ដល់ករហើយ! ទីបំផុតម្ចាស់រ៉ឺម៉កបានសុំទោសម្ចាស់រថយន្តជាលើកទី២ ព្រោះតែមានអ្នកខំមិន មិនសមរម្យ ហើយថែមទាំង... - សង្គម សិល្បៈ កម្សាន្ដ - Khmer News - The latest Cambodia News. Khmer Times is the region's fastest growing newspaper with daily insights into Cambodia and ASEAN

ដល់ករហើយ! ទីបំផុតម្ចាស់រ៉ឺម៉កបានសុំទោសម្ចាស់រថយន្តជាលើកទី២ ព្រោះតែមានអ្នកខំមិន មិនសមរម្យ ហើយថែមទាំង...

វីដេអូមួយធ្វើអោយមហាជនក្នុងបណ្ដាញសង្គមស៊ែរចែករំលែកគ្នាយ៉ាងច្រើនដោយពោលពាក្យគោរពចូលចិត្ត និងសរសើរចំពោះទឹកចិត្តម្ចាស់រថយន្ដទំនើបមួយគ្រឿងដែលសណ្ដោសប្រណីម្ចាស់រ៉ឺម៉កដែលគៀរឡានគាត់អោយរងការខូចខាត ។ តែផ្ទុយទៅវិញ បន្ទាប់ពីឃើញម្ចាស់រថយន្ត Land Cruiser ធ្វើការ Live វីដេអូទាំងយប់រយៈពេល ២ម៉ោងកន្លះដោយប្រតិកម្មខ្លាំងៗបង្ហាញការខកចិត្តចំពោះទង្វើអធ្យាស្រ័យរបស់ខ្លួនលើអ្នកបើករ៉ឺម៉ក និងទទួលបានមកវិញជាការចំអកឡកឡឺយ នៅព្រឹកម្សិលមិញ ម្ចាស់រ៉ឺម៉កបានសម្រេចសុំទោសម្ចាស់ឡានជាលើកទីពីរ។

តាមការអះអាងរបស់នារីជាម្ចាស់រថយន្តថា នៅថ្ងៃកើតហេតុបុរសជាអ្នកបើកបររ៉ឺម៉កបានជិះរុលទៅមុខទាំងផ្លូវចង្អៀត ធ្វើឲ្យកៀរឆ្កូតរថយន្តរបស់នាងផ្នែកខាងមុខ រួចនាងក៏ជិះតាមម្ចាស់រ៉ឺម៉កឲ្យឈប់ដើម្បីដោះស្រាយ និងទាមទារឲ្យម្ចាស់រ៉ឺម៉កបង់ថ្លៃខូចខាតចំនួន ១០០ដុល្លារ។ ប៉ុន្តែម្ចាស់រ៉ឺម៉កប្រាប់ថា ខ្លួនក្រ ខ្លួនជាអ្នកបើករ៉ឺម៉កឲ្យគេប៉ុណ្ណោះ ដូច្នេះមិនមានប្រាក់ដល់ទៅ ១០០ដុល្លារសងទេ ហើយក៏សុំការលើកលែងយោគយល់។

ចំណែកម្ចាស់រថយន្តមើលឃើញថា អ្នកបើករ៉ឺម៉កទម្លាក់ទឹកមុខគួរឲ្យអាណិត និងគិតថា មិនចង់ជំរិតទាមទារប្រាក់ពីអ្នកក្រ នាងក៏ព្រមអធ្យាស្រ័យឲ្យដោយមិនបាច់បង់ប្រាក់ឲ្យខ្លួននោះទេ។ នាងក៏បានថតរូប និងវីដេអូជាមួយអ្នកបើករ៉ឺម៉កទុកជាអនុស្សាវរីយ៍ និងអំពាវនាវសុំឲ្យអ្នកបើកបរមិនថា រ៉ឺម៉កធម្មតា ឬរ៉ឺម៉កកង់បីដឹកភ្ញៀវទាំងអស់ សូមបង្កើនការប្រុងប្រយ័ត្នក្នុងការបើកបរ ពិសេសបើករុលទៅមុខទាំងស្ថានភាពផ្លូវចង្អៀត ព្រោះគេឃើញមានករណីស្រដៀងៗគ្នាកើតឡើងច្រើនដងមកហើយ។

ក្រោយសុំទោសលើកដំបូងរួចរាល់ និងមានការលើកលែង អ្នកបើក និងអ្នកជិះពីរបីនាក់ទៀត ក៏បើករ៉ឺម៉កទៅមុខបន្តទៀត។ ពេលទៅដល់ផ្ទះវិញ អ្នកបើករ៉ឺម៉កបានបើកហ្វេសប៊ុក ឃើញគេបង្ហោះវីដេអូនោះព្រោងព្រាត គាត់ក៏បានសរសេរថា ខ្លួនចាប់ផ្ដើមល្បីហើយ និងមានការខំមិនឌឺដងចំពោះម្ចាស់រថយន្តជាច្រើនជាមួយមិត្តភ័ក្ដិលើហ្វេសប៊ុករបស់គាត់ ទើបធ្វើឲ្យម្ចាស់រថយន្តមើលឃើញ ក៏សម្ដែងការខកចិត្តខឹងសម្បារ រហូត Live វីដេអូប្រតិកម្មខ្លាំងទាំងយប់។ ស្រាប់តែនៅព្រឹកបន្ទាប់ អ្នកបើករ៉ឺម៉កបានផ្ញើរសារ (Chat) សុំទោសម្ចាស់រថយន្តតាមគណនីហ្វេសប៊ុកដោយសរសេរថា «ខ្ញុំសុំទោសចំពោះរឿងរ៉ាវដែលបានកើតឡើង ជាពិសេសការខំមិន នៅលើហ្វេសប៊ុកនោះ វាមិនមែនជាទស្សនៈរបស់ខ្ញុំទេបង ពួកអ្នកខំមិននោះ អ្នកខ្លះស្គាល់តាមហ្វេសប៊ុកប៉ុណ្ណោះ។ ខ្ញុំក៏សុំអរគុណសណ្ដានចិត្តបងសារជាថ្មី បើជ្រុលតែបងធ្វើល្អហើយ សូមបងនៅរក្សាសន្ដានចិត្តដ៏ល្អនេះបន្តទៀត ខ្ញុំក្រគ្មានលទ្ធភាពដូចអ្នកទាំងនោះនិយាយទេ។ បងកុំខឹង រក្សាសុខភាពកូនក្នុងផ្ទៃ។

ខ្ញុំលុបផុសនោះ ដោយសារខ្ញុំមិនចង់ឲ្យពួកអ្នកទាំងនោះខំមិនពាក្យពេចន៍មិនសមរម្យទៅទៀត សូមឲ្យវាបញ្ចប់ទៅបងស្រី អំពើល្អមិនសាបសូន្យទេ។ អ្នកលេងហ្វេសប៊ុកមួយចំនួន ពួកគាត់មិនបានដឹងរឿងរ៉ាវច្បាស់ទើបគាត់ចេះតែបញ្ចេញមតិប៉ាតណាប៉ាតណីយ៉ាងដូច្នេះ។ ខ្ញុំបានទាក់ទងទៅអ្នកទាំងនោះរួចហើយ និងថាឲ្យពួកគាត់ហើយដែរ។ បងមើលមុខខ្ញុំទៅថា ខ្ញុំស្លូតប៉ុណ្ណា និយាយដោយស្មោះបង ខ្ញុំមិនបានពាក់ព័ន្ធ និងប្រាប់គាត់ឲ្យធ្វើដូច្នេះទេ។

ខ្ញុំទើបតែឆែកមើល ឃើញមានអ្នកខ្លះទាំងនិយាយទៅកាន់បងថា ខ្ញុំជាថៅកែមានលុយទិញឡានដូចបងពីរបីគ្រឿង ពួកគាត់និយាយបំផ្លើសសុទ្ធសាធ។ ឥឡូវសុំឲ្យបងបញ្ចប់វាបានទេ?» បន្ទាប់ពីទទួលបានសារនេះហើយ នារីជាម្ចាស់រថយន្តនៅតែមិនទាន់អស់ចិត្ត នាងក៏ថតសារទាំងនោះផុស រួច Live តភាគនិយាយរហូតដល់រយៈពេលជាង ៣ម៉ោងដោយអំពាវ ក៏ដូចជាសំណូមពរឲ្យម្ចាស់រ៉ឺម៉កខលវីដេអូ (Call Video Live) ជាមួយនាងតទល់នៅលើគណនីហ្វេសប៊ុករបស់នាងដើម្បីបកស្រាយ។ ប៉ុន្តែម្ចាស់រ៉ឺម៉កចង់បញ្ចប់រឿងត្រឹមហ្នឹង ក៏មិនបានតបតតាមការស្នើសុំឲ្យចេញមុខនោះដែរ។

ចំណែកអ្នកប្រើហ្វេសប៊ុកម្នាក់បានបញ្ចេញមតិជាមួយហេតុផលថា «បើយើងឈរមើលឲ្យបានទាំងសងខាង បងស្រីគាត់ចូលចិត្តធ្វើបុណ្យហើយថតផុសព្រោះចង់ឲ្យអ្នកដទៃ បានឃើញ និងអាចមានចិត្តធ្វើបុណ្យដូចគាត់ ត្រូវម្យ៉ាង ព្រោះអាចបណ្ដុះចិត្តមនុស្សឲ្យចេះសន្តោស និងចែករំលែកគ្នា។ តែបើឈរខាងអ្នកដែលគាត់សន្តោស និងទទួលការជួយពីគាត់ ទាំងខ្ញុំទាំងគេ អត់មែន ក្រមែន លំបាកមែន តែក៏មិនចង់ល្បីតាមហ្វេសបុក ថាគេឲ្យទានដែរ។

បងគួរគិតថាបងអ្នកឲ្យទាន ជាប់ឈ្មោះជាអ្នកមានចិត្តបុណ្យ តែអ្នកទទួលទានពីបង ជាប់ឈ្មោះជាអ្នកក្រ ខ្ញុំជឿថា អ្នកទទួលការសន្តោស និងទទួលទានពីបង គឺខ្មាសអៀនណាស់ទៅហើយ ចុះទំរាំត្រូវថតផុសឲ្យមនុស្សរាប់ពាន់រាប់ម៉ឺននាក់ឃើញ ក៏គេមិនសប្បាយចិត្តដែរ។ និយាយសរុប ទាំងសងខាង សុទ្ធតែមានចិត្តបរិសុទ្ធគ្រាន់តែការយល់ពីគ្នា ខ្វះខាត បើអាចបញ្ឈប់ក៏ឈប់ត្រឹមហ្នឹងទៅ ក្នុងរឿងកំប្លែងរបស់បង តែងនិយាយថាខ្មែរដូចគ្នាត្រូវចេះស្រលាញ់គ្នា»៕