ជាធម្មតាការធ្វើដំណើរតាមផ្លូវ អ្នកណាក៏ដូចជាអ្នកណាដែរ តែងតែរំពៃរកមើលបន្ទប់ទឹកជានិច្ច ដោយមិនអាចមានអ្នកណាអាចទ្រាំបាននោះទេ ជាពិសេសគឺរឿងបត់ដៃបត់ជើងហ្នឹងតែម្តង។ ដូចនេះហើយដើម្បីបង្កការងាយស្រួល ដល់ប្រជាពលរដ្ឋ ក្នុងការចូលបន្ទប់ទឹក មានហ្គារាស់ប្រេងឥន្ទនៈ ជាច្រើននៅកម្ពុជាបានរៀបចំជាបន្ទប់ទឹក ហើយខ្លះទៀតបានដាក់ស្លាកផ្សាយដាក់ថា មានបន្ទប់ទឹកស្អាត សម្រាប់ប្រើប្រាស់ ដើម្បីទាក់ភ្ញៀវមកចាក់សាំងនោះ។

ប៉ុន្តែនៅពេលនេះទាក់ទងនឹងបញ្ហាបន្ទប់ទឹកនេះ ស្រាប់តែ លោក ផៃ ស៊ីផាន អ្នកនាំពាក្យទីស្ដីការគណៈរដ្ឋមន្ដ្រី បានបញ្ចេញប្រតិកម្មថា ស្រុកខ្មែរ មានបន្ទប់អនាម័យ ដែលស្តង់ដារទទួលយកបាន ដូច្នេះការផ្សាយបែបនេះ គឺមានភាពអវិជ្ជមានសម្រាប់កម្ពុជា ។ យោងតាមគេហទំព័រហ្វេសប៊ុករបស់ លោក ផៃ ស៊ីផាន នៅថ្ងៃទី៣ ខែមិថុនា ឆ្នាំ២០១៨ បានសរសេរថា “គួរកុំនិយាយបន្ទប់ទឹកស្អាតជាអាទិភាព។ ស្រុកខ្មែរ មានបន្ទប់អនាម័យ ដែលស្តង់ដារទទួលយកបាន។ កិច្ចផ្សាយបែបនេះ គឺមានភាពអវិជ្ជមាន សម្រាប់កម្ពុជា” ៕ ប្រភពៈ អីក៏មាន