ភ្នំពេញ៖ ក្រុមក្មេងទំនើងត្រូវកម្លាំងនគរបាលខណ្ឌដង្កោចាប់ឃាត់ខ្លួនភ្លាមៗ ក៏ព្រោះក្រុមក្មេងទំនើងទាំងនេះបានជិះម៉ូតូបុកបារ៉ាស់ ខណៈដែលសមត្ថកិច្ចដាក់គោលដៅឆែកឆេរត្រួតពិនិត្យអាវុធរឹតបន្តឹងសន្តិសុខក្នុងមូលដ្ឋាន។

ការចាប់ឃាត់ខ្លួនក្រុមក្មេងទំនើងទាំងនេះនៅវេលាម៉ោង៧យប់ ថ្ងៃចន្ទ ៦រោច ខែជេស្ឋ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី៤​ខែមិថុនា ឆ្នាំ២០១៨ នៅលើកំណាត់ផ្លូវ២១៧ មុខវត្តសំបួរមាស ភូមិម័ល សង្កាត់ដង្កោ ខណ្ឌដង្កោរាជធានីភ្នំពេញ ។ លោកវរសេនីយ៍ត្រី ឈឹម ប៊ុនរ័ត្ន បានប្រាប់ថា កម្លាំងគណៈបញ្ជាការឯកភាពរដ្ឋបាលខណ្ឌដង្កោ តែងតែដាក់គោលដៅឆែកឆេរត្រួតពិនិត្យអាវុធដើម្បីរឹតបន្តឹងសន្តិសុខក្នុងមូលដ្ឋាន និងអនុវត្តគោលយោបាយភូមិសង្កាត់មានសុវតិ្ថភាពឲ្យបានល្អប្រសើរ ក៏ដូចជាបានកាត់បន្ថយបទល្មើសគ្រឿងញៀនជាដើម។ លោកវរសេនីយ៍ត្រី ឈឹម ប៊ុនរ័ត្ន បានបញ្ជាក់បន្ថែមថា​ ក្រោមពីកម្លាំងសមត្ថកិច្ចនគរបាលខណ្ឌដាក់គោលដៅជាប្រចាំនៅលើដងផ្លូវ២១៧នេះ សង្កេតឃើញថា បទល្មើសគ្រឿងញៀនត្រូវបានកាត់បន្ថយច្រើនដោយគ្មានការសារាចរណ៍ឆ្លងកាត់គោលដៅទៀតទេ។ គ្រាន់តែមានក្រុមក្មេងទំនើងជិះម៉ូតូលឿនហើយបុកបារ៉ាស់ ក្នុងគោលបំណងគេចគោលដៅត្រួតពិនិត្យហើយសមត្ថកិច្ចចាប់ឃាត់ខ្លួនធ្វើការណែនាំរួចធ្វើកិច្ចសន្យាតែប៉ុណ្ណោះ។ លោកថា នៅក្នុងមូលដ្ឋានខណ្ឌដង្កោមានប៉ុសិ៍្តរដ្ឋបាលចំនួន១៣ប៉ុសិ៍្ត និងមានគោលដៅ២៤ម៉ោងប្រហែល២កន្លែងសំខាន់ៗ ហើយគោលដៅនេះធ្វើឲ្យជនល្មើសមានការខ្លាចរអា។ ព្រោះថា ផ្លូវនីមួយៗនៅក្នុងមូលដ្ឋានខណ្ឌមិនអំណោយផលល្អដល់ជនល្មើសនោះទេ ភាគច្រើនគេរត់មិនរួច មានកម្លាំងពួនស្ទាក់ម៉ោងស្អុយ កម្លាំងរដ្ឋបាលប៉ុសិ៍្តនិមួយៗបានចេញល្បាតទាំងថ្ងៃ ទាំងយប់៕ ដោយ៖ភារ៉ា