ភ្នំពេញ៖ រដ្ឋមន្រ្តីក្រសួងការបរទេស និងពាណិជ្ជកម្មហុងគ្រី លោក ភីតធើ ស៊ីចាតូ បានបញ្ជាក់ថា លោក បានជាពីជំងឺកូវីដ ១៩ហើយ បន្ទាប់ពីសម្រាកព្យាបាល អស់រយៈពេល១៧ថ្ងៃ។ នៅថ្ងៃទី២០ ខែវិច្ឆិកា ឆ្នាំ២០២០នេះ នៅលើបណ្តាញទំនាក់ទំនង របស់លោក បានបង្ហោះសារថា "វាបានបញ្ចប់ហើយ ក្រោយថ្ងៃអង្គារ ការធ្វើតេស្តរបស់ខ្ញុំនៅថ្ងៃនេះ គឺ"អវិជ្ជមាន"។
គួរបញ្ជាក់ផងដែរថា លោក ភីតធើ ស៊ីចាតូ ត្រូវបានរកឃើញកើតជំងឺកូវីដ ១៩ កាលពីថ្ងៃទី០៤ ខែវិច្ឆិកា បន្ទាប់ពីបញ្ចប់ដំណើរទស្សនាកិច្ចនៅកម្ពុជា និងបន្តដំណើរទស្សនាកិច្ចនៅក្នុងប្រទេសថៃ។ ដោយសារការរកឃើញជំងឺកូវីដ ១៩ លោក ស៊ីចាតូ មិនបានធ្វើទស្សនកិច្ចនៅប្រទេសថៃ នោះឡើយ ហើយលោកត្រូវបានដឹកតាមយន្តហោះពិសេសត្រឡប់ទៅប្រទេសហុងគ្រីវិញ។
បើទោះបីក្នុងកំលុងពេលព្យាបាលជំងឺកូវីដ ១៩នេះ លោកនៅតែបន្តធ្វើការងាររបស់លោក និងជួបជាមួយដៃគូសន្ទនារបស់លោកជាប្រក្រតីតាមរយៈប្រព័ន្ធវីដេអូ។ លោក ភីតធើ ស៊ីចាតូ អរគុណអ្នកដែលបានចងចាំ គាំទ្រ អ្នកដែលផ្ងើសារ និងអ្នកដែលបានសួរសុខទុក្ខលោក។
