កណ្តាល៖ កាលពីវេលាម៉ោង៨និង១០នាទីថ្ងៃទី២០ខែសីហាឆ្នាំ២០១៨ ក្មេងស្រីអាយុ១៤ឆ្នាំម្នាក់ ចូលបោសសម្អាតផ្ទះថៅកែរបស់ខ្លួនឃើញខ្សែដៃនិងចិញ្ចៀនរបស់ថៅកែទុកនៅក្នុងទូរ ស្រាប់តែបែកគំនិត លួចយកទៅលក់តែចុងក្រោយត្រូវថៅកែរបស់ខ្លួនដឹងប្ដឹងសមត្ថកិច្ចឲ្យចាប់ខ្លួន។ ជនរងគ្រោះ​ឈ្មោះ​ជិន ចាន់​ធី ភេទ​ស្រី អាយុ៥៥ឆ្នាំ ជនជាតិខ្មែរ មាន​ទីលំនៅ​ភូមិ​ព្រែក​តា​សោម ឃុំ​ឬ​ស្សី​ជ្រោយ ស្រុក​មុខកំពូល ខេត្តកណ្ដាល មុខរបរ​មេផ្ទះ។

មន្រ្ដីនគរបាលស្រុកមុខកំពូលបានឲ្យដឹងថាជនសង្ស័យ​មានឈ្មោះ អ៊ី​ម រ៉ាវី ភេទ​ស្រី អាយុ១៤ឆ្នាំ ជនជាតិខ្មែរ​ឥស្លាម មាន​ទីលំនៅ​ភូមិ​ជ្រោយ​មេត្រី​លើ ឃុំ​ឬ​ស្សី​ជ្រោយ ស្រុក​មុខកំពូល ខេត្តកណ្ដាល មុខរបរ អ្នកបម្រើ​នៅផ្ទះ​ជនរងគ្រោះ។ មន្រ្ដីនគរបាលស្រុកមុខកំពូលបានបន្តទៀតថា សម្ភារៈដែលក្មេងស្រីខាងលើលួចបាន មាន ខ្សែដៃ​ផ្លា​ទីន​ដាំ​ពេជ្រ​ចំនួន០១ខ្សែ, ចិ​ញ្ជៀ​ន​ផ្លា​ទីន​ដាំ​ពេជ្រ​ចំនួន០១វង់។ ជនរងគ្រោះបានប្រាប់មន្រ្តីនគរបាលថា ជនសង្ស័យ​និង​ប្ដី​បានមក​ធ្វើ​កម្មករ​ឡឥដ្ឋ​ឲ្យ​ជនរងគ្រោះ​រយ:ពេល​មួយឆ្នាំ​មកហើយ ដោយឃើញគាត់ (ជនសង្ស័យ)នៅក្មេងពេក ក៏កើតចិត្តអាណិតក៏​យកមក​បម្រើ​ការងារ​ក្នុងផ្ទះ​វិញ។ លុះដល់ថ្ងៃកើតហេតុ ជនរងគ្រោះក៏បានទៅផ្សារដើម្បីទិញម្ហូប ដោយការទុកចិត្តពេកខ្លាំងពេក ក៏ប្រាប់ឲ្យជនសង្ស័យនៅផ្ទះ ដើម្បីធ្វើការបោសសំអាតនិងជូតផ្ទះ ដល់វេលាម៉ោង០៨ ជនរងគ្រោះក៏បានត្រឡប់មកពីផ្សារវិញ ហើយបានឃើញទ្វារបន្ទប់ប្លែក ក៏ដើរចូលទៅក្នុងបន្ទប់ បើក​ទូរ​កញ្ចក់​មើល​ស្រាប់តែ​ឃើញ​បាត់​ខ្សែដៃ​ពេជ្រ០១ខ្សែ ជនរងគ្រោះ​ចេញមក​សួរ​ជនសង្ស័យ ជនសង្ស័យ​ប្រកែក​ថា​ខ្លួន​មិនបាន​យក​ទេ។ លុះដល់​ថ្ងៃទី២១ ខែសីហា ឆ្នាំ២០១៨ ជនសង្ស័យ​ក៏បាន​យក​ខ្សែដៃ​របស់​ជនរងគ្រោះ​ទៅ​លក់​ឲ្យ​អ្នកលក់​មាស​នៅ​ផ្សារ​ព្រែក​តា​មាក់ ស្រុក​ខ្សាច់កណ្ដាល ខេត្តកណ្ដាល ក្នុងតម្លៃ៥៨០,០០០រៀល រួច​ក៏​យកលុយ​នោះ​ទៅ​ឲ្យ​ម្ដាយ ហើយ​ជនសង្ស័យ​ក៏​មក​ផ្ទះ​ជនរងគ្រោះ​ធ្វើការ​តាម​ធម្មតា។ លុះ​មកដល់​ថ្ងៃទី២២ ខែសីហា ឆ្នាំ២០១៨ វេលា​ម៉ោង០៩,៣០នាទី ជនរងគ្រោះ​បាន​សួរនាំ​ជនសង្ស័យ​បន្តទៀត ជនសង្ស័យ​ក៏បាន​ឆ្លើយ​សារភាពថា​ខ្លួន​ពិតជា​បាន​លួច​ខ្សែដៃ​ជនរងគ្រោះ​យកមក​លក់​ឲ្យ​អ្នកលក់​មាស​នៅ​ផ្សារ​ព្រែ​កតា​មាក់ ស្រុក​ខ្សាច់កណ្ដាល ពិតប្រាកដ​មែន ក្នុងពេល​នេះដែរ​ជនរងគ្រោះ​បាន​ឃាត់ខ្លួន​ជនសង្ស័យ​ឲ្យ​សមត្ថកិច្ច​ប៉ុស្តិ៍ និង​ដាក់​ពាក្យបណ្ដឹង​នៅ​ប៉ុស្តិ៍​ឬ​ស្សី​ជ្រោយ ។ ក្រោយពីទទួលបានពាក្យបណ្ដឹង​រួច នៅវេលា​ម៉ោង០៩និង៣០នាទី​សមត្ថកិច្ច​ប៉ុស្តិ៍ បាន​នាំខ្លួន​ជនសង្ស័យ​ទៅ​ចង្អុលបង្ហាញ​ទីកន្លែង​អ្នកទិញ​នៅ​ផ្សារ​ព្រែ​កតា​មាក់ ហើយ​អ្នកទិញ​ឆ្លើយថា​ខ្លូន​ពិតជា​បាន​ទិញ​ខ្សែដៃ​នោះ​ពី​ជនសង្ស័យ​ពិតប្រាកដ​មែន ប៉ុន្តែ​ខ្សែដៃ​នោះបាន​ដុត​រំលាយ​អស់ហើយ។ ករណីនេះ​ផ្នែក​ជំនាញ​កំពុង​ស្រាវជ្រាវ​និង​បន្ត​នីតិវិធី​តាមច្បាប់៕ ដោយ៖ អាខ្មៅ