កម្ពុជា​ដោះលែង​ក្រពើទឹកសាប ដែល​ជិត​ផុត​ពូជ​ត្រឡប់​មក​វិញ​ក្នុង​ព្រៃ​ ជា​​ច្រើនក្បាល ​នៅក្នុងខេត្ដកោះកុង

នេះបើយោងតាមសារព័ត៌មានចិនស៊ីនហួរ​បាន​រាយការណ៍​ថា លោក Pablo Sinovas អ្នក​គ្រប់​គ្រង​សត្វព្រៃ ​​នៃ​សមាគម​សត្វព្រៃ និង​រុក្ខជាតិ​អន្តរជាតិ  (FFI) នៅ​កម្ពុជា​​អ្នក​អភិរក្ស​ក្នុង​តំបន់​ បានរួមគ្នាធ្វើការបញ្ចេញ​សត្វ​ក្រពើទឹកសាប ​ ឬ​ក្រពើ​សៀម ដែល​គេ​ស្គាល់​ថា​ជា​ក្រពើ​ទឹកសាប​របស់​ថៃ ឱ្យត្រឡប់ទៅរស់នៅក្នុងព្រៃក្នុងទឹកដីខេត្តកោះកុង ភាគនិរតីនៃប្រទេសកម្ពុជា។ 


របាយការណ៍បញ្ជាក់ថា កាលពីថ្ងៃពុធ ទី៦ ខែមេសា កន្លងទៅនេះ ក្រុមអ្នកអភិរក្សបាននិយាយថា ក្រពើសៀមជិតផុតពូជចំនួន ២៥ក្បាល ត្រូវបានដោះលែងមកក្នុងព្រៃកម្ពុជាក្នុងខែមីនា ឆ្នាំ២០២២ ទាំងអស់ជាមួយនឹងឧបករណ៍តាមដាន និងបីក្បាលដែលមានផ្លាកសញ្ញាផ្កាយរណប។ នេះបង្កើនក្តីសង្ឃឹមសម្រាប់ការអភិរក្ស និងការរស់រានមានជីវិតយូរអង្វែងនៃប្រភេទសត្វក្រពើនេះ។


ក្រពើទឹកសាប ឬហៅម្យ៉ាងទៀតថា ក្រពើសៀម (  The Siamese crocodile ) មានដើមកំណើតនៅប្រទេសថៃ ឡាវ កម្ពុជា វៀតណាម បូណេអូ។ កោះជ្វា និង​កោះ​ស៊ូម៉ាត្រា​របស់​ប្រទេស​ឥណ្ឌូណេស៊ី វា​ជា​ក្រពើ​ទំហំ​មធ្យម​ប្រវែង​ប្រហែល ៣-៤ ម៉ែត្រ។  ជាងនេះផងដែរប្រភេទ​សត្វ​នេះ​កំពុង​រង​គ្រោះ​ជិត​ផុត​ពូជ​ហើយ​បាន​ផុត​ពូជនៅក្នុងតំបន់​ជា​ច្រើននៅលើពិភពលោក។

 ​