កំពង់ធំ ៖ សមត្ថកិច្ច​នគរបាល​ខេត្ត បាន​ឃាត់ខ្លួន​ជន​ម្នាក់សង្ស័យម្នាក់ តាមពាក្យបណ្តឹងរបស់ជនរងគ្រោះ ពាក់ព័ន្ធ​នឹង​ករណី​ប៉ុនប៉ង​មនុស្សឃាត កាលពីថ្ងៃទី​៣១ ខែកក្កដា ឆ្នាំ២០១៨ ស្ថិតនៅ​ភូមិ​ខ្សាច់​ល្អិត ឃុំ​ចុង​ដូង ស្រុក​បារាយណ៍ ។

ដើម​បណ្តឹង​ឈ្មោះ និ​នប៉ែ​ត ភេទ​ប្រុស អាយុ​២៦​ឆ្នាំ នៅ​ភូមិ​ខ្សាច់​ល្អិត ឃុំ​ចុង​ដូង ស្រុក​បារាយណ៍ ។ ជនសង្ស័យ​ឈ្មោះ ឡាញ់ សុខលាភ ភេទ​ប្រុស អាយុ​៣០​ឆ្នាំ រស់នៅ​ក្នុងភូមិ​-​ឃុំ​ជាមួយ​គ្នា និង​ត្រូវជា​បងថ្លៃ​ជន​រង​គ្រោះ​តែ​ម្តង ។ បើយោងតាមសម្តីរបស់ជនរងគ្រោះបានប្រាប់សមត្ថកិច្ចឲ្យដឹងថា កាលពី​វេលា​ម៉ោង​៩ ​និង​៣០​នាទី​យប់​ថ្ងៃ​ទី​៣០ ខែ​កក្កដា រូបគេនិងមិត្តភិក្តមួយក្រុមមានគ្នា៧នាក់ បានជិះម៉ូតូចំនួន៤គ្រឿង គោលបំណងគឺហូបបង្អែមនៅផ្សារកំពង់ថ្ម ពេលហូបរួចរាល់ហើយក៏ត្រឡប់មកផ្ទះវិញ ដោយ​ជន​រង​គ្រោះ​ជិះ​ម៉ូតូ​មុខ​គេ ។ លុះ​ទៅ​ដល់​ផ្លូវលំ ក្នុងភូមិ​ខ្សាច់​ល្អិត ឃុំ​ចុង​ដូង ស្រុក​បារាយណ៍ ខាងត្បូង​វត្ត​ខ្សាច់​ល្អិត​ប្រមាណ​៨០​ម៉ែត្រ ស្រាប់តែ​ទាក់​ខ្សែ​ចំ​ទ្រូង​ និង​ក ដែល​ជនសង្ស័យ​បាន​ចង​កាត់​ទទឹង​ផ្លូវ ​បណ្ដាល​ឲ្យ​ដួល​ស្ទើរ​ស្លាប់​ស្ទើរ​រស់ ។ ជនរងគ្រោះបានប្រាប់ទៀតថា ក្រោយពេលដែលដួលនោះ ជន​រង​គ្រោះ​ក្រឡេក​ឃើញ​ជនសង្ស័យ​ឈរ​នៅ​ចំ​ពីមុខ​ចម្ងាយ​ប្រហែល​៣០​ម៉ែត្រ កំពុង​ចុច​ភ្លើង​ពិល​មើល​មក​ខ្លួន តែ​ភ្លាម​ៗ​នោះ​បាន​ពន្លត់ភ្លើង​ពិល​វិញ ហើយ​រត់គេច​ខ្លួន​តែ​ម្ដង ។ បន្ទាប់ពីឃើញជនសង្ស័យហើយ ក៏ប្រាប់មិត្តភិក្តឲ្យជិះម៉ូតូដេញតាម តែដោយសារតែងងឹតខ្លាំងពេកក៏ត្រឡប់មកវិញ ដោយចាប់មិនបានជនសង្ស័យនោះទេ។ លុះព្រឹកឡើងជនរងគ្រោះក៏បានទៅដាក់ពាក្យបណ្តឹង ដើម្បីឲ្យចាប់ខ្លួន។ ក្រោយពីចាប់ខ្លួនបានជនសង្ស័យក៏បានឆ្លើយសារភាពថា ខ្លួនពិតជាបានធ្វើពិតមែន ដោយសារគំនុំនឹងប្អូនថ្លៃតាំងពីយូរហើយ។ បច្ចុប្បន្នសមត្ថកិច្ចកំពុងតែកសាងសំណុំរឿងឡើងទៅតុលាការខេត្ត៕ ដោយ៖ និស្ស