ភ្នំពេញ៖ កាលពីមួយរយៈពេលមុន ម្ចាស់ពានរង្វាន់លោកប៊ុត សីហា បានជួបរឿងរ៉ាវជាច្រើនជាប់គ្នាៗ បានធ្វើឲ្យលោកបាត់ឱកាសជាច្រើននៅក្នុងពិភពសិល្បៈចម្រៀង ទាំងក្នុងនឹងក្រៅប្រទេស​ផងដែរ។ ហើយកាលពីពេលថ្មីៗនេះ លោកក៏មានសំណាងម្តងទៀត ដោយរូបលោកក៏មានវត្តមាននៅលើឆាកតន្រ្តី លើកញ្ចក់ទូរទស្សន៍ជាថ្មី ជាហេតុធ្វើឲ្យអ្នកគាំទ្រជាច្រើនមានការសប្បាយចិត្តជំនួសលោក។ ស្របពេលនោះផងដែរ តារាចម្រៀងរូបនេះ បានបង្ហាញអារម្មណ៍សប្បាយរីករាយជាខ្លាំងនៅលើបណ្តាញសង្គមរបស់លោកថា "ទាំងពីរ បទនេះសូមផ្ញើជូន ពុកម៉ែបងប្អូនទាំងអស់គ្នាស្តាប់កំសាន្ត ទាំងក្នុង និងក្រៅប្រទេស អរគុណយ៉ាងខ្លាំងទៅដល់បង (គួច ខេវិន) ដែលបានអញ្ជើញខ្ញុំបាទទៅច្រៀងគ្រប់កម្មវិធី ជាពិសេសនោះ អគុណដល់ PNN TV Cambodia នឹង ក្រុមការងារទាំងអស់ដែលទទួលស្វាគមន៍ខ្ញុំយ៉ាងល្អ ពីខ្ញុំបាទ(ប៊ុត សីហា)"។