តើពពែឆ្កែជាអ្វី? ពពែឆ្កែ គឺជាការឆ្លងមេរោគមួយនៃក្រពេញខ្លាញ់ស្ថិតនៅត្របកភ្នែក។ វាចាប់ផ្ដើមស្ទះក្រពេញនោះ បណ្ដាលមកពីភាពកខ្វក់ ការប្រើគ្រឿងសម្អាង និងភាគល្អិតផ្សេងៗចូលទៅនៅពេលញីភ្នែក។ បន្ទាប់មកវាទៅជាឆ្លងមេរោគ ហើយភាគច្រើនបណ្ដាលមកពីមេរោគ Staphylococcus ហើយកត្តាផ្សេងទៀត វាកើតឡើងដោយសារ ស្រេ្តស ការផ្លាស់ប្ដូរអ័រម៉ូន និងរលាកត្របកភ្នែក។

ជំងឺពពែឆ្កែ ឬពពែភ្នែក គឺជាពាក្យដែលប្រជាពលរដ្ឋយើងតែងតែហៅតៗគ្នា ដែលតាមពិតទៅជំងឺពពែឆ្កែនេះ គឺជាជំងឺបូសនៅត្របកភ្នែក ឬក៏ហៅថា Stye។ ជំងឺបូសនៅលើត្របកភ្នែក ឬជំងឺពពែឆ្កែនេះ មិនមែនកើតឡើងដោយសារមើលសត្វឆ្កែ ឬសត្វអ្វីពាក់គ្នានោះទេ។ វាកើតឡើងដោយសារការស្ទះក្រពេញនៅលើត្របកភ្នែក ដែលបណ្តាលមកពីធូលីដីចូលទៅបិទជិតរន្ធក្រពេញលើត្របកភ្នែក ដែលអាចបង្កឱ្យកើតទៅជាបូស ឬអាប់សែនៅលើត្របកភ្នែក។ ពពែឆ្កែនឹងបង្កើតទៅជាខ្ទុះ ហើយបញ្ហានេះនឹងបាត់ឯងបន្ទាប់ពី ១ ទៅ ២ អាទិត្យ។ លោកអ្នកអាចកត់សម្គាល់ជំងឺពពែឆ្កែ ឬពពែភ្នែក ឬបូសលើត្របកភ្នែកតាមអាការៈមួយចំនួនដូចជា ៖ -អាចមានអារម្មណ៍ថា ឈឺនៅលើត្របកភ្នែកខាងលើ ឬក៏នៅខាងក្រោម -ត្របកភ្នែកមានសភាពឡើងក្រហម និងហើមនៅកន្លែងដែលឈឺចាប់នោះ កន្លែងដែលហើមនេះអាចបង្កឱ្យកើតទៅជាខ្ទុះ ហើយបង្កទៅជាបូសតែម្តង។ ដូច្នេះ ជំងឺបូសនៅលើត្របកភ្នែកនេះ អាចបង្កឱ្យមានផលប៉ះពាល់ចំពោះអ្នកជំងឺដូចជា -ប៉ះពាល់ទៅលើត្របកភ្នែក បណ្តាលឱ្យភ្នែកឈឺហើយពិបាកនៅក្នុងការបិទបើកភ្នែក។ -នៅពេលដែលលោកអ្នកមិនបានធ្វើការព្យាបាលឱ្យបានទាន់ពេលវេលានោះទេ ជំងឺនេះអាចរាលដាលទៅកន្លែងផ្សេងទៀត បង្កឱ្យកើតទៅជារលាកជាលិកានៅជុំវិញត្របកភ្នែក ហើយបើសិនជាបូសនេះ មានសភាពធ្ងន់ធ្ងរអាចធ្វើឱ្យបាត់បង់គំហើញថែមទៀតផង។ មានវិធីធម្មជាតិជាច្រើនដែលលោកអ្នកអាចអនុវត្តបានតាមភាពងាយស្រួលរបស់លោកអ្នក។ រូបមន្តទាំងនោះមាន៖ ១. ស្អំទឹកក្តៅឧណ្ហៗ វិធីធ្វើ និងប្រើប្រាស់៖ ជ្រលក់ក្រណាត់ជាមួយនឹងទឹកក្ដៅឧណ្ហៗ ហើយស្អំរយៈពេល ៥ នាទី ដើម្បីពន្លឿនល្បឿនឱ្យខ្ទុះឆាប់ធ្លាយ។ ស្អំ ៣ ទៅ ៤ ដងក្នុងមួយថ្ងៃ។ ២. ស្លឹកត្របែក វិធីធ្វើ និងប្រើប្រាស់៖ ជ្រលក់ស្លឹកត្របែកចូលទឹកក្តៅ រួចស្រង់ចេញទុកឱ្យត្រជាក់បន្តិច (កុំត្រជាក់ពេក) រួចយកទ្រាប់ជាមួយកន្សែងហើយបិតលើភ្នែកច្រើននាទី។ ធ្វើបែបនេះ ៣ ទៅ ៤ ដងក្នុងមួយថ្ងៃ ធ្វើឱ្យបានពីរបីថ្ងៃនឹងជាសះស្បើយឯង។ ៣.តែបៃតង វិធីធ្វើ និងប្រើប្រាស់៖ ការប្រើប្រាស់តែបៃតងមិនខុសគ្នា ពីការប្រើទឹកក្តៅស្អំប៉ុន្មាននោះទេ តែវាមិនត្រឹមតែជួយធ្វើឱ្យរបួសឆាប់ជាសះស្បើយនោះទេ តែថែមទាំងអាចបន្ថយការហើម ប៉ោង បំបាត់ការឈឺចុកចាប់ និងការលាកផងដែរ ជាពិសេសនោះថែមទាំងការពារការឆ្លងមេរោគផងដែរ។ វិធីធ្វើ និងប្រើប្រាស់៖ យកតែកញ្ចប់ ឬតែបៃតងម្សៅមកឆុង ហើយទទួលទានតែនេះក្តៅឧណ្ហៗមួយកែវ។ បន្ទាប់មកយកកញ្ចប់កាកតែ ឬយកក្រណាត់ស្អាតជ្រលក់ទឹកតែបៃតងតែម្តងក៏បាន មកស្អំលើរបួសត្របកភ្នែកឱ្យបាន ៥នាទី។ អនុវត្តវិធីបែបនេះ ៣ទៅ ៤ដងជាប្រចាំរហូតដល់ខ្ទុះបែក ឬស្រកជាសះស្បើយ។ ៤. រមៀត វិធីធ្វើ និងប្រើប្រាស់៖ អ្នកណាៗក៏ដឹងដែរថា រមៀតមានប្រសិទ្ធភាពប្រឆាំងនឹងការរលាកផ្សេងៗ ដូច្នេះហើយ ការយករមៀតមកព្យាបាលភ្នែកឡើងពពែឆ្កែ នឹងធ្វើឱ្យរបួសឆាប់ជាសះស្បើយជាមិនខាន។ វិធីធ្វើ និងប្រើប្រាស់៖ ដាំទឹកប្រមាណជា ២ពែងឱ្យពុះ បន្ទាប់មកដាក់ម្សៅរមៀតចូល ១ស្លាបព្រាបាយ។ ទុកវាឱ្យត្រជាក់ សឹមយកក្រណាត់ស្អាតជ្រលក់ទឹករមៀតនេះ មកលាបលើត្របកភ្នែកដែលមានរបួស។ អនុវត្តបែបនេះជាប្រចាំ មួយថ្ងៃ ២ ទៅ ៣ដង ជាពិសេស គូរតែយករមៀតធ្វើជារបបអាហារទទួលទានជាប្រចាំថ្ងៃ ដើម្បីឱ្យរបួសឆាប់ជាសះស្បើយពីខាងក្នុងបន្ថែមផងដែរ។ ៥.ជែលប្រទាលកន្ទុយក្រពើ ប្រសិទ្ធភាពនៃជែលប្រទាលកន្ទុយក្រពើដើម្បីប្រឆាំងនឹងការរលាក និងមេរោគបាក់តេរី ក៏ល្អមិនចាញ់រមៀតប៉ុន្មានដែរ នៅក្នុងការព្យាបាលភ្នែកកើតពពែឆ្កែ។ មិនតែប៉ុណ្ណោះ ជែលប្រទាលកន្ទុយក្រពើ ថែមទាំងអាចសម្លាប់មេរោគបាក់តេរី និងការពារកុំឱ្យឆ្លងមេរោគទៀតផង។ វិធីធ្វើ និងប្រើប្រាស់៖ យកប្រទាលកន្ទុយក្រពើចិតសម្បកឱ្យស្អាត យកតែជែលមកលាបលើត្របកភ្នែកដែលមានរបួស ទុកចោលប្រមាណជា ២០នាទី សឹមលាងចេញជាមួយទឹកស្អាត។ អ្នកអាចអនុវត្តជាប្រចាំ ដើម្បីឱ្យរបួសឆាប់ជាសះស្បើយ។ ៦.ផ្លែប៉ោម ឬដំឡូងបារាំង យកបន្ទះផ្លែប៉ោម ឬដំឡូងបារាំងបិតលើពពែឆ្កែ រួចរង់ចាំរយៈពេល ២ម៉ោង។ បម្រាម៖ មិនត្រូវប្រើម្សៅផាត់មុខក្នុងពេលកំពុងព្យាបាល ព្រោះវាអាចធ្វើឲ្យអាការៈកាន់តែធ្ងន់ធ្ងរឡើង ឬងាយ នឹងចេញពពែឆ្កែថ្មីមួយទៀតឡើងមក។ ហើយក៏ត្រូវធ្វើលំហាត់ប្រាណដើម្បីពង្រឹងប្រព័ន្ធភាពស៊ាំរបស់អ្នក បង្កើនការទទួលទានខ្ទឹមសជាប្រចាំ ផ្លែឈើស្រស់ និងបន្លែ ព្រមទាំងស៊ុប…។ ប្រសិនបើអ្នកទុកចោលមិនព្យាបាលពពែឆ្កែនេះទេ វាអាចផ្តល់ភាពរំខានដល់អ្នកច្រើនជាងរយៈពេល ១០ថ្ងៃ ឬរហូតដល់វាស្រកទៅវិញ។ ដោយតែជំងឺនេះឆ្លង គួរចៀសវាងការប្រើប្រាស់របស់រួមជាមួយនឹងអ្នកដទៃ ដូចជាកន្សែងពោះគោ។ ត្រូវប្រាកដថា អ្នកសម្អាតកន្សែងពោះគោជារៀងរាល់ថ្ងៃ។ អាការៈឈឺភ្នែក និងកើតពពែឆ្កែ មិនមែនឆ្លងដោយសារតែការមើលភ្នែកគ្នានោះទេ សូមឈប់យល់ច្រឡំទៅ។ ការឆ្លងជំងឺនេះ បណ្តាលមកពីការប៉ះពាល់របស់របររួមគ្នាជាមួយអ្នកជំងឺ គឺឆ្លងតាមរយៈទឹកភ្នែកដែលឧស្សាហ៍ហូរពេលដែលកើតជំងឺនេះ ហើយយកដៃជូត បន្ទាប់មកវាអាចឆ្លងរាលដាលទៅមនុស្សម្នាក់ផ្សេងទៀត ជាពិសេសមនុស្សនៅជិតខ្លួនតែម្តង។ ដោយហេតុនេះហើយ បានជាគេតែងតែយល់ច្រលំថា គ្រាន់តែមើលភ្នែកគ្នាក៏ឆ្លងដែរនោះ។   **សូមពិនិត្យ និងពិគ្រោះជាមួយគ្រូពេទ្យឱ្យបានច្បាស់លាស់ និងអស់លទ្ធភាពជាមុន។ វិធីនេះអាចប្រើសាកល្បងនៅពេលដែលអ្នកមិនមានជម្រើសផ្សេង។ សម្រួលអត្ថបទៈ អ៊ាង សុផល្លែត