រុក្ខជាតិ ៖ ល្ហុង។ ល្ហុងមានអត្ថប្រយោជន៍ណាស់មិនថាយកហូបផ្លែទេ សូម្បីតែស្លឹក គ្រាប់ សឹងតែពីដើមដល់ឬសមានប្រយោជន៍ទាំងអស់ក្នុងការព្យាបាលជំងឺមួយចំនួន។ ខាងក្រោមនេះយើងនឹងបង្ហាញអ្នកពីការព្យាបាល និងកំរិតការប្រើប្រាស់អោយបានត្រឹមត្រូវ។  

ផ្នែកប្រើប្រាស់ ៖ ស្លឹក ផ្លែខ្ចី ផ្លែទុំ ជ័រចេញពីផ្លែខ្ចី ដើមខ្ចី ឬស ផ្កា គ្រាប់។ កន្លែងដាំដុះ ៖ គេយកមកដាំស្ទើរគ្រប់ទីកន្លែង លើកលែងតែដីលិចទឹក។ បន្តពូជដោយគ្រាប់។  

លក្ខណៈរុក្ខជាតិ ៖ ជារុក្ខជាតិមានកំពស់ពី ៣-១០ម ដើមរាងមូលត្រង់ តាមបណ្តោយដើមមាន ស្នាមធាងស្លឹកដែលជ្រុះ។ ស្លឹក ៖ ដុះឆ្លាស់ជុំវិញដើម មានទងស្លឹកវែងប្រហោងក្នុង។  ស្លឹកឆែកជ្រៅៗ។  

ផ្កា ៖ ផ្កាពណ៌លឿងភាវ ផ្កាឈ្មោលដុះចេញពីប្រគាបស្លឹក ផ្កាញីមានទងខ្ចី។ ផ្លែ ៖ ផ្លែមានរាងមូលទ្រវែង។ ជាផ្លែសាច់មានគ្រាប់ច្រើន។ គ្រាប់ពេលខ្ចីពណ៌ស ពេលទុំពណ៌ខ្មៅ។  

ការព្យាបាល ៖

  – ស្លឹក ដាំផឹកជំនួយបេះដូង ទំលាក់ព្រូន គ្រុន រាកមួល ហើមសួត រលាកសន្លាក់។ – ផ្លែខ្ចី បញ្ចុះទឹកនោម ស្ទះនោម រលាកក្រពះពោះវៀន បន្សាបពលចំណី គ្រុន។  

– ផ្លែទុំ បាយបាន ជំនួយទឹកដោះ បន្ទន់លាមក។ – ជ័រចេញពីផ្លែខ្ចី ដាំផឹកសំលានប់មេព្រូន រលាកក្រពះ ថ្លើមរីក។ – ដើមខ្ចី ធ្លាក់ស។  

– ឬស ប្រមេះទឹកបាយ បញ្ចុះទឹកនោម ជំនួយទឹកដោះ បាយបាន ធ្លាក់ស។ – ផ្កា ព្យាបាលក្អក។ – គ្រាប់ ទំលាក់ព្រូន គ្រុនចាញ់ ឬសដូងបាត។  

កំរិតប្រើ ៖ ស្ងួត ១០-២០ក្រាម ក្នុងមួយថ្ងៃ។  

*សូមពិនិត្យ និងពិគ្រោះជាមួយគ្រូពេទ្យឱ្យបានច្បាស់លាស់ និងអស់លទ្ធភាពជាមុន។ វិធីនេះអាចប្រើសាកល្បងនៅពេលដែលអ្នកមិនមានជម្រើសផ្សេង។ សម្រួលអត្ថបទដោយ៖ អ៊ាង សុផល្លែត ឯកសារយោង៖ មជ្ឈមណ្ឌលជាតិស្រាវជ្រាវវេជ្ជសាស្រ្តបូរាណ