ក្រោមការយកចិត្តទុកដាក់ខ្ពស់របស់ ឯកឧត្តម ទៀ សីហា អភិបាលនៃគណៈអភិបាលខេត្ត ក្នុងការស្តារហេដ្ឋារចនាសម្ព័ន្ធក្នុងក្រុងសៀមរាប គម្រោងផ្លូវ និងលូជាច្រើនត្រូវលើកផែនការ និងសាងសង់ជាបន្តបន្ទាប់។
ជាក់ស្តែងនៅថ្ងៃទី១១ ខែមិថុនា ឆ្នាំ២០២០ ក្រុមការងារចម្រុះរដ្ឋបាលខេត្តបាន និងកំពុងដំណើរការអនុវត្តគម្រោងសាងសង់ផ្លូវបេតុង ទទឹង ៦ម៉ែត្រ កម្រាស់ ២០សង់ទីម៉ែត្រ បណ្ដោយប្រវែង ៨៣០ម៉ែត្រ កប់លូរំដោះទឹកកណ្តាលទ្រូងផ្លូវ មុខកាត់ ០.៨ម៉ែត្រ នៅភូមិធ្លកអណ្ដូង(ជាប់របង ធនាគារ អេស៊ីលីដា ភីអិលស៊ី សាខាផ្សារលេី) សង្កាត់ស្លរក្រាម ក្រុងសៀមរាប និងមានការពង្រីកផ្លូវតាមទំហំដែលបានកំណត់ដោយ គណៈកម្មការរដ្ឋបាលខេត្ត។
ការរុះរេីរបងប៉ះពាល់ដីចំណីផ្លូវ គឺជាសកម្មភាពគំរូរបស់បងប្អូនប្រជាពលរដ្ឋ ក្នុងការចូលរួមអភិវឌ្ឍន៍ប្រព័ន្ធហេដ្ឋារចនាសម្ព័ន្ធនៅក្នុងខេត្តសៀមរាប។ ជាមួយគ្នានេះ រដ្ឋបាលខេត្ត ថ្នាក់ដឹកនាំខេត្ត សូមថ្លែងអំណរគុណយ៉ាងជ្រាលជ្រៅដល់បងប្អូនប្រជាពលរដ្ឋរស់នៅតាមបណ្ដោយផ្លូវនេះដែលបានចូលរួមសហការជាមួយអាជ្ញាធរខេត្ត អាជ្ញាធរមូលដ្ឋាន ដេីម្បីអភិវឌ្ឍន៍មូលដ្ឋានរបស់ខ្លួន។
អាស្រ័យដោយគម្រោងកំពុងដំណេីរការសាងសង់ ដូចនេះបងប្អូនប្រជាពលរដ្ឋដែលធ្លាប់ប្រេីប្រាស់ និងធ្វេីចរាចរណ៍តាមបណ្ដោយផ្លូវនេះ សូមបង្វែរមកធ្វេីចរាចរណ៍តាមផ្លូវភោជនីយដ្ឋានស្យ៉ាមស៊ីហ៊្វូត ឬតាមផ្លូវ ៦០ម៉ែត្រវិញ។
សូមបញ្ជាក់ថា ទិសដៅការងារឆ្នាំ២០២០ របស់រដ្ឋបាលខេត្តសៀមរាប បានកំណត់យកការងារបើកផ្លូវ និងការសាងសង់ផ្លូវ ជាការងារអាទិភាពតាមរយៈសេចក្តីសម្រេចសន្និបាតបូកសរុបលទ្ធផលការងារប្រចាំឆ្នាំ២០១៩ និងលើកទិសដៅការងារឆ្នាំ២០២០ របស់រដ្ឋបាលខេត្ត៕
ប្រភព៖ រដ្ឋបាលខេត្តសៀមរាប
