ភ្នំពេញ ៖ រថយន្តធន់ធំចំនួន២គ្រឿងបើកបរខ្វះការប្រុងប្រយ័ត្ន​ ខណៈដល់ចំណុចផ្លូវកោងបានបុកគ្នាពេញទំហឹងបណ្តាលរថយន្តគៀបក្បាលជាប់គ្នារងការខូចខាតទាំងសងខាង នឹងបង្កឲ្យតៃកុងរថយន្តម្នាក់បានរងរបួសធ្ងន់ធ្ងរ​ កាលពីវេលាម៉ោង៣នឹង​ ២០នាទី​ ល្ងាចថ្ងៃពុធ ទី​០៦​ ខែមិថុនា​ ឆ្នាំ​ ២០១៨​ ស្ថិតនៅភូមិពងទឹង សង្កាត់ពងទឹក​ ខណ្ឌដង្កោ​ រាជធានីភ្នំពេញ​ ។

តាមការអោយដឹងពីពលរដ្ឋដែលរស់នៅក្បែរកន្លែងកើតហេតុបានអោយដឹងថា​ ដំបូងគេឃើញរថយន្តដឹកស្រាបៀរថៃហ្គរ​ ពាក់ស្លាកលេខ​ ភ្នំពេញ​ 3D-4976ធ្វើដំណើរតាមបណ្តោយផ្លូវព្រៃស​ ទិសដៅពីចំការដូងឡើងទៅផ្លូវជាតិលេខ៣​ ដោយបើកក្នុងល្បឿនលឿន​ ខណៈមកដល់ចំណុចផ្លូវកោង​ស្របពេលមានរថយន្តដឹកសីុម៉ង៍ធន់ធំមួយគ្រឿងកំពុងបើកបរទិសដៅបញ្ច្រាស់គ្នា​ក៏បណ្តាលអោយរថយន្តជាន់ហ្រ្វាំងមិនទាន់ជ្រុលបុកគ្នាពេញទំហឹងតែម្តង​ ។ ប្រភពដដែលបន្តថាភ្លាមៗនោះតៃកុងរថយន្តដឹកសីុម៉ង៍បានលូតចេញពីកាបិនមុខរងរបួសធ្ងន់ធ្ងរ​ ត្រូវបានរថយន្តសង្គ្រោះបន្ទាន់ដឹកយកទៅសង្គ្រោះនៅឯមន្ទីរពេទ្យ​ហើយអ្នកជិះរថយន្តដឹកស្រាបៀរថៃហ្គរមិនមានរងរបួសនោះទេ​ ចំណែករថយន្តទាំងពីរគ្រឿងបានរងនៅការខូចខាតផ្នែកខាងមុខទាំង​សងខាង។ សមត្ថកិច្ចមូលដ្ឋានបានបញ្ជាក់ថាជុំវិញករណីគ្រោះថ្នាក់ចរាចរនេះភាគីរថយន្តដឹកសីុម៉ង៍សម្រេចចេញចង់សង់ថ្លៃជួសជុលរថយន្តដឹកស្រាបៀរថៃហ្គរទាំងស្រុង​ ដើម្បីបញ្ចប់រឿងភ្លាមៗនៅនឹងកន្លែងកើតហេតុ​ ដោយសារដឹកថាការបើកបររបស់ខ្លួនចូលចំណីផ្លូវគេ​ ៕ ដោយ៖ ភារ៉ា