ភ្នំពេញ ៖ ​​ជនជាតិវៀតណាមប្រុសស្រីចំនួន១៧នាក់ ដែលអគារស្នាក់នៅរបស់ពលករបរទេសស្ថិតផ្លូវលេខ២០០២ សង្កាត់ទឹកថ្លា ខណ្ឌសែនសុខ ត្រូវបានកម្លាំងចម្រុះរបស់នាយកដ្ឋានស៊ើបអង្កេត និងអនុវត្តនិតិវិធី នៃអគ្គនាយកដ្ឋានអន្តោប្រវេសន៍ ចុះឃាត់ខ្លួននៅព្រឹកថ្ងៃទី១ ខែកញ្ញា ឆ្នាំ២០១៨នេះ ក្រោយពីចុះត្រួតពិនិត្យ មិនឃើញមានឯកសារស្នាក់នៅ និងរកសុីខុសច្បាប់ ។

លោកឧត្តមសេនីយ៍​ឯក អ៊ុក ហៃសីឡា ប្រធាននាយកដ្ឋានស៊ើបអង្កេត និងអនុវត្តនីតិវិធីបានឲ្យដឹងថា ក្នុងកិច្ចប្រតិបត្តិការខាងលើនេះ ក្រុមកម្លាំងនាយកដ្ឋានអន្តោប្រវេសន៍ បានសហការជាមួយកម្លាំងស្នងការដ្ឋាននគរបាលរាជធានីភ្នំពេញ ស្ថិតក្រោមការសម្របសម្រួលពី លោក សៀង សុខ ព្រះរា​ជអាជ្ញារង នៃអយ្យការអមសាលាដំបូងរាជធានីភ្នំពេញ ដោយកម្លាំងជំនាញ​បានពិនិត្យឃើញជនបរទេសចំនួន​១៧នាក់ ស្រី​០៦នា​ក់ ជាជនជាតិវៀតណាម បាននិងកំពុងរកស៊ី និងស្នាក់នៅដោយគ្មានឯកសារ ពោលបានលួចឆ្លងដែនចូលប្រទេសកម្ពុជាខុស​ច្បាប់តែម្តង។ ក្រោយឃាត់ខ្លួនជនជាតិវៀតណាមទាំង​​១៧នាក់ខាងលើ​​​​ កម្លាំងសមត្ថកិច្ចដែលចុះប្រតិបត្តិការណ៍ខាងលើ បានបញ្ចូនខ្លួនជនសង្ស័យមកកាន់អគ្គនាយកដ្ឋានអន្តោប្រវេសន៍​ ដើម្បីសាកសួរ និងចាត់ការតាមនីតិវិធីបន្ត៕