ភ្នំពេញ៖ រថយន្ត១គ្រឿងត្រូវបានខូចខាតយ៉ាងដំណំ ដោយសារតែខ្យល់បក់ខ្លាំងពេលមេឃកំពុងភ្លៀង បណ្ដាលដួលរលំដើមឈើដ៏ធំមួយដើម ហើយទាក់ខ្សែភ្លើង បង្កឲ្យរលំបង្គោភ្លើងមួយដើមមកចំពីលើរថយន្ត តែសំណាងល្អមិនមានអ្នករងរបួស ។

ករណីគ្រោះធម្មជាតិខាងលើនេះ បានកើតឡើងកាលពីវេលាម៉ោង១និង២០នាទីរសៀល ថ្ងៃទី៧ ខែមិថុនា ឆ្នាំ២០១៨ នៅតាមបណ្តោយផ្លូវព្រះមុនីវង្ស ក្បែរនិងច្រមុះជ្រូកក្បាលថ្នល់ ស្ថិតក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ។ តាមប្រភពព័ត៌មានពីប្រជាពលរដ្ឋដែលនៅក្បែកន្លែងកើតហេតុ បានឲ្យដឹងថា មុនដំបូងគឺមានខ្យល់បក់ជាខ្លាំង លាយឡំនិងភ្លៀងរលឹមស្រិចៗ ។ មួយសន្ទុះក្រោយមកស្រាប់តែបង្កឲ្យដើមឈើដ៏ធំមួយដើមបានបាក់រលំរៀបដល់ដី ហើយដោយសាតែខ្សែភ្លើងបានជាប់ជាមួយនិងដើមឈើដែលរលំនោះ ក៏បានទាញបង្គោលភ្លើងមួយដើម បណ្ដាលឲ្យបាក់សង្កត់ចំពីលើរថយន្តមួយគ្រឿងម៉ាក TOYOTA សាយអន ដែលម្ចាស់ចតនៅមុខផ្ទះ បណ្ដាលឲ្យរងការខូចខាតយ៉ាងដំណំ តែមិនបង្កគ្រោះថ្នាក់ដល់មនុស្សនោះឡើយ។ ក្រោយពេលកើតហេតុ សមត្ថកិច្ចបានចុះដល់ ចំណុចកើតហេតុហើយបានស្ទូចយកបង្គោភ្លើង ដើម្បីយកចេញពី លើរថយន្ត ។ ចំណែកដើមឈើត្រូវបានអាជ្ញាធរធ្វើការកាត់យកចេញដើម្បីកុំអោយស្ទះចរាចរណ៍ផងដែរ ។ ក្នុងនោះដែរ ម្ចាស់រថយន្តរងគ្រោះបានប្រាប់ឲ្យដឹងថា រថយន្តរបស់គាត់បានរងការខូចខាតដោយសារបង្គោលភ្លើង អញ្ចឹងហើយ គាត់នឹងដាក់ពាក្យបណ្ដឹងទៅអាជ្ញាធរ ដើម្បីឲ្យជួយអន្តរាគមន៍ដល់រូបផងដែរ ៕ ដោយៈ ភារ៉ា