ទាល់ខ្លាំងពេក...មានផ្ទៃពោះជិតគ្រប់ខែទៅហើយ ស្រ្តីម្នាក់ផឹកស្រាឲ្យស្រវឹង ចាប់អូសដៃកូនស្រីចូលរថយន្តឲ្យស្លាប់តែម្តង ព្រោះតែប្តីចិត្តខ្មៅចុះចោល មានស្រីថ្មី និងខ្ចីលុយអ្នកស្គាល់មិនបាន ដើម្បីទុកសម្រាលកូន....

រាជធានីភ្នំពេញ ៖ កាលពីវេលាម៉ោង១១ និង៣០នាទីយប់ថ្ងៃទី៤ សីហា ស្ថិតនៅរង្វង់មូលចោមចៅ ក្នុងភូមិចោមចៅ សង្កាត់ចោមចៅ៣ ខណ្ឌពោធិ៍សែនជ័យ មានស្រ្តីម្នាក់បានចាប់អូសដៃកូនស្រីអាយុ៨ឆ្នាំរត់ចូលរថយន្ត ត្រូវបានប្រជាពលរដ្ឋជួយឃាត់ និងចាប់ប្រគល់ជូនសមត្ថកិច្ច ដើម្បីធ្វើការសួរនាំ។

ស្ត្រីជាម្តាយឈ្មោះ ស្រឿន ចន្ធី អាយុ៣២ឆ្នាំ ស្នាក់នៅបន្ទប់ជួលម្តុំខាងជើងសាលាសង្កាត់ចោមចៅ៣ និងមានស្រុកកំណើតនៅភូមិរកាក្រោម ឃុំខ្ពប ស្រុកស្អាង ខេត្តកណ្តាល ចំណែកកូនស្រីឈ្មោះ សុខ ស្រីស្រស់ អាយុ៨ឆ្នាំ ។

បើតាមស្រ្តីរូបនោះបាននិយាយប្រាប់ថា គាត់មានផ្ទៃពោះជិតគ្រប់ខែអត់លុយ សម្រាប់ទុកចិញ្ចឹមកូនស្រីនិងលុយសម្រាប់សំរាលកូន ក៏បានទៅរកខ្ចីលុយអ្នកស្គាល់គ្នា ដើម្បីទុកសម្រាលកូន តែខ្ចីគេមិនបាន ឯប្តីក៏ចុះចោលទៅមានស្រីផ្សេងទៀត ។ ដោយសារតែទល់ច្រកខ្លាំងពេក ទើបស្រ្តីរូបនោះ ទៅផឹកស្រាឲ្យស្រវឹង រួចក៏ទាញដៃកូនស្រីរត់ចូលរថយន្តឲ្យស្លាប់តែម្តងទៅ។