ភ្នំពេញ៖ កាលពីវេលាម៉ោង០០និង៣០នាទី រំលងអាធ្រាតឈានចូលថ្ងៃទី២២ ខែសីហា ឆ្នាំ២០១៨នៅផ្ទះសំណាក់ដាលីន ភូមិជ្រោយបាសាក់ សង្កាត់ព្រែកប្រា ខណ្ឌច្បារ អំពៅ សមត្ថកិច្ចធ្វើការឃាត់ខ្លួនគូរស្នេហ៍មួយគូរ ដែលបានបោកប្រាស់មិត្តភ័ក្តិយកម៉ូតូទៅបញ្ចាំបានលុយបីរយដុល្លារ ដើរស៊ីចាយសប្បាយហ៊ីហា ពេលម្ចាស់គេទាន់ប្តឹងសមត្ថកិច្ចឲ្យចាប់ខ្លួនតែម្តង។

ជនរងគ្រោះឈ្មោះយ៉ា ប៉ាក់ទ្រី ភេទប្រុស អាយុ២៩ឆ្នាំ មុខរបរនៅផ្ទះ ស្នាក់នៅ ភូមិតាងៅ សង្កាត់និរោធ ខណ្ឌច្បារ អំពៅ។ ចំណែកជនសង្ស័យឃាត់ខ្លួន ទី១. ឈ្មោះហេង ស៊ុន ភេទប្រុស អាយុ២៦ឆ្នាំ ជនជាតិវៀតណាម មុខរបរ មិនពិតប្រាកដ។ ទី២-ឈ្មោះសួន ប៉ូនីតា ភេទស្រី អាយុ១៧ឆ្នាំ ជនជាតិខ្មែរ មុខរបរអ៊ុតសក់។ ជនសង្ស័យទាំង០២នាក់ ស្នាក់នៅផ្ទះជួល ភូមិក្បាលទំនប់ សង្កាត់បឹងទំពុន២ ខណ្ឌមានជ័យ។ បើតាមការរៀបរាប់របស់ជនរងគ្រោះ បានអោយដឹងថា កាលពីថ្ងៃទី២១ ខែសីហា ឆ្នាំ២០១៨ ម៉ោង០០និង៣០នាទី កណ្តាលអាធ្រាត្រ ជនរងគ្រោះកំពុងដេកនៅផ្ទះសំណាក់ ដាលីន (ចំណុចកើតហេតុ) ស្រាប់តែជនសង្ស័យឈ្មោះហេង ស៊ុន និង ឈ្មោះ សួន ប៉ូនីតា បានមកខ្ចីម៉ូតូជនរងគ្រោះម៉ាក Honda Scopy-I សេរី២០១១ ពណ៌ស ពាក់ស្លាកលេខ ភ្នំពេញ ១BB-០៧៣២ លេខតួ-លេខម៉ាស៊ីន ៨០០៦៣១៧ ប្រាប់ថា ទៅទិញអីហូបមួយភ្លែត ជនរងគ្រោះក៏ឲ្យម៉ូតូទៅពួកជនសង្ស័យ រួចជនសង្ស័យ ក៏យកម៉ូតូទៅបញ្ចាំគេ បានលុយ ៣០០ដុល្លារ យកលុយលេង ល្បែងនិង ស៊ីចាយអស់។ លុះដល់ថ្ងៃទី២២ ខែសីហា ឆ្នាំ២០១៨ ម៉ោង១៩និង៣០នាទី ជនរងគ្រោះឃើញ ជនសង្ស័យ នៅមុខណាហ្គាវើល សង្កាត់ទន្លេបាសាក់ ខណ្ឌចំការមន ក៏ឃាត់ខ្លួនប្រគល់ឲ្យសមត្ថកិច្ច ប៉ុស្តិ៍ព្រែកប្រា ខណ្ឌច្បារអំពៅ ។ ដោយ៖ និស្ស័យ