​តាម​ចាប់​បានជា​បន្តបន្ទាប់​បាន​ចំនួន៥នាក់ និង​ដកហូត​បាន​វត្ថុតាង​មួយចំនួន​រួមមាន៖ កាំបិតប៉័ងតោ១ដើម, ដាវ១មួយ​ដើម ដែក​ទីប​មូល១ដើម, ម៉ូតូ​ជាប់​រទេះ​សម្រាប់​អូស​លក់ ដូរ១គ្រឿង។ សមត្ថកិច្ចបានឲ្យដឹងថា ជនដៃដល់​ទាំង៥នាក់​នោះ​រួមមាន​ទី១៖ ឈ្មោះ ថា​ញ់ ញ៉ ភេទ​ប្រុស អាយុ១៨ឆ្នាំ មុខរបរ​នៅផ្ទះ, ទី២៖ ឈ្មោះ គីម ជី ភេទ​ប្រុស អាយុ២៥ឆ្នាំ មុខរបរ​លក់​បុកល្ហុង, ទី៣៖ ឈ្មោះ សេង កាត់ ភេទ​ប្រុស អាយុ២៩ឆ្នាំ មុខរបរ​លក់​ប្រហិត «របួស​ពោះ​ខាងស្តាំ», ទី៤៖ ឈ្មោះ សេង ស៊ីថន ភេទ​ប្រុស អាយុ២៨ឆ្នាំ មុខរបរ​លក់​បបរ និង​ទី៥៖ ឈ្មោះ គីម យី ភេទ​ប្រុស អាយុ២១ឆ្នាំ មុខរបរ​លក់​បុកល្ហុង របួស​ដាច់​ម្រាមដៃ៣ខាងឆ្វេង រយៈ​ក្បាល កំពុង​សម្រាក​ព្យាបាល​នៅ​ពហុ​ព្យាបាល​ចោមចៅ ស្នាក់នៅ​ផ្ទះជួល​ភូមិ​ព្រៃ​ព្រីង​ខាងជើង សង្កាត់​ចោមចៅ​ទី៣ ខណ្ឌ​ពោធិ៍​សែន​ជ័យ។ ចំណែក​ជន​រង​ទាំងពីរ​នាក់​មានឈ្មោះ អ៊ឹម ចាន់ថន ភេទ​ប្រុស អាយុ៤៨ឆ្នាំ មុខរបរ​បើកបរ​រថ​យន្ត រីឯ​ឪពុក​របួស​ដៃ​ខាងស្តាំ៣កន្លែង រយះ​ម្រាមដៃ​ឆ្វេង និង​ឈ្មោះ អ៊ឹម ផានិត ភេទ​ប្រុស អាយុ២២ឆ្នាំ មុខរបរ​និស្សិត ត្រូវជា​កូន​របួស​ដាច់​ថ្ពាល់​ខាងឆ្វេង​ស្មា​ស្តាំ ប្រអប់ដៃ​ខាងឆ្វេង​ដៃ​ខាងស្តាំ២កន្លែង កំពុង​សម្រាក​ព្យាបាល​នៅ​ក្លីនិក​ឡាំ​ប៊ុនថន។ បច្ចុប្បន្នជនសង្ស័យត្រូវបានសមត្ថកិច្ច ចាប់បញ្ជូនខ្លួនទៅកាន់ អធិការដ្ឋាន រង់ចាំផ្តន្ទាទោសតាមច្បាប់៕ ដោយ ៖ វិសុទ្ធ