ខេត្តបាត់ដំបង ៖ នៅ​ថ្ងៃទី​២៤ ខែឧសភា ឆ្នាំ​២០១៨​ មន្ត្រី​សាខា​កាំកុងត្រូល​បាត់ដំបង បាន​សហការ​ជាមួយ មន្ត្រី​មន្ទីរ​ពាណិជ្ជកម្ម និង​អាជ្ញាធរ​ដែនដី បានចុះបង្ក្រាប ឃាត់បាន​ពងមាន់​២៧០​កញ្ច្រែង ស្មើនឹង​៨.១០០​គ្រាប់ ដែល​ខូចគុណភាព នាំចូល​ពី​ប្រទេស​ថៃ នៅ​ចំណុចមាត់ច្រក​ប៉ុស្តិ៍​អន្តរជាតិ​ដូង ស្រុក​កំរៀង ខេត្តបាត់ដំបង ។

លោក ហាក់ សុខ​រិ​ន ប្រធាន​សាខា​កាំកុងត្រូល​ខេត្តបាត់ដំបង បាន​ឲ្យ​ដឹងថា ដើម្បី​ទប់ស្កាត់​បទល្មើស​លួច​ដឹកទំនិញ​ខូចគុណភាព នាំចូល​ពី​ប្រទេស​ថៃ និង​យកចិត្តទុកដាក់​ចំពោះ​សុខភាព​ប្រជាពលរដ្ឋ សមត្ថកិច្ច​ជំនាញ បាន​សហការ​ជាមួយ មន្ត្រី​មន្ទីរ​ពាណិជ្ជកម្ម នគរបាល គយ និង​អាជ្ញាធរ​ដែនដី បាន​ស្ទាក់ចាប់​ទំនិញ​មាន​ពងមាន់​២៧០​កញ្ច្រែង​ស្មើនឹង ៨.១០០​គ្រាប់ ដែល​ឈ្មួញ​បាន​ដឹក​តាម​រទេះ​ចូលមក​សម្រាប់ធ្វើ​ការចែក​ចាយ​ក្នុង​ដី​ខ្មែរ​។​ ​លោក​ប្រធាន​សាខា​កាំកុងត្រូល បាន​បញ្ជាក់ថា អាជីវករ​ខិលខូច​មួយចំនួន​តូច នៅតែ​លួច​នាំចូល​ទំនិញ​ខូចគុណភាព​យកមក​លក់​ឲ្យ​ពលរដ្ឋ​ខ្មែរ ដោយ​មិនបាន​គិតពី​ផលប៉ះពាល់​សុខភាព​អ្នកណា​ឡើយ គិតតែ​ពី​ផលប្រយោជន៍​ផ្ទាល់ខ្លួន​ជាធំ តែ​ទោះជា​យ៉ាងណាក៏ដោយ​មន្ត្រី​ជំនាញ នៅតែ​តាម​ប្រ​ម៉ាញ់​ទប់ស្កាត់បាន​ទាន់ពេលវេលា​រហូតមក ទោះ​ពួកគេ​បាន​ប្រើប្រាស់​ក្នុង​រូបភាព​ណាក៏ដោយ​។​ ក្រោយពី​ធ្វើការបង្ក្របរួចហើយនោះ ក្រុមមន្ត្រី បាន​យក​ពងមាន់​ដែល​ខូចគុណភាព​នោះ បំផ្លាញចោល​ទាំងអស់​៕​ ដោយ៖ ភារ៉ា