ភ្នំពេញ៖ នៅព្រឹកថ្ងៃទី២០ ខែឧសភា ឆ្នាំ២០២០នេះ កម្លាំងរាជអាវុធហត្ថ រាជធានីភ្នំពេញ បញ្ជូនខ្លួនជនសង្ស័យជាជនជាតិចិនចំនួន ១០នាក់ និងស្ត្រីជនជាតិភូមាម្នាក់ ទៅកាន់សាលាដំបូងរាជធានីភ្នំពេញ ដើម្បីប្រគល់ជូនខាងតំណាងអយ្យការ បើករណីស៊ើបសួរ និងឈានទៅរកការចោទប្រកាន់តាមច្បាប់ ពាក់ព័ន្ធលើករណី «បង្ខាំងមនុស្សដោយខុសច្បាប់» លើជនជាតិចិនដូចគ្នា និងជាប់ពាក់ព័ន្ធរឿងសារធាតុញ ៀនផងដែរ។

បើ​តាម​របាយការណ៍​របស់​អាវុធហត្ថ​រាជធានី​ភ្នំពេញ បាន​ឲ្យ​ដឹង​ថា ជនសង្ស័យ​ដែល​សមត្ថកិច្ច​អាវុធហត្ថ​រាជធានី​ភ្នំពេញ​បាន​ឃាត់ខ្លួនបញ្ជូនទៅតុលាការ ​រួម​មាន ​៖

ទី១- ឡូ​វ ពិន​ភេទ​ប្រុស អាយុ​៥០​ឆ្នាំ​ជនជាតិ​ចិន

ទី២- ឈិ​ន ស៊ី ភេទ​ប្រុស​អាយុ​៤៦​ឆ្នាំ​ជនជាតិ​ចិន

ទី៣- ស៊ុ​ង ជាំ​ង ភេទ​ប្រុស​អាយុ​៤៨​ឆ្នាំ​ជនជាតិ​ចិន

ទី៤- សោ ឆោ ភេទ​ប្រុស​អាយុ​៣៣​ឆ្នាំ ជនជាតិ​ចិន

ទី៥- វ៉ាង វិ​ន​ហ ភេទ​ប្រុស​អាយុ​៤៨​ឆ្នាំ ជនជាតិ​ចិន

ទី៦- ជា​យូ ជឺ ភេទ​ប្រុស អាយុ​៤៩​ឆ្នាំ ជនជាតិ​ចិន

ទី៧- ចូ​វ ហន ភេទ​ប្រុស អាយុ​៣៨​ឆ្នាំ ជនជាតិ​ចិន

ទី៨- ហង ឡុ​ង​ម៉ី​ង ភេទ​ប្រុស អាយុ​៣៩​ឆ្នាំ ជនជាតិ​ចិន

ទី៩- ហម ទិ​ប​ឈី ភេទ​ស្រី អាយុ​២៨​ឆ្នាំ​ជនជាតិ​ភូមា

និងទី១០- ងែ​ត ផល្លា ភេទ​ស្រី​អាយុ​៣៥​ឆ្នាំ​ជនជាតិ​ខ្មែរ ។

តាមរបាយការណ៍ របស់សមត្ថកិច្ចអាវុធហត្ថរាជធានីភ្នំពេញ បានឱ្យដឹងថា ជនរងគ្រោះ ជាជនជាតិចិនត្រូវបានចិនគ្នាឯង ចាប់បង្ខាំងតាំងពីអំឡុង ខែ០៣ ឆ្នាំ២០២០មកម្លេះ ព្រោះជនរងគ្រោះបានដឹងការសម្ងាត់របស់ក្រុមជនល្មើសដែលសុទ្ធតែ ជាក្រុមមនុស្សមានពិរុទ្ធភាព រកស៊ីខុសច្បាប់ និងត្រូវបានប៉ូលីសចិនតាមចាប់ខ្លួនផងដែរ ហើយនៅពេលនោះ ជនរងគ្រោះបានលួចផ្ញើសារ ទៅកាន់បងប្រុសខ្លួន នៅឯប្រទេសចិន ដើម្បីឲ្យរកមធ្យោបាយជួយរំដោះខ្លួន តែដោយសារស្ថានភាព នៅប្រទេសចិននាពេលនោះ កំពុងត្រូវបានជំងឺកូវីដ១៩រាតត្បាត បានធ្វើឱ្យបងប្រុសជនរងគ្រោះដែលមានឈ្មោះថា XIAO WEN YANG ភេទ​ប្រុស​អាយុ​៤៣​ឆ្នាំ ជនជាតិ​ចិន មុខរបរ​លក់ដូរ ទីលំនៅ​ភូមិ​អ៊ូ​ឆាង សង្កាត់​អឺ​ប៉ី ក្រុង​អឺ​ប៉ី ខេត្ត​ហ៊ូ​ប៉ី ពិបាកក្នុងការធ្វើដំណើរ ហើយក៏ត្រូវពន្យាពេលធ្វើដំណើររហូតមកដល់ថ្ងៃទី១៤ ខែឧសភា ឆ្នាំ២០២០នេះ ទើបងប្រុសជនរងគ្រោះ បានធ្វើដំណើរមកដល់កម្ពុជា និងបានទំនាក់ទំនងទៅកាន់សមត្ថកិច្ចកងរាជអាវុធហត្ថរាជធានីភ្នំពេញ ដើម្បីស្រាវជ្រាវស្វែងរករំដោះប្អូនប្រុសរបស់ខ្លួន។

ក្រោយពីអាវុធហត្ថ បានទទួលពាក្យបណ្តឹងភ្លាម ក៏ចាត់វិធានការស្រាវជ្រាវ រហូតឈានដល់ការកំណត់មុខសញ្ញា ជនល្មើសកំពុងស្នាក់នៅ ក្នុងខុនដូមួយកន្លែង ក្នុងខណ្ឌជ្រោយចង្វារ ទើបសមត្ថកិច្ចអាវុធហត្ថខណ្ឌជ្រោយចង្វារ សហការជាមួយកម្លំាងជំនាញនៃការិយាល័យប្រឆាំង ការជួញដូរមនុស្ស កងរាជអាវុធហត្ថរាជធានីភ្នំពេញ និងមានការសម្របសម្រួលដោយ លោក ហេង ផេង ព្រះ រាជអាជ្ញារង នៃអយ្យការអមសាលាដំបូងរាជធានី ភ្នំពេញបានចុះបង្ក្រាប និងឆេកឆេរបន្ទប់ចំនួន៤ ក្នុងទីតាំងខុនដូ ស្ថិតនៅចំណុចភូមិ៣ សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ និងបានឃាត់ខ្លួនក្រុមជនសង្ស័យចំនួន ១០នាក់ (បុរសចិន០៨នាក់ នារីភូមា០១នាក់ និងនារីខ្មែរ ជាអ្នកដាំបាយ០១នាក់) យកមកសាកសួរតាមវិធានការជំនាញ និងបានរំដោះជនរងគ្រោះ០១នាក់ ឲ្យមានសេរីភាព។

ក្រោយពេលសាកសួរ និងស៊ើបអង្កេតតាមវិធានការជំនាញ សមត្ថកិច្ចអាវុធហត្ថរាជធានីភ្នំពេញ បានរកឃើញថា ក្រុមជនសង្ស័យចំនួន ០៩នាក់ បានជាប់ពាក់ព័ន្ធករណីបង្ខាំងមនុស្សខុសច្បាប់៕