សាលាឧទ្ធរណ៍បាត់ដំបង នៅកាលពីថ្ងៃទី៧ ខែឧសភា ឆ្នាំ២០២៥នេះ បានសម្រេចតម្កល់ការសម្រេចរបស់សាលាដំបូងខេត្តសៀមរាប ទុកជាបានការដដែល ក្នុងសំណុំរឿងប្ដឹងផ្ដល់គ្នារវាងឈ្មោះ សម្បត្តិ កុសល និងឈ្មោះ ចិន ស្រីដា។ ការសម្រេចនេះ ធ្វើឡើងក្រោយឈ្មោះ សម្បត្តិ កុសល ប្ដឹងជំទាស់ចំពោះការសម្រេចរបស់សាលាដំបូងខេត្តសៀមរាប ដែលព្យួរទោសឈ្មោះ ចិន ស្រីដា។
យ៉ាងណាមិញក្រោយឃើញ ម្ចាស់បំណុល ចាញ់ក្តីកូនបំណុលបែបនេះ លោក ផែង វណ្ណះ បានបង្ហោះសំណេរដូច្នេះថា ៖« ប្អូនស្រីចាញ់ក្ដីតាមតាមផ្លូវច្បាប់ដែល កូនបំណុលថោកទាបប្ដឹង ពីបទ គំរាមហែកកេរ្តិ៍ តែប្អូនស្រីឈ្នះចិត្ត ជាពិសេសឆក់យកបេះដូងប្រជាពលរដ្ឋកម្ពុជាបានច្រើនលេីសលប់ដែលគាំទ្រប្អូនស្រីលេីបណ្ដាញសង្គមហ្វេសប៊ុក ។ គោលបំណងរបស់កូនបំណុលចង់យកប្អូនស្រីដាក់ពន្ធនាគារ បរាជ័យហើយ សម្លេងមហាជនសំខាន់ណាស់ អាចជួយប្អូនបាន ។ ប្អូនស្រីមិនបាច់ប្ដឹងសារទុក្ខទៅតុលាការកំពូលទេ គឺទទួលយកការសម្រេចរបស់សាលាឧទ្ធរណ៍បាត់ដំបងតែម្ដងទៅ ។
បន្ទាប់មកប្អូនស្រីគួររកមេធាវីរៀបចំពាក្យបណ្ដឹង ប្ដឹងទាមទារលុយ និងស្នេីសុំអោយតុលាការឃាត់ផ្ទះសំបែងដីធ្លី ដែលជាកម្មសិទ្ធិរបស់កូនបំណុលដេីម្បីទូទាត់បំណុល ។ បេីកូនបំណុលមិនសង សំណូមពរអោយតុលាការរឹបអូសទ្រព្យសម្បត្តិលក់ឡៃឡុងសងបំណុលប្អូនស្រីវិញ » ។
គួររំលឹកផងដែរថា ឈ្មោះ ចិន ស្រីដា ជាម្ចាស់បំណុលរបស់ឈ្មោះ រាំង ភិរម្យ ហើយ រាំង ភិរម្យ មានប្តីឈ្មោះ សម្បត្តិ កុសល ជាស្នងការរងខេត្តបន្ទាយជ័យ។ ឈ្មោះ សម្បត្តិ កុសល បានប្តឹងឈ្មោះ ចិន ស្រីដា ទៅតុលាការពីបទគំរាមកំហែងបង្ហោះសារបរិហារកេរ្តិ៍លោក ក្នុងរឿងដែលប្រពន្ធខ្លួនបានខ្ចីបំណុល អំពីការពាក់ព័ន្ធទៅនឹងការដំឡើងបុណ្យស័ក្ត ៕
