ភ្នំពេញ៖​ កាលពីវេលាម៉ោងប្រមាណ១០ ៣០នាទីព្រឹកថ្ងៃទី១៩ ខែមិថុនា ឆ្នាំ២០១៨ សម្តេចព្រះមហាក្សត្រី នរោត្តម មុនិនាថ សីហនុ ទ្រង់បានយាងគោរពវិញ្ញាណក្ខន្ធសពអ្នកម្នាង អ៊ុក ផល្លារណប្ញទ្ធិ ដែលកំពុងត្រូវបានតម្កល់នៅវត្តបុទុមវត្តី ។ ពិធីបុណ្យសពអ្នកម្នាង អ៊ុក ផល្លារណប្ញទ្ធិ បានធ្វើឡើងនៅក្នុងបរិវេណ វត្ត​បុ​ទុម​វត្តី ខណ្ឌដូនពេញរាជ​ធា​នីភ្នំពេញ នឹងពិធីបូជា​សពនៅព្រឹ​ក​ថ្ងៃពុធ​ទី២០ ខែមិថុនា ឆ្នាំ២០១៨ នៅបរិវេណខាងមុខវត្តបុទុមវត្តី។ ​អ្នកម្នាង អ៊ុក ផល្លា បានទទួលមរណភាពដោយ​សារ​​​តែគ្រោះ​ថ្នាក់ចរាចរណ៍នៅលើផ្លូវជាតិលេខ៤ ចំណុចគីឡូម៉ែត្រលេខ២០០-២០១ ក្នុងភូមិអូរតាសេក ឃុំអូរចំណារ ស្រុកព្រៃណប់ ខេត្ដព្រះសីហនុ កាលពីថ្ងៃអាទិត្យ ទី១៧ ខែមិថុនា ឆ្នាំ២០១៨។

គណបក្សហ្វ៊ុនស៊ិនប៉ិច ក៏បានចេញសេចក្តីជូនដំណឹង អំពីការទទួលមរណភាពរបស់អ្នកម្នាង អ៊ុក ផល្លារណប្ញទ្ធិ ដោយឧបទ្ទវហេតុគ្រោះថ្នាក់ចរាចរណ៍ នៅពេលដង្ហែសម្តេចក្រុមព្រះ ព្រះប្រធានគណបក្សហ៊្វុនស៉ិនប៉ិច យាង​ទៅ​សំណេះសំណាល និងសួរសុខទុក្ខប្រជាពលរដ្ឋនៅខេត្តព្រះសីហនុ។ របាយការណ៍របស់សមត្ថកិច្ចបានបញ្ជាក់ថា គ្រោះថ្នាក់នេះ បានកើតឡើងដោយសាររថយន្តឈ្នួល​ហាយ​ឡែនឌើ បានព្យាយាមបើកជែងរថយន្តធំមួយបើកក្នុងទិសដៅស្របគ្នាក្នុងទិសដៅពីព្រះសីហនុ មកភ្នំពេញ ក៏ជ្រុល​ចូលទៅបុកព្រះទីនាំងសម្តេចក្រុមព្រះ ដែលមានទិសដៅផ្ទុយគ្នានោះតែម្តង។ គ្រោះថ្នាក់នេះ បានធ្វើឲ្យអ្នកម្នាង អ៊ុក ផល្លា ស្លាប់បាត់បង់ជីវិតពេលបញ្ជូនទៅសង្គ្រោះនៅមន្ទីរពេទ្យ។ ដោយឡែកសម្តេចក្រុមព្រះបានរងរបួសធ្ងន់ធ្ងរ។ រីឯភាគីរថយន្តហាយឡែនឌើវិញ ដែលមានអ្នក​ជិះរហូត​ដល់ទៅ៦នាក់ បានរងរបួសធ្ងន់ស្រាល តែបុរសជនជាតិចិនម្នាក់ ដែលជិះក្នុងរថយន្តហាយឡែនឌើដែរ គឺរងរបួសធ្ងន់ធ្ងរខ្លាំង ត្រូវបានបញ្ជូនមកសង្គ្រោះ នៅមន្ទីរពេទ្យក្នុងរាជធានីភ្នំពេញ។ អ្នកបើកបររថយន្តសម្តេចក្រុមព្រះ បានរងរបួសស្រាល ហើយថ្ងៃទី១៨ ខែមិថុនា តុលាការខេត្តព្រះសីហនុ ក៏បានចេញដីកាឃុំខ្លួនអ្នកបើករថយន្តតាក់ស៊ីដាក់ពន្ធនាគារផងដែរ៕ ប្រភព៖​ dara-news