ទុសេខ្សែភ្លើងឆេះខុនដូSKY3 កំពស់៣១ជាន់អស់មួយដង្ហើមចង្រឹត បង្កឲ្យភ្ញាក់ផ្អើលដល់សមត្ថកិច្ចចេញរថយន្តជាច្រើនគ្រឿង តែមិនបានបាញ់
-

ភ្នំពេញ ៖ មានករណីទុសេខ្សែភ្លើងនៅលើអាគារខុនដូ SKY 3 កំពស់៣១ជាន់មួយកន្លែង ស្ថិតនៅតាមបណ្ដោយផ្លូវ២៨៧ ស្ថិតក្នុងសង្កាត់បឹងកក់១ ខណ្ឌទួលគោក ដោយមានផ្សែងហុយយ៉ាងខ្លាំងចេញពីលើអាគារ និងបានបង្កការភ្ញាក់ផ្អើលយ៉ាងខ្លាំងដល់ប្រជាពលរដ្ឋ និងសមត្ថកិច្ចចេញរថយន្តជាច្រើនគ្រឿងមកត្រៀមបាញ់ពន្លត់ កាលពីវេលាម៉ោង១០យប់ ថ្ងៃទី២៦ ខែកក្កដា ឆ្នាំ២០១៨ ។

ប្រជាពលរដ្ឋដែលរស់នៅក្បែកន្លែងកើតហេតុបានប្រាប់ឲ្យដឹងថា នៅពេលកើតហេតុ គេសង្កេតឃើញអាគារខុនដូ កំពស់៣១ជាន់ខាងលើ មានផ្សែងហុយចេញយ៉ាងខ្លាំងពីលើកំពូលអាគារ ។ ភ្លាមៗ ប្រជាពលរដ្ឋបានរាយការណ៍ទៅសមត្ថកិច្ចមូលដ្ឋានចុះមកដល់កន្លែងកើតហេតុភ្លាមៗ ដោយសមត្ថកិច្ចក៏បានចេញរថយន្តជាច្រើនគ្រឿងមកត្រៀម ធ្វើការបាញ់ពន្លត់ ។ ដោយសមត្ថកិច្ចមូលដ្ឋាន សហការជាមួយកម្មករអាគារខាងលើ បានឡើងទៅបិតប៉ារ៉ែ និងទាញទយោទឹក ក្បែរៗនោះមកបាញ់ និងជះពន្លត់ រហូតមិនដល់២០នាទីផង ក៏រលត់ទៅវិញជាស្ថាពរ ដោយមិនបានប្រើប្រាស់ទឹករថយន្តពន្លត់អគ្គីភ័យនោះទេ ។
ករណីខាងលើនេះ សមត្ថកិច្ចមូលដ្ឋានបានប្រាប់ឲ្យដឹងថា មូលហេតុ បណ្ដាលមកពីទុសេខ្សែភ្លើង ។ ចំណែកការខូចខាត អស់ប្រអប់ជណ្ដើយន្តមួយ ៕
ដោយ៖ ភារ៉ា