ភ្នំពេញ ៖ ជនសង្ស័យម្នាក់បានប្រើកាំបិតប៉័ងតោកាប់មកលើបុរស២នាក់ជាមន្ត្រីនគរបាលប៉ុស្ដិ៍ព្រែកឯង ដែលជាល្បាតក្នុងមូលដ្ឋានបណ្តាលឲ្យរបួសដៃនិងខ្លួនប្រាណ ខណះជនរងគ្រោះឃើញសកម្មភាពរបស់ជនសង្ស័យទំនងជាចង់រៀបចំចង់លួចយកម៉ូតូ ហើយត្រូវបានសមត្ថកិច្ចឃាត់ខ្លួន និងឆែកឆែរកឃើញមានកាំភ្លើងខ្លី និងថ្នាំញៀនថែមទៀត​ ។

ហេតុការណ៍នេះបានកើតឡើងនៅវេលាម៉ោង ០១កណ្តាលអាធ្រាត ឈានចូលថ្ងៃទី២៧ ខែសីហា ឆ្នាំ២០១៨ នៅចំណុចមុខដីឡូត៍គ្មានលេខ ផ្លូវបេតុង ភូមិរបោះអង្កាញ់ សង្កាត់ព្រែកឯង ខណ្ឌច្បារអំពៅ ។ សមត្ថកិច្ចបានឲ្យដឹងថា ជនសង្ស័យឈ្មោះ សរ មករា ភេទ ប្រុស អាយុ ៣៦ឆ្នាំ ជនជាតិ ខ្មែរ មុខរបរ កម្មករដឹកបន្លែ ស្នាក់នៅភូមិតាងៅ សង្កាត់និរោធ ខណ្ឌច្បារអំពៅ។ ចំណែកជនរងគ្រោះឈ្មោះ ទឹម ដុង ភេទ ប្រុស អាយុ ៣៥ឆ្នាំ ជនជាតិ ខ្មែរ មុខរបរ នគរបាលប៉ុស្តិ៍ព្រែកឯង ស្នាក់នៅភូមិចុង ព្រែក សង្កាត់ ព្រែកឯង ខណ្ឌច្បារអំពៅ។ សមត្ថកិច្ចបានបន្តឲ្យដឹងថា នៅវេលាម៉ោង០១រំលងអាធ្រាត ឈានចូលថ្ងៃទី២៧ ខែ សីហា ឆ្នាំ២០១៨ ជនរងគ្រោះ និងឈ្មោះ ខាន់ កុម្ភៈ ជាមន្រ្តីនគរបាលប៉ុស្តិ៍ព្រែកឯង បានល្បាតក្នុងមូលដ្ឋាន ពេលមកដល់ចំណុចកើតខាងលើ ក៏ឃើញជនសង្ស័យកំពុង ឈរជិតម៉ូតូម៉ាកសេ១២៥ ពណ៌ខ្មៅ ពាក់ស្លាកលេខ ភ្នំពេញ ១FU-៥៥៤០ ពេលនោះជនរងគ្រោះ និងឈ្មោះ ខាន់ កុម្ភៈ ក៏ធ្វើការត្រួតពិនិត្យរកឃើញក្រាមពណ៌សថ្លា (សង្ស័យគ្រឿងញៀន) ០១កញ្ចប់ថង់តូច, អាវុធខ្លីជ័រ០១ដើម និង កាំបិតប៉័ងតោ០១, កូនកន្ត្រៃ០១, ដែកកេះ០២, ទូរស័ព្ទដៃ ម៉ាកណូគារ ០១គ្រឿង និងដង្កាប់០១ ដែលជនសង្ស័យ លាក់ទុកនៅក្នុងការបូបស្ពាយក្រោយពណ៌ប្រផេះ ភ្លាមនោះជនសង្ស័យក៏ឆក់យកកាំបិតប៉័ងតោកាប់ទៅលើជនរង គ្រោះចំកដៃខាង ស្តាំរងរបួស រួចជនរងគ្រោះ និងឈ្មោះ ខាន់ កុម្ភៈ ក៏ធ្វើការឃាត់ខ្លួនជនសង្ស័យ រួមនិងវត្ថុតាង បញ្ជូនមក នគរបាលប៉ុស្តិ៍ព្រែកឯង តែម្តង។ បច្ចុប្បន្នជនសង្ស័យ និងវត្ថុតាងខាងលើ កំពុងតែឃុំខ្លួនបណ្ដោះអាសន្ន និងសាកសួរនៅអធិការដ្ឋាននគរបាលខណ្ឌច្បារអំពៅ ដើម្បីកសាងសាណុំរឿងបញ្ចូនបន្តទៅកាន់តុលាការសាលាដំបូងរាជធានីភ្នំពេញ ដើម្បីចាត់ការតាមនីតិវិធីច្បាប់៕ ដោយ៖ ភារ៉ា