(ភ្នំពេញ)៖ សម័យប្រឡងថ្ងៃទី២០ ខែសីហា ឆ្នាំ២០១៨ នៅតាមមណ្ឌលប្រឡងនានា ហាក់មានសភាពស្ងប់ស្ងាត់ធម្មតា តែអ្វីដែលគួរឲ្យគត់សម្គាល់នោះ មានក៏បេក្ខជន បេក្ខនារី មួយចំនួន មានអាការៈវិលមុខ ខ្យល់គរ ក្អួត ជាដើម​។ នៅក្នុងនោះមានបេក្ខជនខ្លះក៏បានធូរស្បើយបន្តិចហើយ ហើយក៏បានតែបន្តការប្រឡងធម្មតា។

ចំណែកឯនៅខេត្តកំពង់ចាម នៅព្រឹកថ្ងៃទី២០​ ខែសីហា​ ឆ្នាំ​២០១៨ ឯកឧត្ដម​ គួច​ ចំរើន​ អភិបាលខេត្តកំពង់ចាម​ បានអញ្ជើញចូលរួមកាត់វិញ្ញាសារប្រលងមធ្យមសិក្សាទុតិយភូមិ​ (​ បាក់ឌុប​ )នៅមណ្ឌលវិទ្យាល័យ​ ហ៊ុនសែន​ បឹងកុក​ ដែលមានការចូលរួមពីមន្ត្រីជាន់ខ្ពស់របស់ក្រសួងអប់រំ​ យុវជន​ និងកីឡា​ និងខាងមន្ត្រីជាន់ខ្ពស់នៃអង្គភាពប្រឆាំងអំពើពុករលួយ​ ផងដែរ​ ។ សូមបញ្ជាក់ដែរថា​ បេក្ខជន​សរុបទាំងអស់ក្នុងខេត្តកំពង់ចាម​ មានចំនួន​ ៨០០៧នាក់​ ក្នុងខេត្តកំពង់ចាមមាន​ ​១៤មណ្ឌល​ ផ្នែកវិទ្យាសាស្រ្ដ​ មានចំនួន៩មណ្ឌល​ ផ្នែកវិទ្យាសាស្ត្រសង្គម ៥មណ្ឌល​ ហើយមណ្ឌលប្រលងដែលបានកំណត់មាននៅក្នុងរីរួមខេត្តកំពង់ចាម​ ស្រុកកំពង់សៀម​ និងស្រុកជើងព្រៃ​ ។ ​ មានប្រសាសន៍ក្នុងឱកាសនោះ ឯកឧត្ដមអភិបាលខេត្ត បានលើកទឹកចិត្តដល់ក្មួយៗសិស្សានុសិស្សទាំងអស់​ ត្រូវខិតខំប្រឹងប្រែងឲ្យអស់ពីសមត្ថភាព ធ្វើឲ្យបានរួចរាល់លើគ្រប់វិញ្ញាសារ ដោយត្រូវគោរពឲ្យបានខ្ជាប់ខ្ជួននូវបទប្បញ្ញត្តិ និងបទបញ្ជាផ្ទៃក្នុងនៃការប្រលង ។ ជាមួយនេះ ឯកឧត្ដមអភិបាលខេត្ត ក៏បានជូនពរដល់សិស្សានុសិស្សទាំងអស់ឲ្យទទួលបានលទ្ធផលជោគជ័យ និងទទួលបាននិទ្ទេសល្អគ្រប់ៗគ្នាក្នុងសម័យប្រលងឆ្នាំសិក្សា ២០១៧-២០១៨នេះ ហើយរដ្ឋបាលខេត្តនៅតែបន្ត និងត្រៀមរង្វាន់សម្រាប់ផ្ដល់ជូនសិស្សានុសិស្សដែលទទួលបាននិទ្ទេសល្អប្រសើរផងដែរ ។ អាណាព្យាបាល​ដែលកំពុងរង់ចាំកូនៗ​ នៅខាងក្រៅបរិវេណមណ្ឌលប្រលង​ បានសម្តែងអារម្មណ៍រីករាយបំផុសដែលឃើញកូនៗរបស់ពួកគាត់បានតស៊ូរៀនសូត្រ​ ហើយបានជម្រុញដល់ការសិក្សាបន្ថែមទៀត​ ដើម្បីបន្តទៅរៀននៅមហាវិទ្យាល័យ​ និងដាក់ពាក្យប្រលងចូលបម្រើការក្នុងស្ថាប័នរដ្ឋ​ ឬឯកជន​ ក្នុងការរួមចំណែកអភិវឌ្ឍន៍ប្រទេស"​៕ ដោយ៖ ភារ៉ា