ភ្នំពេញ៖ ថ្ងៃទី២៥ ខែឧសភា​ ឆ្នាំ២០១៨​ សេចក្តីរាយការណ៍បានអោយដឹងថាមន្ត្រីប៉ូលិសម្នាក់ដែលប្រើអំពើហឹង្សាទៅលើជនរងគ្រោះកាលពីយប់ថ្ងៃទី២៤ ខែឧសភា​ ឆ្នាំ២០១៨នេះ ពេលនេះត្រូវបានការិយាល័យព្រហ្មទណ្ណកំពុងសាកសួរ និងកសាងសំណុំរឿងតាមនីតិវិធី ។

កាលពីរម្សិលមិញនេះមានហេតុការណ៏ភ្ញាក់ផ្អើលមួយ ត្រូវបាន សមត្ថកិច្ចមួយក្រុមមានគ្នាប្រមាណ៤ទៅ៥នាក់ស្លៀកពាក់ស៊ីវិល និងមានម្នាក់ពាក់ឯកសណ្ឋាននគរបាល សុទ្ធតែមានកាន់វិទ្យុទាក់ទង និងអាវុធខ្លី មកធ្វើសកម្មភាពចាប់ និងវាយយុវជនរូបនោះបណ្ដាលឲ្យរងរបួសធ្ងន់ធ្ងរ រួចហើយចាប់អូសឡើងលើម៉ូតូកង់បីឥណ្ឌា និងបានយកទៅទម្លាក់ចោល នៅក្នុងក្រសួងមហាផ្ទៃ ដោយគេមិនដឹងថាជាករណីអ្វីនោះទេ ។ ជនរងគ្រោះឈ្មោះ អ៊ឹម បញ្ញា ភេទប្រុស អាយុ ២៤ឆ្នាំ ស្នាក់នៅផ្ទះលេខ ៣៨៤ ផ្លូវលំ ភូមិរោងចក្រ សង្កាត់គោកឃ្លោង ខណ្ឌសែនសុខ រាជធានីភ្នំពេញ។ ចំណែកមន្ត្រីប៉ូលិសដែលប្រើហឹង្សាទៅលើជនរងគ្រោះឈ្មោះ សុន ពិសាល ភេទប្រុស អាយុ ២៥ឆ្នាំ ជាមន្រ្តីនគរបាលនៅនាយកដ្ឋាននគរបាលបច្ចេសទេសនិងវិទ្យាសាស្រ្ត អត្តលេខ ៧៤៨៤០ មានឋានន្តរស័ក ព្រិន្ទបាលឯក ឋានៈ នាយរងផ្នែកបន្ទប់ពិសោធន៏ ។ សាក្សីដែលឃើញហេតុការណ៍បានឲ្យដឹងថា មុនពេលកើតហេតុ គេឃើញយុវជនម្នាក ត្រូវបានសមត្ថកិច្ចមានគ្នាប្រមាណ៤ទៅ៥នាក់ស្លៀកពាក់ស៊ីវិល និងមានម្នាក់ពាក់ឯកសណ្ឋានប៉ូលិស សុទ្ធតែមានកាន់វិទ្យុទាក់ទង និងអាវុធ។ សាក្សីបន្តថា ពេលនោះសមត្ថកិច្ចទាំងនោះបានធ្វើសកម្មភាព ចាប់ និងវាយយុវជនរូបនោះ រួចហើយចាប់អូសឡើងលើម៉ូតូកង់បីឥណ្ឌា និងបានយកទៅទម្លាក់ចោល នៅក្នុងក្រសួងមហាផ្ទៃ។ សូមបញ្ជាក់ថា ជនរងគ្រោះរងរបួសធ្ងន់ត្រង់ចិញ្ចើមខាងស្តាំ និងដៃមានជាប់ខ្នោះនៅឡើយពេលនាំ មកដល់មន្ទីរពេទ្យ។ ប្រភពៈ ណុត