ភ្នំពេញ៖ យុវជនម្នាក់ បានបើករថយន្តកុងតឺន័រមួយគ្រឿងដោយគ្មានព្រូ​នៅក្បែរ រួមទាំងងងុយដេកផងនោះ ក៏ជ្រុលចង្កូតទៅបុក​​ ចូលរោងបុណ្យ៧ថ្ងៃ បណ្ដាលឲ្យរងការខូចខាតយ៉ាងដំណំ សំណាងល្អមិនបង្កឲ្យមនុស្សសម្រាក់នៅក្នុងរោងបុណ្យរងរបួស ។

ហេតុការណ៍គ្រោះថ្នាក់ចរាចរណ៍ខាងលើនេះ បានកើតឡើងកាលពីវេលាម៉ោង១២ និង៥០នាទីរំលងអាធ្រាត ឈានចូលថ្ងៃពុធ ទី ០៦ ខែមិថុនា ឆ្នាំ ២០១៨ នៅក្បែរផ្សារបេសេ តាមបណ្តោយផ្លូវលេខ៣៧១ ស្ថិតក្នុងភូមិត្នោតជ្រុំ១ សង្កាត់បឹងទំពុនទី២ ខណ្ឌមានជ័យ រាជធានីភ្នំពេញ ។ យោងតាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេឃើញយុវជនម្នាក់បើករថយន្តកុងតឺន័រ ពណ៌ក្រហម ពាក់ស្លាកលេខភ្នំពេញ 3D-9332 បានធ្វើដំណើរតាមបណ្តោយផ្លូវ៣៧១ ទិសដៅពីកើតមកលិច ក្នុងល្បឿនយ៉ាងលឿន លុះមកដល់ចំណុចកើតហេតុ ក៏ជ្រុលចង្កូតទៅបុកចូលរោងបុណ្យ៧ថ្ងៃទាំងកំរោលតែម្ដង បណ្តាលឲ្យរោងបុណ្យ រងការខូចខាតយ៉ាងដំណំ តែសំណាងល្អមិនបង្កឲ្យមនុស្សដែលសម្រាកនៅក្នុងរោងបុណ្យ រងរបួសនោះទេ ។ ហើយភ្លាមៗ ម្ចាស់ដើមបុណ្យ និងម្ចាស់រោងបុណ្យ បានធ្វើការឃាត់ម្ចាស់រថយន្តបង្កនៅកន្លែងកើតហេតុ ។ បើតាមសម្ដីយុវជនម្នាក់ជាតៃកុងរថយន្តបង្កខាងលើបានប្រាប់ឲ្យដឹងថា រូបគេបានបើករថយន្តកុងតឺន័រតែម្នាក់ឯង ដោយដឹកស្រូវសាលី មកពីកំពង់ផែស្វែយាត់ភ្នំពេញ នៅផ្លូវជាតិលេខ១ បំណងយកទៅក្រុមហ៊ុនស្រាបៀរកម្ពុជា ហើយបើកឆ្លងកាត់តាមបណ្តោយផ្លូវ៣៧១ តែដោយសាររូបគេងួកមួយភាំង ក៏ជ្រុលចង្កូតទៅបុករោងបុណ្យ៧ថ្ងៃ បណ្តាលឲ្យបាក់ខ្ទេច រងការខូចខាតយ៉ាងដំណំ តែមិនបង្កឲ្យមនុស្សរងរបួសនោះទេ ។ អ្នកបើករថយន្តបង្កខាងលើមានឈ្មោះ សែម វីរៈបុត្រ ភេទប្រុស អាយុ២៥ឆ្នាំ មុខរបរបើករថយន្ត ស្នាក់នៅស្រុកកៀនស្វាយ ខេត្តកណ្ដាល ។ ក្រោយពេលកើតហេតុ សមត្ថកិច្ចមូលដ្ឋានបានចុះមកដល់ទីតាំងកើតហេតុ ហើយបានឲ្យតៃកុងរថយន្តបង្កទាក់ទងទៅខាងដំណាងរថយន្តមកជួយដោះស្រាយជាបឯម ព្រោះអី ករណីខាងលើនេះមិនបង្កឲ្យខូចខាតដល់សម្បត្តិរដ្ឋនោះទេ តែដោយសារភាគីរថយន្តបង្កគ្មានដំណោះស្រាយ ទើបសមត្ថកិច្ចមូលដ្ឋានទាក់ទងទៅជំនាញចរាចរណ៍ជើងគោករាជធានីភ្នំពេញ ចុះមកធ្វើការវាស់វែងយករថយន្តនឹងតៃកុងរថយន្ត ទៅស្នងការដ្ឋាននគរបាលរាជធានីភ្នំពេញ ដើម្បីរងចាំដោះស្រាយគ្នាតាមក្រោយ៕ ដោយៈ ភារ៉ា