ភ្នំពេញៈ កាលពីថ្ងៃទី១៨ ខែវិច្ឆិកា ឆ្នាំ២០១៨ ស្ថិតនៅចំណុចផ្ទះជួលគ្មានលេខ តាមបណ្ដោយផ្លូវបេតុង ក្រុម១៣ ភូមិក្រោលគោ សង្កាត់គីឡូម៉ែត្រលេខ៦ ខណ្ឌឬស្សីកែវ រាជធានីភ្នំពេញ។ ក្មេងស្រីម្នាក់ មានឈ្មោះ គ.ច.ណ អាយុទើបតែ៥ឆ្នាំប៉ុណ្ណោះ ស្នាក់នៅចំណុចកើតហេតុខាងលើ ជាមួយស្ត្រីជាម្ដាយឈ្មោះ សូ ម៉ាណែត អាយុ៣៨ឆ្នាំ មុខរបរកម្មករ។ ដាច់ចិត្តទម្លាយរឿងប្រាប់ម្តាយ ក្រោយពីឪពុកចុងចិត្តខ្មៅ មានឈ្មោះ ឯក វ៉ាន់ដូច ហៅរ៉ា អាយុ២៨ឆ្នាំ មុខរបរកម្មករ។ ចាប់រំលោភនាងបានសម្រេចជាច្រើនដង ហើយស្ត្រីជាម្ដាយបានទៅប្ដឹងលោកវរសេនីយ៍ឯក គល់ យី អធិការខណ្ឌឬស្សីកែវ រហូតឈានដល់ការឃាត់ខ្លួនភ្លាមៗ។
លោកអធិការខណ្ឌឬស្សីកែវ បានបញ្ជាក់ទៀតថា មុនឈានដល់ការឃាត់ខ្លួនភ្លាមៗ បន្ទាប់ពីទទួលបានពាក្យបណ្ដឹងពីស្ត្រីជាប្រពន្ធ និងជាម្ដាយ តាមរយៈកូនស្រីដែលរងគ្រោះបានខ្សឹបប្រាប់ថា ឪពុកចុងរបស់នាង បានបង្ខំរំលោភសេពសន្ធវៈលើរូបរាងកាយនាងបានសម្រេចជាច្រើនដង មកហើយនាពេលកន្លងមក។
លោកបានបន្តថា ក្រោយពីឃាត់ខ្លួនបុរសជាប្ដី និងជាឪពុកចុង ដើម្បីយកមកធ្វើការសួនាំជាច្រើនម៉ោង រូបគេបានឆ្លើយសារភាពមុខសមត្ថកិច្ចថា មិនបានចាំថ្ងៃណានោះទេ ក្នុងអំឡុងខែ៧ ឆ្នាំ២០១៨នេះ គេបានរំលោភលើកូនស្រីចុងរបស់ខ្លួន នៅខាងលើផ្ទះក្នុងបន្ទប់ដេក បានសម្រេច១ដងទៅហើយ។
ជនសង្ស័យបានឆ្លើយសារភាពប្រាប់សមត្ថកិច្ចទៀតថា ក្រោយមកទៀត ក៏ពុំបានចាំថ្ងៃខែនោះដែរ រូបគេបានព្យាយាមរំលោភសេពសន្ធវៈម្ដងហើយ ម្ដងទៀតលើរូបរាងកាយកូនស្រីចុង ដែលមានវ័យទើបតែ៥ឆ្នាំនេះ បានសម្រេចរហូតដល់៣ ទៅ៤ដងបន្តទៀត ទើបបណ្ដាលឲ្យក្មេងស្រីរងគ្រោះទ្រាំពុំបាន និងទង្វើរបែបនេះ ក៏សម្រេចចិត្តទម្លាយរឿងទាំងអស់ប្រាប់ឲ្យស្ត្រីជាម្ដាយបានដឹង និងឈានដល់ការដាក់ពាក្យប្ដឹងសុំកិច្ចអន្តរាគមន៍ពីកម្លាំងនគរបាលឲ្យឃាត់ខ្លួនតែម្ដង។
លោកវរសេនីយ៍ឯក អធិការខណ្ឌឬស្សីកែវ បច្ចុប្បន្ននេះជនសង្ស័យដែលឃាត់ខ្លួន ក្នុងអំពើរំលោភសេពសន្ធវៈ លើកូនស្រីចុងរបស់ខ្លួន បាននិងកំពុងស្ថិតនៅក្រោមការឃុំខ្លួនបណ្ដោះអាសន្ន នៅអធិការដ្ឋាននគរបាលខណ្ឌ ក្នុងការកសាងសំណុំរឿង ដើម្បីបញ្ជូនទៅកាន់សាលាដំបូងរាជធានីភ្នំពេញ ចាត់ការទៅតាមនិតិវិធី ៕
