ភ្នំពេញ៖ ទីតាំងអុីនធ័រណេតបង្កប់ល្បែងសុីសងខុសច្បាប់គ្រប់ប្រភេទដែលជ្រកក្រោមស្លាកយីហោ អុី ម៉ាន់នី ជាច្រើនកន្លែងនៅក្នុងខណ្ឌចំកាមន មិនខ្លាចញញើតក្នុងការបើកទទួលអតិថិជនរបស់ខ្លួន​ ខណៈរដូវកាលវើលខាប់កំពុងដំណើរការ ព្រោះមានភ្លើងខៀវពីអាជ្ញាធរខណ្ឌដែលមានលោក ព្រុំ សំខាន់ ជាអភិបាលខណ្ឌ និងលោក យុិន សាន ជាអធិការខណ្ឌបើកដៃអោយលេងដែលផ្ទុយពីបទបញ្ជារបស់ថ្នាក់លើ។

ឯកឧត្ដម ឃួង ស្រេង អភិបាលនៃគណៈអភិបាលរាជធានីភ្នំពេញ បានក្រើនរំលឹកនិងដាក់បញ្ជាអោយអាជ្ញាធរពាក់ព័ន្ធគ្រប់បណ្ដាខណ្ឌទាំង១២ឲ្យយកចិត្តទុកដាក់ទប់ស្កាប់និងបង្ក្រាបអោយអស់នូល្បែងសុីសងគ្រប់ប្រភេទដែលមានក្នុងមូលដ្ឋានរបស់ខ្លួន តែផ្ទុយទៅវិញអជ្ញាធរខណ្ឌចំកាមនដែលមានលោក ព្រុំ សំខាន់ ជាអភិបាលខណ្ឌ និងលោក យុិន សាន ជាអធិការនគរបាលខណ្ឌ ហាក់ដូចជាប្រងើយកន្តើយមិនយកចិត្តទុកដាក់ក្នុងការបង្ក្រាបល្បែងសុីសង បែជាបណ្ដែតបណ្ដោយអោយទីតាំងទាំងនេះបើកលេងបានយ៉ាងរលូនទៅវិញ។ ទីតាំងដែលដាក់ស្លាកយីហោ អុី ម៉ាន់នី ហើយបង្កប់នូវល្បែងសុីសងទាំងនេះមាន. ទី១ តាមបណ្ដោយផ្លូវលេខ៤៣០ជិតប៉ុស្ដិ៍នគរបាលរដ្ឋបាលទំនប់ទឹក. ទី២ នៅតាមបណ្ដោយផ្លូវលេខ៤៨៨ ជិតសាលាប៊ែលធី ក្នុងសង្កាត់ផ្សារដើមថ្កូវ ទី៣ នៅតាមបណ្ដោយផ្លូវលេខ៣៦០ ជិតខារ៉ាអូខេ កូឡូស្យូល ទី៤ នៅតាមបណ្ដោយផ្លូវលេខ១៤៣ ជិតគីរីរម្យ និងទី៥ នៅតាមបណ្ដោយផ្លូវលេខ៤៣២ ក្នុងសង្កាត់បឹងត្របែក និងមានជាច្រើនកន្លែងទៀត។ ប្រជាពលរដ្ឋបានលើកឡើងថា ទីតាំងដែលបើកលេងល្បែងសុីសងខុសច្បាប់បានយ៉ាងរលូនបែបនេះ បើមិនមានការត្រូវរ៉ូវគ្នាពីអាជ្ញាធរនិងម្ចាស់ទីតាំងទេគឺមិនអាចបើកលេងបានយ៉ាងយូរដូចឆ្នេះទេ។ ប្រជាពលរដ្ឋសូមសំណូមពរដល់អជ្ញាធរពាក់ព័ន្ធគ្រប់លំដាប់ថ្នាក់ ជាពិសេសលោក ព្រុំ សំខាន់ ដែលអភិបាលខណ្ឌចំកាមន សូមមេត្តាចុះពិនិត្យមើលក្នុងមូលដ្ឋានរបស់ខ្លួនផងកុំអោយល្បែងសុីសងកើតមានច្រើនពេកព្រោះបទល្មើសកើតមានស្ទើរតែរាល់ថ្ងៃគឺកើតចេញពីល្បែងសុីសងទាំងនេះឯង។ គួរបញ្ជាក់ថា រដូវកាលវើលខាប់ទើបតែចាប់ផ្ដើមត្រឹមតែរយះពេលខ្លីប៉ុណ្ណោះ តែបទល្មើស លួច ឆក់ ប្លន់ ហាក់ដូចជាកក្រើកឡើងវិញស្ទើរជារាល់យប់នៅក្នុងរាជធានីភ្នំពេញ៕ ដោយ៖ ភារ៉ា