បុរសម្នាក់ ឃើញឆ្កែស្ទុះមកខាំ ស្រាប់តែរើសដុំថ្ម គប់ឆ្កែ តែមិនត្រូវឆ្កែ បែរជាត្រូវចំថ្គាមក្មេងប្រុសម្នាក់ បណ្តាលឲ្យសន្លប់ភ្លាមនៅនឹងកន្លែងកើតហេតុ...

ភ្នំពេញ៖ បុរសម្នាក់ឃើញឆ្កែស្ទុះរកខាំ រើសដុំថ្មគប់ មិនត្រូវឆ្កែ ទៅត្រូវ ចំថ្គាមបុរសម្នាក់ បណ្តាលឲ្យសន្លប់ស្ដូកស្តឹង ត្រូវសមត្ថកិច្ចឃាត់ខ្លួន ពីបទប្រើហិង្សាដោយអចេតនា កាលពីថ្ងៃទី១៧ ខែសីហា ឆ្នាំ២០១៨ នៅចំណុចផ្លូវបេតុង ក្រុមទី៧ ភូមិ១ សង្កាត់ច្រាំងចំរេះ១ ខណ្ឌឬស្សីកែវ។

ជនរងគ្រោះឈ្មោះ សឿង ពុធសីហា ភេទប្រុស អាយុ១៣ឆ្នាំ មានទីលំនៅផ្ទះលេខ៥៣០ ក្រុម៧ ភូមិ១សង្កាត់ច្រាំងចំរេះ១ មុខរបរ នៅផ្ទះ រងរបួសថ្គាមខាងឆ្វេង ចំណែកជនបង្កឈ្មោះ យិន យ៉ាន ភេទប្រុស អាយុ២៨ឆ្នាំ ស្នាក់នៅផ្ទះជួលភូមិចំរើនផល សង្កាត់ស្ទឹងមានជ័យ ខណ្ឌមានជ័យ មុខរបរ មន្ទ្រីឥណទាន (ឃាត់ខ្លួន)។

នៅមុនពេលកើតហេតុ ជនរគ្រោះ កំពុងអង្គុយលេងនៅលើកង់ ត្រង់ចំណុចផ្លូវបេងក្រុម៧ សង្កាត់ច្រាំងចំរេះ១ ខណ្ឌឬស្សីកែវ ពេលនោះជនបង្កបានដើរទៅផ្ទះបង ស្រាប់តែឆ្កែស្ទុះមកដេញខាំ ជនបង្កក៏បានរើសដុំថ្មគប់ឆ្កែ តែគប់មិនត្រូវឆ្កែ បែរជាខ្ទាតទៅត្រូវជនរងគ្រោះ បណ្តាលឲ្យត្រូវថ្គាមខាងឆ្វេងសន្លប់តែម្ដង ៕