កំពង់ធំៈ នៅរសៀលថ្ងៃទី២០ ខែសីហា ឆ្នាំ២០១៨ សមត្ថកិច្ចឆែកឆេរផ្ទះចោរលួចក្របី មួយកន្លែងស្ថិតនៅភូមិគោកងួន ឃុំត្រពាំងឬស្សី ស្រុកកំពង់ស្វាយ ខេត្តកំពង់ធំ ដោយធ្វើសកម្មភាពលួចក្របី ចំនួនបីក្បាលកាលនៅពីថ្ងៃទី១៨ ខែសីហា ឆ្នាំ២០១៨។ ម្ចាស់ក្របីមានឈ្មោះហ៊ន សុផល ភេទប្រុស អាយុ ៤២ឆ្នាំ និងប្រពន្ធ មានឈ្មោះ ឆេង សុខន អាយុ ៤២ឆ្នាំ។

ក្របីដែលបានបាត់នោះចំនួន ៣ក្បាល មានមេធំ១ក្បាល មេក្រមុំ១ក្បាល ឈ្មោលស្ទាវ ១ក្បាល ក្រោយពីទទួលបានព័ត៌មាននោះភ្លាម នគរបាលស្រុកបានចេញអន្តរាគមន៍ចុះស្រាវជ្រាវ នាំគ្នាតាមដានជើងក្របី ដែលចោរដឹកចេញពីផ្ទះទៅនោះ ហើយបានតាមរកឃើញគេដឹកចូលទៅក្នុងផ្ទះឈ្មោះនុត សុធា ភេទប្រុស អាយុ ៤៣ឆ្នាំ និងប្រពន្ធឈ្មោះ មឿន ផល្លី អាយុ៣៨ឆ្នាំ រស់នៅភូមិព្រៃតាហ៊ូ សង្កាត់ព្រៃតាហ៊ូ ក្រុងស្ទឹងសែន។ តែជនសង្ស័យជាប្ដីប្រពន្ធបានរត់គេចខ្លួនបាត់ មុនពេលសមត្ថកិច្ចចុះទៅដល់ផ្ទះ។ សមត្ថកិច្ចជំនាញបាននិងកំពុងអនុវត្តនីតិវិធី សុំដីកាតាមចាប់ខ្លួនទាំងពីរនាក់ប្តីប្រពន្ធ ឲ្យចូលខ្លួនមកទទួលទោសតាមច្បាប់ ៕