ភ្នំពេញ៖ កាលពីវេលាម៉ោង១១និង៣០នាទី ថ្ងៃទី៣ ខែមិថុនា ឆ្នាំ២០១៨ នៅតាមបណ្តោយផ្លូវព្រះនរោត្តម ត្រង់ចំណុចមុខស្ថានទូតថៃ ស្ថិតក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ រថយន្តម៉ាកកាមរីឆ្លាមរ៉េចង្កូតទៅបុករបាំងថ្មទ្រូងផ្លូវ បណ្តាលឲ្យដួលរលំទ្រូងផ្លូវខូចខាតអស់២កង់ កល់ជាប់បើកទៅមុខស្ថានទូតថៃ។

បើតាមសម្តីរបស់សមត្ថកិច្ចបានប្រាប់ឲ្យដឹងថា មុនពេលកើតហេតុ គេឃើញបុរសម្នាក់ បើករថយន្តកាមរីឆ្លាម ពណ៌ស មួយគ្រឿង ពាក់ស្លាកលេខ ភ្នំពេញ 2AC-8853 ទិសដៅពីត្បូងទៅជើងក្នុងល្បឿនលឿន។ លុះមកដល់ចំណុចកើតហេតុ​ ស្រាប់តែរថយន្តជ្រុលចង្កូតទៅបុករបាំងថ្មទ្រូងផ្លូវ បណ្តាលឲ្យដួលរលំទ្រូងផ្លូវខូចខាតអស់២កង់។ ចំណែករថយន្តរងការខូចខាតផ្នែកខាងមុខយ៉ាងដំណំ និងផ្ទុះបែកកង់ខាងក្រោយ រួចកល់ឡើងលើទ្រូងផ្លូវ បើកទៅមុខលែងរួច​ តែសំណាងល្អមិនបង្កឲ្យមានអ្នករងរបួសនោះទេ។ ក្រោយពេលកើតហេតុ សមត្ថកិច្ចជំនាញចរាចរណ៍ បានចុះមកធ្វើការវាស់វែង​ រួចយករថយន្តទៅរក្សាទុក​នៅការិយាល័យចរាចរណ៍ជើងគោក នៃស្នងការដ្ឋាននគរបាលរាជធានីភ្នំពេញ​ ​ដើម្បីរង់ចាំម្ចាស់រថយន្តចូលខ្លួនទៅដោះស្រាយការខូចខាតសម្បត្តិរដ្ឋតាមនីតិវិធី៕ ដោយៈ និត