នៅមុននេះបន្តិច ស្នងការដ្ឋាននគរបាលខេត្តបាត់ដំបង បានឲ្យដឹងថា "ក្រុមការងារប្រតិកម្មរហ័សនៃស្នងការដ្ឋានន​គរ បាលខេត្តបាត់ដំបង​ មានកិត្តយសសូមជម្រាបជូនសាធារណ:ជន​ ពិសេសបងប្អូនដែលនិយម​ប្រេី ប្រាស់បណ្តាញសង្គមបានជ្រាបបន្ថែមថា​នៅព្រឹ​ក​ថ្ងៃ ព្រហ្បត្តិ ១៤កើត ខែ ជេស្ឋឆ្នាំជូតទោស័កព.ស.២៥៦៤ ត្រូវនឹងថ្ងៃទី៤ ខែ មិថុនា ឆ្នាំ​ ២០​២០​ នេះម្ចាស់គណនីហ្វេសប៊ុកឈ្មោះ​ ​So​cheata Pen បានចូលខ្លួនមកបំភ្លឺជុំវិញការ​សរ​សេរខ្លឹម​សារបង្ហោះដោយភ្ជាប់រូបភាពមន្រ្តីនគរ​បាលចរាចរណ៍ក្នុងកណីហ្វេសប៊ុករបស់ខ្លួនកាល​ពី​ថ្ងៃទី​០៣​ខែ​មិថុនា​ឆ្នាំ​២០២០នោះហេីយ។

នៅចំពោះមុខការសាកសួរបំភ្លឺនេះ​ ម្ចាស់គណនីខាងលេី​​ដែល​មានឈ្មោះពិតថា​​ ប៉ែន​ សុជាតា​ ភេទស្រី​ អា​យុ៣​៥ឆ្នាំ​ រស់នៅក្នុងក្រុងបាត់ដំបង​ បានសារភាពទទួល​ស្គាល់កំហុស​ថា​ គាត់ពិតជា​មានចេតនាសរ​សេរខ្លឹម​សារ​ ម្រមាថ​ មាក់​ងាយចំពោះមន្រ្តីនគរបាលចរាចរណ៍ដែលកំពុងឈរ​បំពេញភារកិច្ចតាមដងផ្លូវ​ប្រាកដមែន​ ព្រោះ​តែ​រូបគាត់​(ខឹង)ចំពោះមន្រ្តីនគរបាលចរាចរណ៍បានធ្វេីការផាក​ពិន័យគាត់ដោយសាររូបគាត់បាន​(ប្រេី​ប្រាស់ទូរ​ស័ព្ទដៃដោយមិនមានភ្ជាប់ឧបករ​ណ៍​​ទំនាក់​ទំនង)ក្នុងពេល​កំពុងបញ្ជាយានកាលពីថ្ងៃទី​ ០២​ ខែ​ មិថុ​នា​ ឆ្នាំ​២០២០​ នៅចំណុចភូមិ​កម្មករ​ សង្កាត់ស្វាយប៉ោ​ ក្រុងបាត់ដំបង​ ប៉ុន្តែគាត់​ពុំទាន់​បាន​បង់ប្រាក់ពិន័យនៅឡេីយ​ទេ។

ជាមួយនឹងការទទួលស្គាល់កំហុសនេះ​ សាមីខ្លួន​បានធ្វេីលិខិតសុំការអភ័យទោសចំពោះកំហុស​ឆ្គងរបស់គាត់ចំពោះកងកម្លាំងនគរបាលជាតិ​ទូទៅពិសេសនគរបាលចរាចរណ៍ក៏​ដូចជាអ្នក​ប្រេី​ប្រាស់បណ្តាញសង្គមទូទៅដែលគាត់​បាន​ប្រេីប្រាស់ពាក្យសំដីមិនសមរម្យជាមួយនៅក្នុងរឿង​នេះ។

ទោះជាយ៉ាងណាក៏ដោយ​ សិទ្ធិក្នុងការសម្រេច​ចំពោះចំណាត់ការលេីករណីនេះ​ ថ្នាក់ដឹកនាំស្នង​ការដ្ឋាននឹងពិនិត្យ​ ពិចារណាសម្រេចនៅពេលបន្ទាប់។ សេចក្តីដូចបានជម្រាបជូនខាងលេី​ សូមសាធារណ:ជន​ មេត្តាជ្រាប​ និងសូមបន្តចូលរួម​ សហការណ៍​ជាមួយសមត្ថកិច្ចនគរបាល​និងចូល​រួមគោរពច្បាប់ចរាចរណ៍ឱ្យបានត្រឹមត្រូវនិងខ្ជាប់ ខ្ជួនទាំងអស់គ្នា​ ដោយសេចក្តីគោរពបំផុត​"៕

ប្រភព៖ ស្នងការដ្ឋាននគរបាលខេត្តបាត់ដំបង