ភ្នំពេញ ៖ នារីពពោះ៣ខែម្នាក់ បានដួលផ្កាប់មុខអូសជាមួយម៉ូតូជិត៥ម៉ែត្រ ខណៈកំពុងជិះម៉ូតូជាមួយប្ដី តែត្រូវបុរសស្រវឹងស្រាម្នាក់​ជិះម៉ូតូមួយគ្រឿង ក្នុងល្បឿនយ៉ាងលឿន ជ្រុល​ទៅបុកពីក្រោយពេញទំហឹង។

គ្រោះថ្នាក់ចរាចរណ៍នេះ បង្កការភ្ញាក់ផ្អើលយ៉ាងខ្លាំង ​កាលពីវេលាម៉ោង១០៖១០នាទីយប់ថ្ងៃសៅរ៍​ ទី១៩ ខែឧសភា​​ ឆ្នាំ២០១៨ នៅត្រង់ចំណុចស្តុប មុខឃ្លាំងស្រាបៀរក្រុមហ៊ុន Anchor តាមបណ្ដោយផ្លូវ៣៧១ ស្ថិតក្នុងសង្កាត់បឹងទំពុន២ ខណ្ឌមានជ័យ​ រាជធានីភ្នំពេញ​។ តាមប្រភពព័ត៌មានពីប្រជាពលរដ្ឋដែលឃើញហេតុការណ៍បានប្រាប់ឲ្យ​ដឹងថា​ មុនពេលកើតហេតុ គេឃើញ បុរសម្នាក់ជិះម៉ូតូ​មួយគ្រឿង​ម៉ាក​ Dream ពណ៌ខ្មៅ​ ពាក់ស្លាកលេខភ្នំពេញ​ 1CU-2865 ឌុបនារីម្នាក់ទៀតជាប្រពន្ធ (មានផ្ទៃពោះ៣ខែ) ដោយធ្វើដំណើរពីកើតទៅលិច​ ខណៈមកដល់ចំណុចកើតហេតុ ស្រាប់តែមានម៉ូតូមួយគ្រឿង ម៉ាក Dream សង់ ពណ៌ខ្មៅ​ ពាក់ស្លាកលេខកណ្ដាល​ 1O-4722 បើកបរដោយបុរសម្នាក់​ ស្ថិតក្នុងស្ថានភាពស្រវឹងស្រាទន់ខ្លួន​នោះ ដោយធ្វើដំណើរស្របទិសគ្នាពីកើតទៅលិច ក្នុងល្បឿនល្បឿន បានជ្រុលទៅបុកម៉ូតូ Dream របស់ពីរនាក់ប្ដីប្រពន្ធខាងលើពីក្រោយពេញទំហឹង បណ្ដាលឲ្យបុរសជាប្ដីរងរបួសស្រាល នារីជាប្រពន្ធខ្ទាតដួលផ្កាប់មុខអូសទៅជាមួយម៉ូតូជិត៥ម៉ែត្រ រលោតដៃជើង​បន្តិចបន្តួច​ប៉ុណ្ណោះ​ តែឈឺចុកពោះខ្លាំង ចំណែកឯបុរសម្នាក់ដែលស្រវឹងនោះរងរបួសស្រាល។ ក្រោយពេលកើតហេតុនារីជាប្រពន្ធដែលមានផ្ទៃពោះ៣ខែនោះ ត្រូវបានសាច់ញាតិ និងគ្រួសារដឹកយកទៅពិនិត្យមើលផ្ទៃពោះ​ នៅគ្លីនិកឯកជន សួគ៌ា។ ចំណែកម៉ូតូទាំង២គ្រឿងត្រូវបានសមត្ថកិច្ចយកទៅរក្សាទុកនៅប៉ុស្តិ៍នគរបាលបឹងទំពុន២ រង់ចាំភាគីទាំងសងខាងចូលមកដោះស្រាយគ្នា៕