ការឈ្លោះប្រកែក ការមិនពេញចិត្ត តែងតែកើតមានឡើង រាល់ក្នុងការប្រកួតនីមួយៗ។ តួយ៉ាងដូចជាការប្រកួត Miss Grand International 2018 ដែលមានកញ្ញា ឌី លីកា ជាបវកញ្ញា Miss Grand Cambodia កំពុងធ្វើការប្រកួតប្រជែងយ៉ាងស្វិតស្វាញ នៅប្រទេសភូមា ដោយមានការជួយគាំទ្រពីសំណាក់ពុកម៉ែ បងប្អូនកម្ពុជាទាំងអស់។ នៅក្នុងការបោះឆ្នោតបវរកញ្ញានេះផងដែរ គេសង្កេតឃើញមានការ ប៉ះទង្គិចគ្នាគឺជម្លោះពាក្យសម្តីរវាងអ្នកគាំទ្រកម្ពុជា និងអ្នកគាំទ្របវកញ្ញាប្រទេសមួយចំនួននៅក្នុងការប្រកួតប្រជែងមួយនេះ។
ជាក់ស្តែងនៅលើគណនីហ្វេសប៊ុករបស់ផេក Miss Grand Cambodia ផ្ទាល់ បានសូមអំពាវនាវដល់បណ្តាអ្នកគាំទ្រទាំងអស់ មេត្តាឈប់ជាបន្ទាន់នូវការយករូបបេក្ខនារីបវរកញ្ញានៃប្រទេសដទៃបន្តទៀតអី។ យ៉ាងណាមិញនៅក្នុងគណនីហ្វេសប៊ុកបានរៀបរាប់យ៉ាងលំអិតដូច្នេះថា៖
"សូមគោរព និងជម្រាបសួរប្រិយមិត្ត! គណៈកម្មការនៃកម្មវិធីប្រកួត Miss Grand Cambodia សូមទទូចម្តងហើយម្តងទៀត សូមមេត្តាប្រិយមិត្តមួយចំនួន ឈប់ជាបន្ទាន់នូវការយករូបបេក្ខនារីបវរកញ្ញានៃប្រទេសដទៃមកកែច្នៃ ឬបន្ថែមអ្វីមួយដែលប្រាកចាកការពិត ទោះនោះជារឿងពិតក៏ដោយ ប៉ុន្តែវាពុំមែនជារឿងមួយដែលគប្បី ឬសមគួរ ក្នុងនាមយើងជាខ្មែរ ក្នុងនាមយើងជាអំបូរអ្នកមានវប្បធម៌ខ្ពង់ខ្ពស់នោះឡើយ។ តើជារឿងគប្បី ឬត្រឹមត្រូវដែរឬទេ ក្នុងពេលដែលអ្នកគាំទ្របេក្ខនារីបវរកញ្ញារបស់ប្រទេសខ្លួន រួចវាយប្រហារចំពោះបេក្ខភាពប្រទេសដទៃ? អ្វីក៏ដោយ ប្រទេសណាមួយមានសកម្មភាពអ្វី ក៏គណៈកម្មការកម្មវិធីប្រកួត Miss Grand International តាមដាន និងកត់ត្រាទុកចំពោះបញ្ហាដែលបានកើតឡើងនោះដែរ។ សូមមេត្តាចូលរួមគាំទ្រ តែចំពោះបេក្ខភាពកម្ពុជា គឺគ្រប់គ្រាន់ហើយ។ សូមថ្លែងអំណរគុណ !"
គណៈកម្មការនៃកម្មវិធីប្រកួត Miss Grand Cambodia បានបន្តទៀតថា "ប្រសិនបើអ្នកបានជួបប្រទះ ឬអានឃើញ ផេកឬខមមិន ដែលនិយាយពីជនជាតិកម្ពុជា នៅក្នុងផ្លូវមិនល្អ សូមអ្នកទាំងអស់គ្នាកុំឆ្លើយតប.....សូមចុច Report ទៅកាន់ ហ្វេសប៊ុក។ ប្រសិនបើកាន់តែមានអ្នកចុច Report ច្រើន នឹងឃើញប្រសិទ្ធភាពកាន់តែលឿន ហើយ ហ្វេសប៊ុករបស់អ្នកទាំងនោះ នឹងត្រូវបាន ban ដោយប្រព័ន្ធរចនាសម្ព័ន្ធនៃហ្វេសប៊ុកដោយស្វ័យប្រវត្តិតែម្តង។ចំណែកអ្នកទាំងអស់គ្នាក៏គួរតែបញ្ឃប់ ការនិយាយពីអ្នកដ៏ទៃនៅក្នុងផ្លូវមិនល្អដូចគ្នាដែរ ពីព្រោះនឹងធ្វើឱ្យជនជាតិកម្ពុជាត្រូវបានគេមើលមកថាមិនល្អ ហើយអាចនឹងត្រូវបានចុច Report ដូចគ្នាដែរ"។
ប្រភព៖ Miss Grand Cambodia
