ឱសថគ្មានចុះបញ្ជីការ និងឱសថ ហាមលក់ ចំនួន០៦មុខ ស្មើនឹង៤០៩០គ្រាប់ មន្ទីរសុខាភិបាលខេត្តកំពង់ស្ពឺដកហូតបាន...

កំពង់ស្ពឺ ៖ កម្លាំងនគរបាលការិយាល័យប្រឆាំងបទល្មើសសេដ្ឋកិច្ច ដែលដឹកនាំដោយលោកវរសេនីយ៍ទោ ពីង ពៅ នាយការិយាល័យ បានសហការជាមួយមន្ទីរសុខាភិបាលខេត្តកំពង់ស្ពឺ ចុះពិនិត្យតាមបណ្តាគ្លីនិកឯកជន ចំនួន២៤កន្លែង នៅក្នុងស្រុកឧដុង្គ ក្នុងនោះមាន ចំនួន០២កន្លែង មិនមានច្បាប់អនុញ្ញាតិ ហើយក៏បានធ្វើការអប់រំណែនាំព្រមទាំងដកហូតយកថ្នាំពេទ្យមួយចំនួន និងណែនាំអោយម្ចាស់ឱសថស្ថាន ទៅធ្វើច្បាប់ អោយបានត្រឹមត្រូវនិងទទួលស្គាល់ពីមន្ទីរនិងក្រសួងសុខាភិបាល កាលពីព្រឹកថ្ងៃទី២១ ខែមិថុនា ឆ្នាំ២០១៨ ។

យោងតាមលោកវរសេនីយ៍ទោ ពីង ពៅ នាយការិយាល័យបាននិយាយអោយដឹងថា កម្លាំងចម្រុះគណៈកម្មការលប់បំបាត់ឱសថ ក្លែងក្លាយ និងសេវាសុខាភិបាលខុសច្បាប់ ដឹកនាំដោយលោកវេជ្ជៈបណ្ឌិត ជិន កែវសុវណ្ណ អនុប្រធានមន្ទីរសុខាភិបាល ខេត្តកំពង់ស្ពឺ វត្តមានចូលរួម លោកស្រីអភិបាលរងស្រុកឧដុង្គ តំណាងមន្ទីរសុខាភិបាលខេត្ត ការិ.នគរបាលប្រឆាំង សេដ្ឋកិច្ច តំណាងអាវុធហត្ថខេត្ត អាជ្ញាធរមូលដ្ឋាន បានចុះត្រួតពិនិត្យសេវាសុខាភិបាលគ្លីនិកឯកជនក្នុងស្រុកឧដុង្គ ខេត្តកំពង់ស្ពឺ បានចំនួន២៤កន្លែង ក្នុងនោះគ្មានលិខិតអនុញ្ញាត០២កន្លែង ដែលទី០១មានឈ្មោះ កុយ រីរិទ្ធិ ភេទស្រី អាយុ ៥៩ឆ្នាំ រស់នៅភូមិផ្សារបាត់ដឹង ឃុំក្សេមក្សាន្ត ស្រុកឧដុង្គ និងទី០២មាន-ឈ្មោះ នី សុភី ភេទប្រុស អាយុ ២៦ឆ្នាំ រស់នៅភូមិផ្សារបាត់ដឹង ឃុំក្សេមក្សាន្ត ស្រុកឧដុង្គ ។

បន្ទាប់មកកម្លាំងចម្រុះធ្វើការពិនិត្យរួចរាល់ដោយយកចិត្តទុកដាក់ ក្នុងនោះបានដកហូតឱសថគ្មានចុះបញ្ជីការ និងឱសថ ហាមលក់ ចំនួន០៦មុខ ស្មើនឹង៤០៩០គ្រាប់ផងដែរ។ ក្រោយមកជំនាញសុខាភិបាល បានធ្វើកិច្ចសន្យាអប់រំលក្ខណៈ បច្ចេកទេស និងអនាម័យក្នុងបន្ទុប់ថែទាំ ព្យាបាលជម្ងឺ ។ និងបានត្រួតពិនិត្យមុខឱសថ តាមឱសថស្ថាន និងកន្លែងថែទាំ ព្យាបាល ជំងឺ ។ បានពន្យល់ណែនាំរបៀបរបបថែទាំឱសថ និងលក្ខណៈបច្ចេកទេសអនាម័យក្នុងបន្ទុប់ថែទាំ ព្យាបាលជំងឺ ។