ភ្នំពេញ​៖ នៅ​ថ្ងៃទី​២៧​ ខែ​មិថុនា​នេះ នគរបាល​ខណ្ឌ​ចំការមន​ ​បញ្ជូន​ជនសង្ស័យ​ ម៉ៅ​ ច័ន្ទ​រស្មី​ អនុប្រធាននាយកដ្ឋាន បច្ចេកទេសនិងអភិវឌ្ឍលំនៅឋាន នៃក្រសួងរៀបចំ​ដែនដី​ នគរូបនីយកម្មនិងសំណង់​ ទៅ​អយ្យការ​អម​សាលា ដំបូង​រាជធានី​ភ្នំពេញ​ ដើម្បី​សាកសួរ​ករណី ​បង្ក​គ្រោះថ្នាក់​ចរាចរ​ រួច​ដក​កាំភ្លើង​ភ្ជង់​គំរាម​ នគរបាល​ចរាចរណ៍​ ។

គួរបញ្ជាក់ផងដែរថា​ ជនសង្ស័យ ម៉ៅ ច័ន្ទរស្មី ជាម្ចាស់រថយន្តម៉ាកហាយឡែនឌ័រ ពណ៌ស ពាក់ផ្លាក​លេខភ្នំពេញ 2AF-9766​ ។ ចំណែកជនរងគ្រោះឈ្មោះ ហ៊ុន សំ សែនឧត្ដម ភេទប្រុស អាយុ ៣៥ឆ្នាំ ជា​បុគ្គលិក ក្រុមហ៊ុន ស្នាក់នៅនៅភូមិសន្សំកុសល២ សង្កាត់បឹងទំពុន១ ខណ្ឌមានជ័យ ជាម្ចាស់រថយន្តម៉ាកព្រូស ពណ៌ទឹកប្រាក់ ពាក់​ផ្លាក​លេខ ភ្នំពេញ 2AT-1914។ ហេតុការណ៍នោះបានកើតឡើងកាលពីយប់ថ្ងៃទី២៥ ខែមិថុនា ឆ្នាំ២០១៨ ក្រោយពីជនសង្ស័យ បានបើកបរក្រោមស្ថានភាពស្រវឹង បង្កគ្រោះថ្នាក់ចរាចរណ៍ បុករថយន្តគេចតស្ងៀម នៅចំណុចមុខ​សាលា វិទ្យាល័យផ្សារដើមថ្កូវ ផ្លូវលេខ ៤៨៨ សង្កាត់ផ្សារ ដើមថ្កូវ ខណ្ឌចំការមន ។ ក្រោយបង្កហេតុ​រួច ជនសង្ស័យបានព្យាយាម បើករថយន្តរត់គេច ។ ប៉ុន្តែត្រូវសមត្ថកិច្ចតាមចាប់ ពេលនោះជនសង្ស័យ បានដកកាំភ្លើងភ្ជង់គំរាម សមត្ថកិច្ចថែមទៀតផង​ ៕ ដោយ៖ និស្ស