លោក សាយ សំអាល់ រដ្ឋមន្ត្រីក្រសួងបរិស្ថាន បានចាត់ទុកអ្នករើសអេតចាយជាមិត្ត ជាដៃគូដ៏ល្អបំផុត ជាមួយក្រសួង ក្នុងការងារលើកកម្ពស់ បរិស្ថានជាតិ

ភ្នំពេញ ៖ រដ្ឋមន្ត្រីក្រសួងបរិស្ថានលោក សាយ សំអាល់ បានចាត់ទុកអ្នករើសអេតចាយជាមិត្ត ជាដៃគូដ៏ល្អបំផុត ជាមួយក្រសួងក្នុងការងារលើកកម្ពស់បរិស្ថានជាតិ ព្រោះគាត់បានជួយដើរប្រមូលយកកាកសំណល់បម្រើឲ្យសិប្បកម្ម ឧស្សាហកម្មកែច្នៃជាសម្ភារៈប្រើប្រាស់ប្រចាំថ្ងៃបាន កុំឲ្យសំណល់មួយចំនួនក្លាយជាសំរាមចោលលើទីវាលសាធារណៈ ដែលធ្វើឲ្យប៉ះពាល់ដល់បរិស្ថាន។

នៅក្នុងសន្និសីទសារព័ត៌មាន ក្រោយជំនួបពិភាក្សាទ្វេភាគីជាមួយលោក អេរិក សូហេម (Erik Solheim) នាយកប្រតិបត្តិកម្មវិធីបរិស្ថាន នៃអង្គការសហប្រជាជាតិ កាលពីថ្ងៃទី២៥ ខែមិថុនានេះ នៅទីស្តីការក្រសួងបរិស្ថាន លោក សាយ សំអាល់ បានបញ្ជាក់ថា នេះជាកាយវិការរួមចំណែកដ៏ល្អមួយ ជាមួយយុទ្ធសាស្ត្ររបស់ក្រសួងមួយចំនួន តាមរយៈការអប់រំផ្សព្វផ្សាយទៅដល់សាធារណជនឲ្យមានយល់ដឹង និងចូលរួមសម្អាតបរិស្ថានអនាម័យ ជាមួយវិធានការច្រានចោលផលិតផលប្លាស្ទិកមួយចំនួន ដែលមិនចាំបាច់កុំឲ្យនាំចូលមកកម្ពុជា។

មួយទៀតរដ្ឋកំណត់អាករពិសេស ដោយសហការជាមួយផ្នែកពាក់ព័ន្ធ ជាពិសេសជាមួយផ្នែកគយ និងសមត្ថកិច្ចតាមច្រកព្រំដែនហាមមិនឱ្យនាំចូលតែម្តងនូវប្រភេទខ្នាតប្លាស្ទិក ដែលយើងគិតថានាំឲ្យមានផលប៉ះពាល់ទៅដល់សោភ័ណភាពទីក្រុងបន្ទាប់ពីប្រើប្រាស់រួច។ យុទ្ធសាស្ត្រមួយទៀតក្រសួងបានដាក់វិធានការតាមផ្សារទំនើបៗនូវគំនិតផ្តួចផ្តើមមួយ ដោយកំណត់ឲ្យតាមផ្សារទំនើបនូវជម្រើសពីរ ថាគួរប្រើ ឬមិនប្រើប្រាស់ថង់ប្លាស្ទិក តែបើសិនជាអាជីវករណានូវរក្សាគំនិតចង់ប្រើប្រាស់ថង់ផ្លាស្ទិចតទៅទៀត តម្រូវឲ្យបង់លុយ ៤០០រៀលក្នុងថង់ផ្លាស្ទិចមួយ ហើយវិធានការនេះបានអនុវត្តទទួលជោគជ័យ ព្រមទាំងកាត់បន្ថយការប្រើប្រាស់ថង់ផ្លាស្ទិចបានរហូតដល់ ១/៣ ឬ១/៥ នៃចំនួនដែលពួកគាត់បានប្រើប្រាស់ថង់ផ្លាស្ទិច។

ជាមួយនេះ ក្រសួងលើកទឹកចិត្តថវិកា ដែលប្រមូលបានមកពីថង់ផ្លាស្ទិចនេះតាមផ្សារទំនើបៗ បង្វែរឲ្យយកទៅដាំកូនឈើ ឬយកទៅសំអាតអនាម័យនៅកន្លែងណាមួយផ្សេងទៀត។ យុទ្ធសាស្ត្រមួយទៀត គឺដុតបំផ្លាញចោលតែម្តងនៅក្នុងឡ ដែលមានបទដ្ឋានបច្ចេកទេសត្រឹមត្រូវ ដែលមានសីតុណ្ហភាពខ្ពស់។ មួយទៀតទាក់ទងនឹងការអនុវត្តវិមជ្ឈការ សហវិមជ្ឈការ ក្រសួងបានផ្ទេរមុខងាររបស់យើងទៅឲ្យថ្នាក់ក្រោមជាតិ ទុកពេលវេលាឲ្យរដ្ឋបាលថ្នាក់ក្រោមជាតិ លោករៀបចំជាផែនការថវិកា ដើម្បីអនុវត្តលើបរិស្ថានអនាម័យនេះ។ មួយផ្នែកទៀតក្រសួងបានលើកទឹកចិត្ត និងចាត់ទុកអ្នកអេតចាយជាមិត្ត ជាដៃគូដ៏ល្អបំផុត ព្រោះគាត់បានជួយដើរប្រមូលយកកាកសំណល់មានប្រយោជន៍មួយផ្នែកបម្រើឲ្យសិប្បកម្ម ឧស្សាហកម្មកែច្នៃជាសម្ភារៈប្រើប្រាស់ប្រចាំថ្ងៃរបស់ប្រជាជន រួមចំណែកថែរក្សាបរិស្ថានអនាម័យផងដែរ៕